یارادیلیش 31
31
یعقوبون لاباندان قاچماسی
1یعقوب اشئتدی کی، لابانین اوغوللاری بو سؤزلری دیئرلر: «یعقوب آتامیزین مالئک اولدوغو هر شیه صاحئب اولدو، بوتون بو وار-دؤولتی آتامیزین واریندان اَله گتئردی.» 2یعقوب لابانین اونا اولان رفتارینی گؤردو، باخ، او دا یعقوبلا اَوّلکی کئمی رفتار اتمئردی. 3رب یعقوبا ددی: «آتالارینین اؤلکه‌سئنه، اؤز قوحوملارینین یانینا قاییت. من سنئنله اولاجاغام.» 4یعقوب خبر گؤندَ‌رئب راحئلی و لئیه‌نی چؤله، سوروسونو اوتاردیغی یره چاغیردی. 5یعقوب اونلارا ددی: «من آتانیزین رفتارینی گؤرورَم کی، منئمله اَوّلکی کئمی رفتار اتمئر. لاکئن آتامین تاریسی منئمله‌دئر. 6سئز بئلئرسئنئز کی، بوتون وار گوجومله آتانیزا خئدمت اتمئشم. 7آتانیز منی آلداتدی و حاقّیمی اون دفه دیئشدئردی، آمّا تاری اونو قویمادی کی، منه پئسلئک اتسئن. 8او، ”خاللی حیوانلار سنئن حاقّین اولاجاق“ دئیَنده، بوتون سوروده خاللی حیوانلار دوغولدو. ”آلابَزَک حیوانلار سنئن حاقّین اولاجاق“ دئیَنده ده، بوتون سوروده آلابَزَک حیوانلار دوغولدو. 9بله‌جه تاری آتانیزین سوروسونو آلیب منه وردی.
10سورونون جوتلَشدئیی واخت، یوخودا گؤزلرئمی آچیب گؤردوم کی، جوتلَشَن اِرکَک کِچئلر آلابَزَک، خاللی و لکه‌لی‌دئر. 11یوخودا تارینین مله‌یی منه ددی: ”یعقوب!“ جاواب وردئم: ”من بورادایام!“ 12او ددی: ”ائندی باخ! گؤزلرئنی قالدیریب گؤر کی، جوتلَشَن بوتون اِرکَک کِچئلر آلابَزَک، خاللی و لَکه‌لی‌دئر، چونکی لابانین سنه اتدئیی هر شیی گؤردوم. 13من بِیت‌ائلئن تاریسی‌یام؛ اورادا کی بئر سوتون مسح اتدئن و منه نذر اتدئن. ائندی قالخ و بو تورپاقدان گت و دوغولدوغون اؤلکه‌یه قاییت.“»
14راحئل و لئیه اونا جاواب وردئلر: «مگر آتامیزین مولکونده بئر پاییمیز یا مئراثیمیز وار؟ 15مگر او بئزی اؤزگه حساب اتمئر؟ آخی او بئزی ساتیب، بئزئم اوچون ورئلمئش پولو دا خَرجله‌دی. 16بونا گؤره ده تارینین آتامیزدان آلدیغی بوتون او وار-دؤولت، بئزئم و اوشاقلاریمیزیندیر. ائندی سن ده تارینین ددئیی شیلرئن هامیسینا عمل ات.»
17اوندا یعقوب قالخیب اوشاقلار و آروادلارینی دوه‌لره مئندئردی. 18بوتون سوروسونو، قازاندیغی بوتون وار-دؤولتئنی، پَدّان‌اَرامدا اَله گتئردئیی اؤز سوروسونو سوردو کی، کَنَعان تورپاغینا، آتاسی ائسحاقین یانینا گتسئن. 19لابان قویونلارینی قیرخماغا گدنده، راحئل آتاسینین اِو بوتلرئنی اوغورلادی. 20یعقوب قاچدیغینی بئلدئرمه‌مکله اَراملی لابانی آلداتدی. 21بله‌جه مالئک اولدوغو هر شیی گؤتوروب قاچدی. او، فرات چایینی کچئب، گئلعادین داغلیق بؤلگه‌سئنه طرف گتدی.
