مرقوس 11
11
مسئح اورشلئمه داخئل اولور
(متّا 21:1-11، لوقا 19:28-40، یوحنّا 12:12-19)
1اورشلئمه یاخینلاشیب زیتون داغینین یانیندا اولان بیت‌فاجی و بیت‌عنیایا یتئشن زامان، عئسا شاگئردلرئندن ائکئسئنی گؤندَ‌رئب 2اونلارا بله ددی: «قاباغینیزداکی کنده گدئن. اورایا گئرنده اورادا باغلی دوران بئر سیپا گؤره‌جکسئنئز کی، ائندئیه کئمی هچ کس اونا مئنمه‌یئب. اونو آچین و منئم یانیما گتئرئن. 3و اگر بئری سئزه دسه: ”نه اوچون بونو ادئرسئنئز؟“ دئیرسئنئز: ”ربّئن بونا احتئیاجی وار و آنَن اونو بورایا قایتاراجاق.“»
4اونلار گتدئلر و کوچه‌ده قاپینین یانیندا باغلی بئر سیپا تاپیب، اونو آچدیلار. 5اورادا دورانلاردان بعضئسی ددی: «نه ادئرسئنئز؟ بو سیپانی نه اوچون آچیرسینیز؟»
6شاگئردلر عئسانین ددئیی کئمی اونلارا جاواب وردئلر و آداملار اونلاری بوراخدیلار. 7سیپانی عئسانین یانینا گتئرئب، پالتارلارینی اونون اوستونه سالدیلار و عئسا اونا مئندی. 8چوخ آداملار پالتارلارینی، بعضئلری ده زمئلردن کسدئکلری آغاج بوداقلارینی یولا سردئلر. 9قاباقدا گدنلر و آرخادان گلنلر چیغیریب دیئردئلر:
«هوسانّا!#11:9 اَرامی دئلئنده هوسانّا کلمه‌سی «یالواریریق نئجات ور» معناسیندادیر. لاکئن سونرالار بو سؤزدن حمد-ثنا اوچون ائستئفاده اولونوردو. ربّئن آدیندا گلن موبارک اولسون.#11:9 مزمور ۱۱۸:۲۵ و ۲۶
10آتامیز داوودون گلن پادشاهلیغی موبارک اولسون.
لاپ اوجالاردا، هوسانّا!»
11عئسا اورشلئمه گئرئب معبده گتدی و هر شیی گؤزدن کچئرتدی. گج اولدوغونا گؤره، او اون‌ائکی شاگئرد‌له بیت عنیایا گتدی.
میوه‌سئز انجئر آغاجی
(متّا 21:18-19)
12او گونون صاباحی بیت عنیادان چیخدیقلاری زامان، عئسا آجیقدی. 13اوزاقدا یارپاقلی بئر انجئر آغاجی گؤردو. آغاج اوستونده بئر شی تاپماق اومئدی ائله اونا یاخینلاشدی، آمّا یانینا گلن واخت، یارپاقدان باشقا اوندا بئر شی تاپمادی، چونکی انجئر مؤوسومو دیئلدی. 14عئسا اونا ددی: «آرتیق سندن هچ کئم اصلا میوه یمه‌سئن.» و شاگئردلری بو سؤزو اشئتدئلر.
عئسا آل-وِرچئلری معبددن اشئیه قووور
(متّا 21:12-17، لوقا 19:45-48، یوحنّا 2:12-22)
15اورشلئمه گلدئلر. عئسا معبده گئردی و اورادا آلیش-ورئش ادنلری اشئیه قوودو. صرّافلارین مئزلرئنی و گؤیرچئن ساتانلارین چارپایالارینی چوئردی. 16و هچ کسی قویمادی کی، معبدئن حیطئندن بئر شی کچئرتسئن. 17و اونلارا تعلئم ورئب ددی: «مگر یازیلماییب کی، ”منئم اِوئم بوتون مئلّتلر اوچون دوعا اِوی چاغیریلاجاق؟!“#11:17 اِشَعیا ۵۶:۷ لاکئن سئز، اونو اوغرولار یوواسینا دؤندَ‌رئبسئنئز.» #11:17 اِرِمیا ۷:۱۱
18باش کاهئنلر و دئن عالئملری بونو اشئتدئلر و عئسانی هلاک اتمک اوچون بئر یول تاپماغا باشلادیلار. چونکی اوندان قورخوردولار. اونا گؤره کی، بوتون خالق اونون تعلئملرئندن حیران قالمیشدی. 19آخشام اولاندا اونلار شهردن اشئیه چیخدیلار. 20او گونون صاباحی انجئر آغاجینین یانیندان کچنده، اونو کؤکوندن قوروموش گؤردولر. 21پطروس عئسایا خاطیرلادیب ددی: «اوستاد باخ، لعنت اتدئیئن انجئر آغاجی قورویوب!» 22عئسا جاواب ورئب اونلارا ددی: «تارییا ائمانینیز اولسون! 23دوغروسونو سئزه دیئرم، هرکس بو داغا دسه: ”قالخ، دهنزه آتیل!“ و اوره‌یئنده شوبهه اتمه‌یئب ددئیئنئن اولاجاغینا ائنانسا، ددئیی کئمی اولاجاق. 24بونون اوچون سئزه دیئرم، دوعا اتدئیئنئز و ائسته‌دئیئنئز هر شیئن اِله ائندئدن آلدیغینیزا ائنانین و سئزئن اوچون اولاجاق. 25دوعایا دوردوغونوز زامان، هر بئر آدامین ضئدّئنه اوره‌یئنئزده نه ساخلاییبسینیز، باغیشلایین کی، گؤیلرده اولان آتانیز دا سئزئن تقصئرلرئنئزی سئزه باغیشلاسین. 26اگر باغیشلامایاسینیز، گؤیلرده‌کی آتانیز دا سئزئن تقصئرلرئنئزی سئزه باغیشلامایاجاق.»
عئسانین صلاحئیّتی
(متّا 21:23-27، لوقا 20:1-8)
27اونلار گئنه اورشلئمه گلدئلر. عئسا معبدئن حیطئنده گزنده، باش کاهئنلر، دئن عالئملری و آغساقّاللار یاخینلاشیب، 28اونا ددئلر: «نه صلاحئیّتله بو ائشلری ادئرسن؟ بونلاری اتمک اوچون بو صلاحئیّتی سنه کئم ورئب؟»
29عئسا اونلارا ددی: «من ده سئزدن بئر سوآل سوروشاجاغام. منه جاواب ورئن، او واخت من ده سئزه دئیه‌رم کی، بو ائشلری نه صلاحئیّتله گؤرورم. 30یحیانین تعمئد ورمک صلاحئیّتی هارادان گلدی؟ گؤیدن، یوخسا ائنسانلاردان؟ جاواب ورئن.»
31اونلار آرالاریندا مصلحتله‌شئب ددئلر: «اگر دِسَک گؤیدن، دئیه‌جک بس نه اوچون اونا ائنانمادینیز؟ 32لاکئن اگر دِسَک؛ ائنسانلاردان…» اونلار خالقدان قورخدولار، چونکی هامی یحیانی حقئقی بئر پیغمبر بئلئردی. 33و عئسایا جاواب ورئب ددئلر: «بئلمئرئک.» عئسا دا اونلارا ددی: «من ده سئزه دمئرم کی، بو ائشلری نه صلاحئیّتله گؤرورم.»
Currently Selected:
مرقوس 11: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
