مرقوس 9
9
1عئسا اونلارا ددی: «دوغروسونو سئزه دیئرم، بورادا دورانلار آراسیندا بعضئسی وار کی، تارینین پادشاهلیغینین قودرتله گلمه‌سئنی گؤرمه‌یئنجه اؤلومو دادمایاجاقلار.»
عئسانین گؤرونوشو دیئشئلئر
(متّا 17:1-13، لوقا 9:28-36)
2آلتی گوندن سونرا عئسا، پطروس، یعقوب و یوحنّانی اؤزو ائله گؤتوردو و تک‌باشینا اونلاری اوجا بئر داغین اوستونه آپاردی و اونلارین گؤزلری قاباغیندا گؤرونوشو دیئشئلدی. 3پالتارلاری پارلاق اولوب اِله آغاردی کی، یر اوزونده هچ یون آغاردان اونو یویوب بله آغاردا بئلمز. 4شاگئردلره ائلیا ائله موسا دا گؤروندو. اونلار عئسا ائله صؤحبت ادئردئلر.
5پطروس عئسایا ددی: «اوستاد، بورادا اولماغیمیز نه یاخشی اولدو! قوی بورادا اوچ چادیر قوراق، بئری سنه، بئری موسایا، و بئری ده ائلیایا.» 6اونلار او قدر قورخموشدولار کی، پطروس بئلمئردی نه دسئن.
7بو آرادا بئر بولود گلئب اونلارا کؤلگه سالدی. و بولوددان بئر سس گلدی: «بودور منئم عزئز اوغلوم، اونا قولاق آسین.» 8شاگئردلر بئردن اطرافلارینا باخدیلار، آمّا یانلاریندا عئسادان باشقا هچ کئمی گؤرمه‌دئلر.
9داغدان اِنَنده عئسا شاگئردلرئنه تاپشیردی کی، ائنسان اوغلونون اؤلولردن دئرئلمه‌یئنه‌جک، گؤردوکلری باره‌ده هچ کئمه بئر شی دمه‌سئنلر. 10اونلار دا عئسانین بو سؤزونو یادلاریندا ساخلاییب اؤلولردن دئرئلمه‌یئن نه اولدوغو باره‌ده آرالاریندا موباحئثه ادئردئلر.
11و اوندان سوروشدولار: «نه اوچون دئن عالئملری دیئرلر کی، اوّلجه ائلیا گلمه‌لی‌دئر؟»
12عئسا اونلارا ددی: «دوغرودان دا ائلیا اوّلجه گلئب، هر شیی ائصلاح اده‌جک. ائنسان اوغلو حاقّیندا نه یازیلیب؟ بو کی، او گرک عذاب چکئب تحقئر اولونسون. 13سئزه دیئرم کی، ائلیا حقئقتن گلدی و نه ائسته‌دئکلرئنی اونا اتدئلر، نجه کی، اونون باره‌سئنده یازیلیب.»
عئسا ناپاک روح اَلئنده توتولموش بئر اوغلانا شفا ورئر
(متّا 17:14-23، لوقا 9:37-45)
14شاگئردلرئنئن یانینا قاییتدیقلاری زامان، اونلارین اطرافیندا بؤیوک بئر ائزدئحامی گؤردولر و دئن عالئملری شاگئردلرله موباحئثه ادئردئلر. 15جاماعات اونو گؤردویو زامان چوخ حیرت اتدئلر و اونون طرفئنه قاچیب، اونا سالام وردئلر. 16عئسا اونلاردان سوروشدو: «بونلارلا نه موباحئثه ادئرسئنئز؟»
17جاماعات آراسیندان بئر کئشی جاواب وردی: «اوستاد، اوغلومو سنئن یانینا گتئرمئشم. ائچئنده دئلسئز بئر روح وار. 18اوشاغی هارادا توتسا، اونو یره چیرپیر. اوشاق کؤپور، دئشلرئنی قیجیردیر و قورویوب قالیر. شاگئردلرئندن ائسته‌دئم کی، بو روحو اوندان اشئیه قووسونلار، لاکئن اِده بئلمه‌دئلر.»
19عئسا اونلارا جاواب ورئب ددی: «ای ائمانسیز نسئل. نه واختا کئمی سئزئنله اولمالی‌یام؟ نه واختا کئمی سئزی دؤزملی‌یَم؟ اونو منئم یانیما گتئرئن.»
20اونلار اوشاغی عئسانین یانینا گتئردئلر. روح اونو گؤرَر-گؤرمز، اوشاغی شئدّتله اسدئرئب، یره چیرپدی. اوشاق یره ییخیلیب آغیزی کؤپوکلندی و دئیئرله‌نئردی.
21عئسا اوشاغین آتاسیندان سوروشدو: «نه واختدان بری اونون باشینا بو ائش گلئب؟»
اوشاغین آتاسی ددی: «اوشاقلیغیندان. 22روح اوشاغی هلاک اتمک اوچون اونو اودا-سویا سالیر. لاکئن اگر بئر شی اده بئلئرسن، بئزه یازیغین گلسئن. بئزه ائمداد ات.»
23عئسا اونا ددی: «بئر شی اده بئلئرسن! ائمان گتئرن آداما هر شی مومکوندور.»
24اوشاغین آتاسی او آندا باغیریب ددی: «ائمان گتئرئرم، منئم ائمانسیزلیغیما ائمداد ات.»
