لوقا 19
19
عئسی و زکّا
1عئسا ارئحایا گئرئب اونون ائچئندن کچئردی. 2اورادا زکّا آدلی بئر کئشی وار ائدی. زکّا باج ییغانلارین ریئسی و وارلی بئر آدام ائدی. 3عئسانین کئم اولدوغونو گؤرمک ائسته‌یئردی؛ لاکئن بویو قیسا اولدوغو اوچون جاماعاتین چوخلوغوندان گؤره بئلمئردی. 4زکّا عئسانی گؤرمک اوچون ائره‌لئیه قاچیب بئر انجئر آغاجینا چیخدی، چونکی عئسا اورادان کچه‌جک ائدی. 5عئسا او یره چاتاندا یوخاری باخیب اونو گؤردو و اونا ددی: «زکّا! تز آشاغی دوش، چونکی بو گون من سنئن اِوئنده قالمالی‌یام.» 6زکّا تز آشاغی دوشوب شادلیقلا عئسانی قبول اتدی. 7بونو گؤرنلرئن هامیسی دیئنئب دیئردئلر: «گدئب گوناهکار بئر آدامین اِوئنده قوناق اولوب!»
8آمّا زکّا آیاغا قالخیب ربّه ددی: «باخ، آغا! وار-دؤولتئمئن یاریسینی مؤحتاجلارا وره‌رم و کئمدن حاقسیزلیقلا آلمیشام، اونا دؤرد قات قایتارارام.»
9عئسا اونا ددی: «بو گون بو اِوه نئجات گلئب، اونا گؤره کی، بو آدام دا ائبراهئمئن اوغلودور. 10چونکی ائنسان اوغلو گلئب کی، ائتمئش اولانلاری آختاریب اونلارا نئجات ورسئن.»
اون قنطارین مثلی
(متّا 25:14-30)
11اونلار بو شیلری اشئدن واخت، عئسا بئر مثل ده علاوه اتدی؛ او سببدن کی، اورشلئمه یاخین ائدی و اونلار اله دوشونوردولر کی، تارینین پادشاهلیغی او ساعات ظاهئر اولاجاق. 12ددی: «اصئلزاده بئر آدام اوزاق مملکته گتدی کی، اؤزو اوچون پادشاهلیق اله گتئرئب قاییتسین. 13بله‌جه قوللاریندان اون نفرئنی چاغیردی و اونلارا اون چکی#19:13 اصل یونانی متنده «مئنا» گلئب. هر مئنا بئر فحله‌نئن اوچ آیلیق اوجرَتی ائدی. پول ورئب ددی: ”من گلنه کئمی بونلاری ائشه سالین.“ 14لاکئن اونون هموطنلری اوندان نئفرت ادئردئلر و اونون دالینجا الچئلر گؤندَ‌رئب ددئلر: ”ائسته‌مئرئک کی، بو آدام بئزه پادشاهلیق اتسئن.“
15آدام، پادشاهلیغی اله گتئرئب قاییداندان سونرا، پول وردئیی قوللاری یانینا چاغیرتدی کی، کئمئن نه قازاندیغینی بئلسئن. 16بئرئنجئسی گلئب ددی: ”آغا، سنئن چکئن داها اون چکی قازانیب.“
17آدام اونا ددی: ”آفرئن، یاخشی قولوم! لاپ کئچئک بئر ائشده صادئق اولدوغون اوچون اون شهره حاکئم اول.“
18ائکئنجئسی گلئب ددی: ”آغا! سنئن چکئن داها بش چکی گتئرئب.“
19بونا دا ددی: ”سن ده بش شهره حاکئم اول.“
20و او بئری ده گلئب ددی: ”آغا بو دا سنئن چکئن، اونو دسمالا بوکوب ساخلادیم، 21چونکی برک آدام اولدوغون اوچون سندن قورخوردوم؛ اؤزون قویمادیغینی گؤتورنسن و اؤزون اکمه‌دئیئنی بئچنسن.“
22آغاسی اونا ددی: ”ای پئس قول! سنی اؤز سؤزونله محکوم اده‌جه‌یم. سن بئلئردئن کی، من برک آدامام، اؤزوم قویمادیغیمی گؤتوره‌نم، اؤزوم اکمه‌دئیئمی بئچه‌نم 23بس نه اوچون منئم پولومو صرّافلارا ورمه‌دئن کی، قاییتدیغیم زامان اونو منفعتله گری آلیم؟!“ 24و اورادا اولانلارا بویوردو: ”چکئسئنی اوندان آلین و اون چکئسی اولانا ورئن!“
25اونلار اونا ددئلر: ”آغا! اونون آرتیق اون چکئسی وار!“
26”سئزه دیئرم کی، کئمده وارسا، اونا داها چوخ ورئله‌جک، لاکئن کئمده یوخسا، الئنده اولان دا اوندان آلیناجاقدیر. 27منئم اوستلرئنده پادشاه اولماماغیمی ائسته‌ین دوشمنلرئمی گتئرئن و گؤزومون قاباغیندا قیلینجدان کچئردئن!“»
عئسانین اورشلئمه گئرئشی
(متّا 21:1-11، مرقوس 11:1-11، یوحنّا 12:12-19)
28عئسا، بونلاری دئیندن سونرا، قاباقدا یرئیئب اورشلئمه طرف گتدی.
