یارادیلیش 30
30
1راحئل یعقوبا اوشاق دوغمادیغینی گؤرنده باجیسینا پاخیلّیق اتدی و یعقوبا ددی: «منه اوشاق ور، یوخسا اؤله‌رم.» 2یعقوبون راحئله قضبی آلوولاندی و ددی: «مگر من سنئن بطنئنه ثمره ورمه‌ین تارییام؟» 3راحئل ددی: «باخ، بو کنئزئم بئلحا! اونونلا یاخینلیق ات کی، دئزلرئمئن اوستونه بئر اوشاق دوغسون و اوندان بئر عایئلَم اولسون.» 4راحئل کنئزی بئلحا‌نی اونا وردی کی، آروادی اولسون و یعقوب اونون یانینا گئردی. 5بئلحا بویلو اولوب یعقوبا بئر اوغول دوغدو. 6راحئل ددی: «تاری منی حاقلی چیخارتدی و سسئمی اشئدئب منه بئر اوغول وردی.» بونا گؤره ده اونون آدینی دان #30:6 «دان» - عئبرانی دئلئنده «حاقلی چیخارتدی» قویدو. 7راحئلئن کنئزی بئلحا گئنه بویلو اولوب یعقوبا ائکئنجی اوغول دوغدو. 8راحئل ددی: «باجیملا گوجلو موبارئزه‌یه گئرئشئب اونا قالئب گلدئم.» او، اوشاغین آدینی نَفتالی#30:8 «نفتالی» آدینین سسی «داعوا» سؤزونون سسئنه چوخ اوخشاییر. قویدو.
9لئیه داها دوغمادیغینی گؤرنده، کنئزی زئلپانی گؤتوروب یعقوبا وردی کی، آروادی اولسون. 10لئیه‌نئن کنئزی زئلپا یعقوبا بئر اوغول دوغدو. 11لئیه «اوغور قازاندیم» دیئب اونون آدینی جاد#30:11 «جاد» - عئبرانی دئلئنده «اوغور» قویدو. 12لئیه‌نئن کنئزی زئلپا یعقوبا ائکئنجی اوغول دوغدو. 13لئیه ددی: «خوشبختم، چونکی آروادلار منی بختور سایاجاقلار.» او، اوشاغین آدینی آشِر قویدو.
14رِعوبئن بوغدا بئچئنی واختی گدئب زمئده محبّت اوتلاری تاپدی و اونلاری آناسی لئیه‌یه گتئردی. راحئل لئیه‌یه ددی: «خاهئش ادئرم، اوغلونون محبّت اوتلاریندان منه ده ور.» 15لئیه اونا ددی: «اَرئمی الئمدن آلدیغین بس دیئل؟ ائندی ده ائسته‌یئرسن کی، اوغلومون محبّت اوتلارینی آلاسان؟» راحئل ددی: «اگر اِله‌دئر، قوی اَرئم اوغلونون محبّت اوتلارینین عوضئنده بو گجه سنئنله یاتسین.» 16یعقوب آخشام چؤلدن گلنده، لئیه اونون پئشوازینا چیخیب ددی: «منئم یانیما گئر، چونکی سنی اوغلومون محبّت اوتلاری ائله ساتین آلمیشام.» یعقوب او گجه اونونلا یاتدی. 17تاری لئیه‌نی اشئتدی و او بویلو اولوب یعقوبا بشئنجی اوغلونو دوغدو. 18لئیه ددی: «تاری حاقّیمی وردی، چونکی کنئزئمی اَرئمه وردئم.» او، اوشاغین آدینی یئسّاکار#30:18 «یئسّاکار» - عئبرانی دئلئنده «حاق ورئلسئن» قویدو. 19لئیه گئنه بویلو اولوب یعقوبا آلتینجی اوغلونو دوغدو. 20او ددی: «تاری منه یاخشی بئر هدئیّه وردی، بو دفه اَرئم منه دَیَر وِرَر، چونکی اونا آلتی اوغول دوغدوم.» او، اوشاغین آدینی زِبولون#30:20 «زِبولون» - عئبرانی دئلئنده «دَیَر» قویدو. 21سونرا بئر قیز دوغوب، آدینی دئنا قویدو.
22تاری راحئلی یادا سالیب اونو دا اشئتدی و بطنئنی آچدی. 23او بویلو اولوب بئر اوغول دوغدو و ددی: «تاری خجالتئمی گؤتوردو.» 24او «رب منه بئر اوغول دا آرتیرسین» دیئب، اوشاغین آدینی یوسئف#30:24 «یوسئف» - عئبرانی دئلئنده «آرتیرسین» قویدو.
