متّا 24
24
آخیر گونلرئن علامتی
(مرقوس 13:1-13، لوقا 21:5-33)
1عئسا معبددن چیخیب گدنده، شاگئردلری اونا یاخینلاشدیلار و ائسته‌دئلر کی، معبدئن بئنالارینی اونا گؤرسدسئنلر. 2عئسا اونلارا ددی: «آیا بوتون بو شیلری گؤرورسونوز؟ دوغروسونو سئزه دیئرم: بورادا داش، داش اوستونده قالمایاجاق. هامیسی ییخیلاجاقدیر.»
3عئسا زیتون داغیندا اوتورموشدو کی، شاگئردلر تکلئکده اونون یانینا گلئب ددئلر: «بئزه ده گؤرک، بو ددئکلرئن نه واخت باش وره‌‌جک؟ سنئن گلئشئنئن و بو دؤورون باشا چاتماسینین علامتی نه اولاجاق؟»
4عئسا جاواب ورئب اونلارا ددی: «دئقّتلی اولون کی، کئمسه سئزی آلداتماسین. 5چونکی چوخ آداملار منئم آدیمدا گلئب ”مسئح منم“ دئیه‌جکلر و چوخ آداملاری آلداداجاقلار. 6موحارئبه گورولتولری و ساواش خبرلری اشئده‌جکسئنئز. باخین، قورخمایین، چونکی بوتون بونلارین باش ورمه‌سی گرکدئر. آمّا بو حله ده آخیر دیئل. 7مئلّت مئلّتئن ضئدّئنه، دؤولت دؤولتئن ضئدّئنه قالخاجاق. موختلئف یرلرده قحطی‌لر و زلزله‌لر اولاجاق. 8بوتون بونلار دوغوم سانجی‌لارینین باشلانیشی‌دیر.
9او زامان سئزه اذئیّت ورئب، سئزی اؤلدوره‌جکلر و منئم آدیما گؤره، بوتون خالقلار سئزدن نئفرت اده‌جکلر. 10او واخت بئر چوخلاری ائماندان بودره‌یه‌جکلر، بئربئرلرئنی تسلئم ادئب بئربئرلرئندن نئفرت اده‌جکلر. 11بئر چوخ یالانچی پیغمبرلر ظوهور ادئب، چوخ آداملاری آزدیراجاقلار. 12پئسلئیئن آرتدیغیندان چوخ آداملارین سِوگئسی سویویاجاق. 13لاکئن آخیرا قدر صبر ادن نئجات تاپاجاقدیر. 14گؤیون پادشاهلیغی حاقّیندا اولان بو موژده بوتون دونیایا وعظ اولوناجاق کی، هامی مئلّتلره شهادت اولسون. و آخیر او واخت گله‌جکدئر.
15نه واخت گؤردونوز کی، دانیال پیغمبرئن واسئطه‌سئله دیئلمئش او وئرانه‌لئک گتئرن ائیرنج شی موقدّس یرده دورور،#24:15 دانیال ۹:۲۷، ۱۱:۳۱، ۱۲:۱۱ (قوی اوخویان آنلاسین)، 16یهودئیه‌ده اولان داغلارا قاچسین. 17دامدا اولان اِوئندن بئر شی گؤتورمیه اِنمه‌سئن. 18زمئده اولان دا رداسینی گؤتورمک اوچون گری دؤنمه‌سئن. 19او گونلرده بویلو اولانلارین و اوشاق اَمئزدئرنلرئن وای حالینا!
20دوعا ادئن کی، قاچماغینیز قیشدا، یا دا سبّت گونونده اولماسین. 21چونکی او زامان اله بؤیوک مشقّت اولاجاق کی، دونیانین باشلانیشیندان ائندئیه کئمی بله بئر شی نه اولوب، نه ده اولاجاق. 22اگر او گونلر قیسالماسایدی، هچ بئر ائنسان نئجات تاپمازدی. لاکئن سچئلمئش اولانلارین خاطئرئنه گؤره، او گونلر قیسالدیلاجاق.
23اگر او زامان کئمسه سئزه دسه: ”باخ، مسئح بورادادیر“، یا دا ”اورادادیر“، اونا ائنانمایین. 24چونکی یالانچی مسئحلر و یالانچی پیغمبرلر ظوهور ادئب بؤیوک علامتلر و مؤجوزه‌لر گؤرسده‌جکلر کی، مومکون اولسا، سچئلمئش اولانلاری دا آلداتسینلار. 25باخین، من سئزه ائره‌لئدن خبر وردئم.
