متّا 23
23
وای حالینیزا!
(مرقوس 12:38-40، لوقا 11:39-51، 13:34-35، 20:45-47)
1بوندان سونرا عئسا جاماعاتا و اؤز شاگئردلرئنه ددی: 2«دئن عالئملری و فرئسئلر موسانین کورسوسونده اوتورورلار. 3بونا گؤره ده، سئزه امر اتدئیی هر شیی گرک یرئنه یتئره‌سئنئز. لاکئن اونلارین اتدئکلرئنی اتمه‌یئن، چونکی وعظ اتدئکلرئنه عمل اتمئرلر. 4اونلار آغیر یوکلر باغلاییب ائنسانلارین چئیئنلرئنه قویورلار، آمّا اونلاری داشیماق اوچون ائسته‌مئرلر کی، اؤزلرئنئن بئر بارماغینی بله ترپتسئنلر. 5عمل اتدئکلرئنئن هامیسینی، اونون اوچون ادئرلر کی، ائنسانلارا نومایئش ورسئنلر. دوعا بازوبندلرئنی#23:5 دَرئدن دوزَ‌لدئلمئش کئچئک بئر باغلاما ائدی کی، اوندا موقدّس کئتابین آیه‌لری وار ائدی و اونو قوللارینا، یا دا آلینلارینا باغلایاردیلار. اِنلی و پالتارلارینین ساجاقلارینی اوزون ادئرلر. 6ضئیافتلرده مجلئسئن باشینی، کنئسه‌لرده ده باش کورسولری توتماغی سوئرلر. 7بازار میدانلاریندا سالاملار آلماغی و ائنسانلارین اونلارا اوستاد آدیندا خئطاب اتمه‌سئنی سوئرلر.
8لاکئن سئز اوستاد چاغیریلمامالی‌سینیز، چونکی سئز هامینیز قارداشسینیز و آنجاق بئر موعلّئمئنئز وار. 9یر اوزونده هچ کسه ده آتا دمه‌یئن. چونکی بئر آتانیز وار، او دا گؤیده‌دئر. 10هچ کئم سئزی موعلّئم چاغیرماسین، چونکی بئر موعلّئمئنئز وار، او دا مسئحدئر. 11آرانیزدا بؤیوک اولان، او بئرئلرئن نؤکری اولاجاق. 12چونکی اؤزونو قالدیران آلچالاجاق، و اؤزونو آلچاق ادن اوجالاجاقدیر.
13وای سئزه، ای دئن عالئملری و فرئسئلر، ای رئیاکارلار! سئز گؤیون پادشاهلیغینین قاپیسینی ائنسانلارین اوزونه باغلاییرسینیز. نه اؤزونوز گئرئرسئنئز، نه ده گئرمک ائسته‌ینلری قویورسونوز. 14وای سئزه، ای دئن عالئملری و فرئسئلر، ای رئیاکارلار! چونکی سئز دول آروادلارین اِوئنی غارت ادئرسئنئز و اؤزلرئنئزی گؤرسدمک اوچون اوزون دوعالار ادئرسئنئز. بونون اوچون ده، داها آغیر محکومئیّته محکوم اولاجاقسینیز.
15وای سئزه، ای دئن عالئملری و فرئسئلر، ای رئیاکارلار! چونکی سئز بئر نفری ائمانا گتئرمک اوچون دهنزی و قورولوغو دولانیرسینیز و گتئرندن سونرا، اونو ائکی قات اؤزونوزدن آرتیق جهنّم اؤولادی ادئرسئنئز.
16وای سئزه، ای کور بلدچئلر! دیئرسئنئز: ”کئم معبده آند ائچسه، اهمئیّتلی بئر شی دیئلدئر، آمّا کئم معبدئن قیزیلینا آند ائچسه، اؤز آندینا باغلی اولور.“ 17سئز ای آخماقلار، ای کورلار! هانسی داها بؤیوکدور؟ قیزیل، یوخسا قیزیلی موقدّس ادن معبد؟ 18دیئرسئنئز: ”کئم قوربانگاها آند ائچسه، اهمئیّتلی بئر شی دیئلدئر، آمّا کئم قوربانگاهین اوستونده‌کی قوربانا آند ائچسه، اؤز آندینا باغلی اولور.“ 19سئز، ای کورلار! هانسی داها بؤیوکدور؟ قوربان، یوخسا قوربانی موقدّس ادن قوربانگاه؟ 20بله‌جه، قوربانگاها آند ائچن، اونا و اونون اوستونده اولان بوتون شیلره آند ائچئر. 21معبده آند ائچن، اونا و اوندا ساکئن اولانا آند ائچئر. 22گؤیه آند ائچن تارینین تختئنه و اونون اوستونده اوتورانا آند ائچئر.
