لوقا 20
20
عئسانین صلاحئیّتی
(متّا 21:23-27، مرقوس 11:27-33)
1عئسا، معبدده تعلئم ورئب ائنجئلئن خوش خبرئنی وردئیی گونلرئن بئرئنده، باش کاهئنلر و دئن عالئملری، آغساقّاللارلا بئرلئکده یاخینلاشیب، 2اونا ددئلر: «بئزه ده گؤرک، سن بو ائشلری نه ائقتئدارلا ادئرسن؟ بو ائقتئداری سنه کئم وردی؟»
3عئسا جاوابیندا اونلارا ددی: «منئم ده سئزدن بئر سوآلیم وار. منه دیئن؛ 4یحیانین تعمئدی گؤیدن ائدی، یوخسا ائنسانلاردان؟»
5اونلار اؤز آرالاریندا فئکئرله‌شئب دیئردئلر: «اگر ”گؤیدن“ دِسَک، اوندا دئیه‌جک؛ ”نه اوچون اونا ائنانمادینیز؟“ 6لاکئن اگر ”ائنسانلاردان“ دِسَک، بوتون خالق بئزی داشا باساجاق. چونکی خالق یحیانین پیغمبر اولدوغونا ائنانیر.» 7و جاواب وردئلر: «هارادان اولدوغونو بئلمئرئک؟»
8عئسا اونلارا ددی: «من ده سئزه دمئرم کی، بو ائشلری هانسی ائقتئدارلا گؤرورم.»
قدّار باغبانلارین مثلی
(متّا 21:33-46، مرقوس 12:1-12)
9سونرا خالقا بله بئر مثلی نقل اتمه‌یه باشلادی: «بئر آدام اوزوم باغی اکدی و باغی باغبانلارا ائجاره‌یه ورئب، اوزون بئر مودّت اوچون اؤزگه بئر مملکته گتدی. 10محصول زامانی باغبانلارین یانینا بئر قول گؤندَ‌ردی کی، باغین محصولوندان اونون پایینی ورسئنلر. لاکئن باغبانلار قولو دؤیوب الی-بوش یوللادیلار. 11داها آیری بئر قول گؤندَ‌ردی؛ آمّا اونلار بونو دا دؤیوب حؤرمتسئز اتدئلر و الی-بوش قایتاردیلار. 12اوچونجو قولو دا گؤندَ‌ردی؛ آمّا اونلار اونو دا یارالاییب قوودولار. 13او زامان اوزوم باغین صاحئبی ددی: ”نه ادئم؟ قوی اؤز سوگئلی اوغلومو گؤندَ‌رئم. بلکه اونو گؤرنده حؤرمت اِدَرلر.“
14لاکئن باغبانلار اونو گؤرن واخت، آرالاریندا بله ددئلر: ”وارئث بودور! گلئن اونو اؤلدورَک کی، مئراث بئزه قالسین.“ 15و اونو باغدان اشئیه آتیب اؤلدوردولر. ائندی اوزوم باغینین صاحئبی اونلارا نه اده‌جک؟ 16گله‌جک، بو باغبانلاری هلاک ادئب، باغی اؤزگه باغبانلارا وره‌جکدئر.»
بونو اشئدن خالق ددی: «قوی بله اصلا باش ورمه‌سئن.»
17عئسا اونلارا باخیب ددی: «بس بو یازی نه دمکدئر؟
”بنّالارین ردّ اتدئکلری داش کونجون باشی اولدو.“#20:17 مزمور ۱۱۸:۲۲
18بو داشین اوستونه ییخیلان هر کس پارچالاناجاق، لاکئن او، کئمئن اوستونه دوشسه، اونو ازه‌جک.»
19دئن عالئملری و باش کاهئنلر بئر یول آختاردیلار کی، اله او آندا اونو توتسونلار. لاکئن خالقدان قورخدولار، چونکی باشا دوشدولر کی، بو مثلی اونلارین باره‌سئنده دیئب.
قیصره باج ورمک
(متّا 22:15-22، مرقوس 12:13-17)
20اونلار عئسانی گودوب اؤزلرئنی صالح آداملار کئمی گؤرسه‌دن بئر نچه جاسوس گؤندَردئلر کی، اونو سؤز اوسته توتوب، بله‌جه والئنئن حؤکم و ائقتئدارینا تسلئم اتسئنلر. 21اونلار عئسادان سوروشدولار: «اوستاد! بئز بئلئرئک کی، سن دوغرو اولانی دیئب تعلئم ورئرسن و آداملارین آراسیندا فرق قویمورسان. آنجاق تارینین یولونو دوغرولوقلا اؤیرَ‌دئرسن. 22آیا قیصره باج ورمک بئزه جائزدئر یا یوخ؟»
23عئسا اونلارین حئیله‌سئنی باشا دوشوب ددی: 24«منه بئر دئنار گؤرسه‌دئن؛ اونون اوستونده اولان صورت و یازی کئمئندئر؟»
اونلار جاواب وردئلر: «قیصرئن.»