29زیتون داغی آدلانان داغین اَته‌یئنده‌کی بیت فاجی و بیت عنیایا یاخینلاشاندا شاگئردلرئندن ائکئسئنی گؤندَ‌رئب، 30ددی: «قاباقدا اولان کنده گدئن. اورایا گئردئیئنئز زامان باغلانمیش بئر سیپا تاپارسینیز کی، ائندئیه کئمی هچ کس اونا مئنمه‌یئب. اونو آچیب گتئرئن. 31اگر کئمسه سئزدن سوروشسا کی، ”نه اوچون سیپانی آچیرسینیز؟“، اونا بله دیئن: ”ربّئن#19:31 و یا «آغانین» بونا احتئیاجی وار.“»
32گؤندَ‌رئلن‌لر گدئب هر شیی عئسانین ددئیی کئمی تاپدیلار. 33سیپانی آچان واخت، اونون صاحئبلری اونلارا ددئلر: «سیپانی نه اوچون آچیرسینیز؟»
34شاگئردلر جاواب وردئلر: «بو سیپا ربّه لازیمدیر.»
35سیپانی عئسانین یانینا گتئردئلر و پالتارلارینی سیپانین بلئنه سرئب عئسانی اونا مئندئردئلر. 36و عئسا یولدا گدنده، آداملار پالتارلارینی یولا سرئردئلر.
37زیتون داغینین اَته‌یئنه یاخینلاشاندا شاگئردلرئندن چوخلاری گؤردوکلری بوتون مؤجوزه‌لر اوچون سوئنئب، گور سسله تارییا حمد و ثنا اتمه‌یه باشلادیلار. 38دیئردئلر: «ربّئن آدیندا گلن پادشاه موبارک اولسون. گؤیلرده امئن-آمانلیق و لاپ اوجالاردا عئزّت اولسون.»#19:38 مزمور ۱۱۸:۲۶
39فرئسئلردن بعضئسی خالقین ائچئندن اونا ددئلر: «اوستاد، شاگئردلرئنه بئر آجیقلان.»
40عئسا جاوابیندا اونلارا ددی: «سئزه دیئرم کی، اگر اونلار ساکئت اولسالار، داشلار دئله گله‌جکلر.»
عئسا اورشلئم اوچون آغلاییر
41شهره یاخینلاشدیغی زامان عئسا اونا باخیب شهر اوچون آغلادی. 42و ددی: «آه، کاشکی سن بو گونونده امئن-آمانلیغینا باعئث اولان شیلری بئلسه‌یدئن! آمّا بونلار حله‌لئک سنئن گؤزلرئندن گئزلی‌دئر. 43چونکی سنی اله گونلر گؤزله‌یئر کی، دوشمنلرئن سنی سنگرلر‌له احاطه ادئب، موحاصئره‌یه آلاجاقلار و هر یردن سیخیشدیراجاقلار. 44سنی و ائچئنده‌کی اوشاقلارینی یرله بئر اده‌جکلر، سنئن ائچئنده داشی داش اوسته قویمایاجاقلار، چونکی تارینین سنئن کؤمه‌یئنه گلدئیی زامانی درک اتمه‌دئن.»
عئسا آلیش-ورئش ادنلری معبددن قووور
(متّا 21:12-17، مرقوس 11:15-19، یوحنّا 2:12-22)
45عئسا معبده گئرئب اورادا آلیش-ورئش ادنلری قووماغا باشلادی. 46و اونلارا ددی: «یازیلیب کی، منئم اِوئم دوعا اِوی‌دئر. آمّا سئز اونو اوغرولار یوواسینا دؤندَ‌رئبسئنئز.»
47عئسا هر گون معبدده تعلئم ورئردی. باش کاهئنلر، دئن عالئملری، و خالقین اعیانلاری اونو هلاک اتمه‌یه فورصت آختاریردیلار. 48لاکئن نه اده‌جکلرئنی بئلمئردئلر. چونکی بوتون خالق ائشتئیاقلا اونا قولاق آسیردی.
Currently Selected:
لوقا 19: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