یعقوبون سورولره صاحئب اولماسی
25راحئل یوسئفی دوغاندان سونرا، یعقوب لابانا ددی: «منی گؤندَر، اؤز اِوئمه و اؤلکه‌مه گدئم. 26آروادلاریمی و اوشاقلاریمی دا کی، اونلارین عوضئنده سنه خئدمت اتمئشم، ور، گِدئم. چونکی سنه نجه خئدمت اتدئیئمی بئلئرسن.» 27لابان اونا ددی: «اگر ائندی سنئن گؤزونده لوطف تاپمیشام، یانیمدا قال، چونکی فالدان آنلادیم کی، سنه گؤره رب منه برکت ورئب.» 28سونرا ددی: «حاقّینی منه تعیئن ات، ورئم.» 29یعقوب اونا ددی: «بئلئرسن کی، سنه نجه خئدمت اتمئشم و منئمله اولان سورولرئنی نجه ساخلامیشام. 30چونکی من گلمه‌مئشدن قاباق سنئن مالین آز ائدی، آمّا سونرا چوخ چوخالدی؛ رب منئم گلئشئمله سنه برکت وردی. بس من اؤز عایئلَم اوچون نه واخت چالیشاجاغام؟» 31لابان ددی: «سنه نه ورئم؟» یعقوب ددی: «منه هچ نه ورمه. اگر آنجاق بو بئر شیی منه اده‌سن، گئنه سنئن سورونو قورویوب اونا باخارام: 32قوی بو گون سنئن بوتون سورولرئنئن ائچئندن کچئب، قویونلار آراسیندان هر خاللی، زولاقلی قویونو و قارا قوزونو، کِچئلر آراسیندان هر زولاقلی و خاللی کِچئنی آییریم؛ حاقّیم دا بو اولسون. 33بوندان سونرا قاباغیندا اولان حاقّیم اوچون گلدئکده دوزلویوم منئم باره‌مده شهادت وره‌جک. قوی کِچئلردن خاللی و زولاقلی اولمایانی، قوزولاردان دا قارا اولمایانی اوغورلانمیش ساییلسین.» 34لابان ددی: «یاخشی، قوی ددئیئن کئمی اولسون.» 35آمّا او بو گون آلابَزَک و زولاقلی اِرکَک کِچئلری، بوتون خاللی و زولاقلی دئشی کِچئلری، آغ کِچئلری و بوتون قارا قوزولاری آییریب اوغوللارینین ائختئیارینا وردی. 36سونرا اؤزو یعقوبدان اوچ گونلوک یول قدر اوزاقلاشدی. آمّا یعقوب لابانین قالان سوروسونو اوتاریردی.
37یعقوب سپئدار، بادام و چئنار آغاجیندان تزه چوبوقلار گؤتوردو و چوبوقلارین قابیغینی سویوب اونلاری او قدر آچدی کی، آغ رنگلی ائچی اوزه چیخسین. 38سونرا قابیغینی سویدوغو چوبوقلاری سورولرئن سو ائچمَک اوچون گلدئکلری تَکنه‌لره، حیوانلارین قاباغینا قویدو. اونلار گلئب سو ائچَنده جوفتلَشئردئلر. 39بله‌جه حیوانلار چوبوقلارین قاباغیندا جوفتلَشئردئلر و سورولرده آلابَزَک، خاللی و زولاقلی حیوانلار دوغولوردو. 40یعقوب قوزولاری آییردی و سورونون اوزونو لابانین سوروسونده اولان بوتون آلابَزَک و قارا حیوانلارا طرف توتوردو. او اؤز سوروسونو آیریجا قویدو و اونلاری لابانین سوروسونه قاتمادی. 41هر دفه سورونون قووّتلی حیوانلاری جوفتلَشَنده یعقوب تَکنه‌لره، سورونون گؤزلری قاباغینا چوبوقلار قویوردو کی، چوبوقلار آراسیندا جوفتلَنسئنلر. 42لاکئن حیوانلار ضعئف اولاندا اونلاری قویمازدی. بله‌جه ضعئف حیوانلار لابانین، قووّتلی حیوانلار دا یعقوبون اولدو. 43یعقوب چوخ وارلاندی: اونون چوخلو سوروسو، کنئزی، قولو، دوه‌سی و اِششه‌یی اولدو.
Currently Selected:
یارادیلیش 30: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