26بله‌جه، اگر سئزه ”باخ، او چؤلده‌دئر“ دسه‌لر ده، چیخمایین؛ ”باخ، او ائچه‌ری اوتاقلاردادیر“ دسه‌لر ده، ائنانمایین. 27چونکی نجه شئمشک شرقدن چیخیب قربه کئمی گؤرونور، ائنسان اوغلونون گلمه‌‌سی ده اله اولاجاقدیر.
28لِش هارادا اولسا،
کرکسلر ده اورایا ییغیلارلار.
29او گونلرئن مشقّتئندن فورَن سونرا،
گون قارالاجاق،
آی ائشیغینی ورمه‌یه‌جک،
اولدوزلار گؤیدن دوشه‌جک،
سماوی قووّتلر تئتره‌یه‌جک.#24:29 اِشَعیا ۱۳:۱۰ و ۳۴:۴
30او زامان ائنسان اوغلونون علامتی گؤیده گؤرونه‌جک و یر اوزونون بوتون خالقلاری شئون اده‌جکلر و گؤره‌جکلر کی، ائنسان اوغلو گؤیون بولودلاری اوستونده قودرت و بؤیوک عئزّتله گلئر. 31و او، ملکلرئنی اوجا سسلی شیپورلا گؤندَ‌ره‌جک. ملکلر ده سچئلمئشلری دؤرد طرفدن#24:31 اصل یونانی دئلئنده: «دؤرد یِلدن»، گؤیلرئن بئر اوجوندان او بئری اوجونا قدر ییغاجاقلار.
32ائندی، انجئر آغاجیندان عئبرت آلین. بوداقلاری تزه‌له‌نئب یارپاق آچاندا بئلئرسئنئز کی، یای یاخیندیر. 33سئز ده بوتون بو شیلری گؤرنده بئلئن کی، ائنسان اوغلو یاخیندیر، قاپیدادیر. 34دوغروسونو سئزه دیئرم، بوتون بو شیلر باش ورمه‌یئنجه بو نسئل کچئب گتمیه‌جک. 35گؤی و یر کچئب گده‌جک، آمّا منئم سؤزلرئم اصلا کچئب گتمه‌یه‌جکدئر.
36لاکئن هچ کس او گون و او ساعاتی بئلمئر، نه گؤیون ملکلری، نه ده اوغول. آتادان باشقا هچ کئم بئلمئر. 37نوحون زامانیندا نجه اولدو، ائنسان اوغلونون گلئشی ده اله اولاجاق. 38نجه کی، طوفاندان ائره‌لی اولان گونلرده، نوح گمئیه گئرن گونه کئمی، ائنسانلار ییئب، ائچئب، آرواد آلیب، اَره گدئردئلر. 39و طوفانین گلئب هامیسینی آپارینجایا قدر، باشلارینا نه گله‌جه‌یئندن بئخبر ائدئلر، ائنسان اوغلونون گلئشی ده بو جور اولاجاق. 40او گون زمئده اولان ائکی نفردن بئری آلیناجاق، بئری قالاجاقدیر. 41دیئرماندا دارتان ائکی آرواددان بئری آلیناجاق، بئری قالاجاقدیر.
42اونا گؤره ده، اویاق دورون؛ چونکی ربّئن هانسی گون گله‌جه‌یئنی بئلمئرسئنئز. 43آمّا بونو بئلئن کی، اگر اِو صاحئبی اوغرونون هانسی ساعاتدا گله‌جه‌یئنی بئلسَیدی، اویاق قالیب اؤز اِوئنی اوغورلانماغا قویمازدی. 44بونون اوچون سئز ده حاضیر اولون؛ چونکی ائنسان اوغلو سئزئن گومان آپارمادیغینیز ساعاتدا گله‌جکدئر.
45کئمدئر او صادئق و عاغیلّی قول کی، آغاسی، اِوئنئن اهلئنی اونا تاپشیریب اله کی، قوللارین یمه‌یئنی واختلی-واختیندا ورسئن؟ 46بختور او قول کی، آغاسی گلنده اونو بو جور ائشه مشغول تاپسین. 47دوغروسونو سئزه دیئرم؛ آغاسی بوتون مال-دؤولتئنی اونا تاپشیراجاقدیر. 48آمّا اگر قول پئس اولوب اوره‌یئنده دسه کی، ”آغام گج گله‌جک“، 49و یولداشلارینی دؤیوب عیّاشلارلا ییئب ائچمه‌یه باشلاسا. 50قولون آغاسی، اونون گؤزلمه‌دئیی بئر گونده و بئلمه‌دئیی بئر ساعاتدا گله‌جک، 51اونو ائکی شقّه ادئب رئیاکارلارلا همن عاقئبته آتاجاق؛ اورایا کی، اورادا آغلاشما و دئش قیجیرتماسی اولاجاقدیر.»
Currently Selected:
متّا 24: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