25عئسا خالقین اونون یانینا قاچا-قاچا گلمه‌سئنی گؤرنده او ناپاک روحا آجیقلانیب ددی: «ای کار و دئلسئز روح، سنه امر ادئرم اوندان اشئیه چیخ و بئر داها اونا داخئل اولما.»
26روح باغیردی و چوخ عذاب ورئب، اوندان اشئیه چیخدی و اوشاق اؤلو کئمی یرده قالدی، اله کی، چوخ آدام ددی: «او اؤلدو.» 27لاکئن عئسا اوشاغین الئندن توتوب اونو قالدیردی و اوشاق دوروب دایاندی. 28عئسا اِوه گئرندن سونرا شاگئردلری اوندان سوروشدولار: «نه اوچون بئز اونو چیخاردا بئلمه‌دئک؟»
29عئسا اونلارا ددی: «بو جئنس دوعادان باشقا هچ بئر یوللا چیخماز.»
30اورادان چیخیب جلئل بؤلگه‌سئندن کچدئلر. عئسا هچ کسئن بئلمه‌سئنی ائسته‌مئردی. 31چونکی شاگئردلرئنه تعلئم ورئب، اونلارا ددی: «ائنسان اوغلو ائنسانلارین الئنه ورئله‌جک و اونلار اونو اؤلدوره‌جکلر و اؤلدورولمه‌سئندن اوچ گون سونرا دئرئله‌جک.» 32لاکئن شاگئردلر بو سؤزو آنلامادیلار و اوندان سوروشماغا دا قورخدولار.
هامیدان لاپ بؤیوک کئمدئر؟
(متّا 18:1-5، لوقا 9:46-48)
33اونلار کفرناحوما گلدئلر. اِوه گئرندن سونرا عئسا اونلاردان سوروشدو: «یولدا نه باره‌ده موباحئثه ادئردئنئز؟» 34شاگئردلرئن هچ بئرئندن سس چیخمادی، چونکی یولدا هانسینین لاپ بؤیوک اولدوغو باره‌سئنده موباحئثه اتمئشدئلر. 35عئسا اوتوردو و او اون‌‌‌ائکی شاگئردی یانینا چاغیریب اونلارا ددی: «بئرئنجی اولماق ائسته‌ین هر کس، گرک هامیدان آخیر اولسون و هامییا خئدمت اتسئن.» 36و کئچئک بئر اوشاغی آلیب، اورتادا دوردوردو و اونو قوجاقلاییب، اونلارا ددی: 37«کئم بله کئچئک اوشاقلاردان بئرئنی منئم آدیمین خاطئرئنه قبول اتسه، منی قبول ادئر و منی قبول ادن هر کس، منی یوخ، منی گؤندَ‌ره‌نی قبول ادئر.»
38یوحنّا عئسایا ددی: «اوستاد، بئر آدام گؤردوک کی، سنئن آدیندا ناپاک روحلاری اشئیه قوووردو، آمّا سنه پِیرَو دیئل. اونون اوچون ده اونو بو ائشدن منع اتدئک.»
39آمّا عئسا اونا ددی: «اونا مانع اولمایین. هچ کئم یوخدور کی، منئم آدیمدا مؤجوزه ادئب، سونراسی دا منی یامانلاسین. 40بئزه ضئدّ اولمایان بئزئم طرفداریمیزدیر. 41مسئحئنکی اولدوغونوز اوچون کئم سئزه منئم آدیمین خاطئری اوچون بئر بارداق سو ائچئرتسه، دوغروسونو سئزه دیئرم، اونون اَجری اصلا آرادان گتمه‌یه‌جک. 42منه ائمان گتئرن بو اوشاقلاردان بئرئنی کئم گوناها باتیرسا، اونون اوچون داها یاخشی‌دیر کی، بوینونا دیئرمان داشینی باغلاییب، دهنزه آتیلسین. 43اگر اَلئن سنی گوناها سالیر، اونو کس. سنئن اوچون علئل حیاتا گئرمک، ائکی ال‌له جهنّمه، او سؤنمه‌ین اودا دوشمکدن داها یاخشی‌دیر. 44اورایا کی، اونلارین قوردو اؤلمز، اودو دا سؤنمز. 45اگر آیاغین سنی بودره‌دئر، اونو کس. سنئن اوچون تک آیاقلی حیاتا گئرمک، ائکی آیاقلی جهنّمه دوشمکدن داها یاخشی‌دیر. 46اورایا کی، اونلارین قوردو اؤلمز، اودو دا سؤنمز. 47اگر گؤزون سنی گوناها باتیریر، اونو چیخارت. سنئن اوچون تک گؤزلو تارینین پادشاهلیغینا گئرمک، ائکی گؤزلو جهنّمه دوشمکدن داها یاخشی‌دیر. 48اورایا کی، اونلارین قوردو اؤلمز، اودو دا سؤنمز.#9:48 اِشَعیا ۶۶:۲۴ 49چونکی هرکس اودلا دوزلاناجاق. 50دوز یاخشی شی‌دئر، لاکئن اگر دوز، دوزسوز اولسا، نجه اونو گئنه دوزلو اتمک اولار؟ ائچئنئزده دوز اولسون و آرانیزدا باریش.»
Currently Selected:
مرقوس 9: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