25عئسا اونلارا ددی: «او زامان قیصرئنکئنی قیصره، تارینینکینی تارییا ورئن.»
26اونلار خالقین حوضوروندا عئسانی سؤز اوسته توتا بئلمه‌دئلر و جاوابیندان تعجّوب ادئب سسلرئنی کسدئلر.
قئیامت حاقّیندا سوآل
(متّا 22:23-33، مرقوس 12:18-27)
27اؤلومدن سونرا دئرئلمه اولمادیغینی دئین صادوقئلردن بعضئلری گلئب اوندان سوروشدولار: 28«اوستاد! موسا بئزئم اوچون یازیب کی، اگر بئر آدامین اِولی قارداشی اؤلسه و اونون اوشاغی اولماسا، صاغ قالان قارداش اونون دولونو آلیب، اؤلن قارداشینا نسئل یتئشدئرسئن. 29یدّی قارداش وار ائدی؛ بئرئنجئسی بئر آرواد آلدی و اوشاقسیز اؤلدو. 30ائکئنجئسی او آروادی آلدی و او دا اوشاقسیز اؤلدو. 31اوچونجوسو ده اونو آلدی؛ و بله‌جه یدّئسی ده اوشاقلاری اولماییب اؤلدولر. 32هامیسیندان سونرا آرواد دا اؤلدو. 33بونا گؤره اؤلولر دئرئلنده آرواد اونلاردان هانسینین آروادی اولاجاق؟ چونکی او، یدّئسئنئن ده آروادی اولوب.»
34عئسا جاوابیندا اونلارا ددی: «بو عالمئن ائنسانلاری آرواد آلیرلار، اَره گدئرلر؛ 35لاکئن گله‌جک عالمه یتئشمه‌یه و اؤلولردن دئرئلمه‌یه لایئق ساییلانلار نه اِوله‌نَرلَر، نه ده اَره گِدَرلر. 36آرتیق اؤله ده بئلمزلر، چونکی ملکلر کئمی‌دئرلر و قئیامت اوغوللاری اولدوقلاریندان، اونلار تارینین اوغوللاری‌دیرلار. 37آمّا اؤلولرئن دئرئلدئیئنی موسا دا آلوولانان بوتا حاقّینداکی روایتده گؤرسه‌دئر، او زامان کی، ربّی ائبراهئمئن تاریسی، ائسحاقین تاریسی، و یعقوبون تاریسی چاغیریر.#20:37 چیخیش ۳:۶ 38تاری اؤلولرئن تاریسی یوخ، دئرئلرئن تاریسی‌دیر. چونکی اونون یانیندا هامی دئری‌دئر.»
39دئن عالئملرئنئن بعضئسی ددئلر: «اوستاد! گؤزل ددئن.» 40و داها اوندان بئر شی سوروشماغا جورعت اتمه‌دئلر. 41لاکئن عئسا اونلارا ددی: «نجه دیئرلر کی، مسئح داوودون اوغلودور؟ 42حال بو کی، داوود اؤزو، مزمورلار کئتابیندا بله دیئر:
رب منئم ربّئمه ددی:
صاغیمدا اوتور،
43او زاماناجاق کی،
من دوشمنلرئنی آیاقلارینین آلتینا قویوم.#20:43 مزمور ۱۱۰:۱
44داوود اونو رب چاغیردیغینا گؤره، او، نجه داوودون اوغلو اولور؟!»
45بوتون خالق بو سؤزلره قولاق آسان واخت، عئسا اؤز شاگئردلرئنه ددی: 46«او دئن عالئملرئندن اؤزونوزو گؤزله‌یئن کی، اوزون پالتارلاردا گزمه‌یی، میدانلاردا سالام آلماغی، کنئسه‌لرده باش کورسولری و ضئیافتلرده یوخاری یرلرده اوتورماغی سوئرلر. 47اونلار دول آروادلارین اِولرئنی اودورلار و رئیاکارلیقلا اوزون-اوزون دوعالار ادئرلر. بو آداملارین جزاسی داها دا آغیر اولاجاق.»
Currently Selected:
لوقا 20: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