23وای سئزه، ای دئن عالئملری و فرئسئلر، ای رئیاکارلار! چونکی نانَع، شویود، و زئره‌نئن اوندا بئرئنی ورئرسئنئز، لاکئن شرئعتئن داها موهوم ائشلرئنی، عدالتی، مرحمتی، و ائمانی آتیرسینیز. اوندا‌بئر حئصّه‌نی ورمکده اهمال اتمه‌دن، سئزه گرکدئر کی، اساس بونلارا عمل اده‌سئنئز. 24ای کور بلدچئلر! مئلچه‌یی سوزورسونوز، لاکئن دَوه‌نی اودورسونوز.
25وای سئزه، ای دئن عالئملری و فرئسئلر، ای رئیاکارلار! چونکی سئز فئنجان و بوشقابین چؤلونو تمئزله‌یئرسئنئز، آمّا اونلارین ائچی قارت و طاماحکارلیقلا دولودور. 26سن، ای کور فرئسی، اوّلجه فئنجان و بوشقابین ائچئنی تمئزله کی، چؤلو ده تمئز اولسون.
27وای سئزه، ای دئن عالئملری و فرئسئلر، ای رئیاکارلار! چونکی سئز آغاردیلمیش مقبره‌لره بنزه‌یئرسئنئز: چؤلو گؤزل گؤرونور، آمّا ائچی اؤلو سوموکلری و هر جور کئفئرله دولودور. 28سئز ده ائنسانلارا ظاهئرده صالح گؤرونورسونوز، آمّا باطئنئنئز رئیاکارلیق و پئسلئکله دولودور.
29وای سئزه، ای دئن عالئملری و فرئسئلر، ای رئیاکارلار! چونکی سئز نبی‌‌لره مقبره‌لر تئکئرسئنئز، صالحلرئن مقبره‌لرئنی بزه‌یئرسئنئز. 30دیئرسئنئز کی: ”بئز اگر آتالاریمیزین یاشادیقلاری گونلرده اولسایدیق، پیغمبرلرئن قانینی تؤکمکده اونلارلا اَل اولمازدیق.“ 31بله‌جه سئز اؤزونوز شهادت ورئرسئنئز کی، پیغمبرلری اؤلدورنلرئن اؤولادلاریسینیز. 32اگر اِله‌دئر، اوندا آتالارینیزین گوناه اؤلچوسونو دولدورون! 33سئز ای ائلانلار و افعئلر نسئلی! جهنّم جزاسیندان نجه قاچاجاقسینیز؟ 34باخین، بونون اوچون سئزه پیغمبرلر، معرئفت آداملاری، و دئن عالئملری گؤندَ‌رئرم: سئز اونلاردان بعضئلرئنی اؤلدوره‌جکسئنئز، چارمیخا چکه‌جکسئنئز. بعضئلرئنی ده کنئسه‌لرئنئزده دؤیوب شهردن شهره قوواجاقسینیز کی، 35هر صالح آدامین یر اوزونده تؤکولن قانی، سئزئن اوستونوزه گلسئن؛ صالح هابئلئن قانیندان بِرِکئیا اوغلو زِکَرئیّانین قانینا قدر کی، اونو معبدله قوربانگاهین آراسیندا اؤلدوردونوز. 36دوغروسونو سئزه دیئرم: بوتون بو شیلر بو نسلئن اوستونه گله‌جک.
37ای اورشلئم، اورشلئم! پیغمبرلری اؤلدورن و سنه گؤندَ‌رئلنلری داشا باسان! تویوق اؤز جوجه‌لرئنی قانادلاری آلتینا ییغان کئمی، من ده نچه دفه ائسته‌دئم کی، اؤولادلارینی بئر یره ییغیم، آمّا سئز ائستمه‌دئنئز! 38باخ، اِوئنئز بوش بوراخیلاجاق. 39چونکی سئزه دیئرم: ”ربّئن آدی ائله گلن آدام موبارک اولسون“#23:39 مزمور ۱۱۸:۲۶ دئیه‌جه‌یئنئز واختاجاق منی آرتیق گؤرمه‌یه‌جکسئنئز.»
Currently Selected:
متّا 23: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