لابانین یعقوبو تعقئب اتمه‌سی
22یعقوبون قاچدیغی لابانا اوچونجو گون بئلدئرئلدی. 23او، قوحوملارینی اؤزو ائله گؤتوروب، یدّی گون اونو تعقئب اتدی و گئلعادین داغلیق بؤلگه‌سئنده یعقوبا چاتدی. 24تاری گجه یوخوسوندا اَراملی لابانا گؤرونوب ددی: «اؤزونو گؤزله، یعقوبا نه یاخشی، نه ده پئس سؤز دِه.»
25لابان یعقوبا چاتدی. یعقوب داغلیق بؤلگه‌سئنده چادیر قورموشدو. لابان قوحوملاری ائله بئرلئکده گئلعاد داغیندا چادیر قوردو. 26لابان یعقوبا ددی: «نئیه بله اتدئن؟ نئیه منی آلداتدین و قیزلاریمی موحارئبه اسئرلری کئمی آپاردین؟ 27نه اوچون گئزلئجه قاچیب منی آلداتدین؟ منه بونو بئلدئرمه‌دئن کی، سنی سِوئنجله، ماهنی اوخوماقلا، دف و طنبور چالماقلا یولا سالیم. 28قویمادین کی، نوه‌لرئمله قیزلاریمی اؤپوم؛ آغیلسیزجاسینا رفتار ادئبسن. 29سئزه پئسلئک اده بئلَردئم، لاکئن آتانیزین تاریسی دونَن گجه منه بله ددی: ”اؤزونو گؤزله، یعقوبا نه یاخشی، نه ده پئس سؤز دِه.“ 30ائندی آتانین اِوی اوچون چوخ داریخدیغینا گؤره چیخیب گدئرسن. بس بوت آللاهلاریمی نئیه اوغورلاییب آپاریرسان؟» 31یعقوب لابانا جاواب وردی: «قورخوب دوشوندوم کی، قیزلارینی زورلا مندن آلارسان. 32آمّا بوت آللاهلارینی کئمئن یانیندا تاپاسان، او، صاغ قالمایاجاق. قوحوملاریمیزین قاباغیندا منئم اولان شیلرئن آراسیندا هانسی سنئندئر، گؤرسد و اؤزونه گؤتور.» آنجاق یعقوب راحئلئن اونلاری اوغورلادیغینی بئلمئردی.
33لابان یعقوبون، لئیه‌نئن و ائکی کنئزئن چادیرینا گئردی، آمّا بوت آللاهلاری تاپمادی. او، لئیه‌نئن چادیریندان چیخیب، راحئلئن چادیرینا گئردی. 34راحئل اِو بوتلرئنی گؤتورموشدو و دوه‌نئن یَهَرئنه قویوب اونلارین اوستونده اوتورموشدو. لابان بوتون چادیری گَزدی، آمّا اونلاری تاپمادی. 35راحئل آتاسینا ددی: «حوضوروندا قالخا بئلمه‌دئیئم اوچون قوی آغام قضبلنمه‌سئن، چونکی آیباشی عادتئنده‌یم.» لابان آختاردی، آمّا اِو بوتلرئنی تاپمادی.
36یعقوب قضبله‌نئب لابانلا موباحئثه اتدی. او، لابانا ددی: «گوناهیم و تقصئرئم نه‌دئر کی، منی بله تعقئب ادئرسن؟ 37بوتون شیلرئمی گزدئن، بوتون اِو شیلرئندن نه تاپدین؟ تاپدیغین شیی منئم قوحوملاریمین و اؤز قوحوملارینین قاباغینا قوی کی، ائکئمئزئن آراسیندا حؤکم اتسئنلر. 38کچن ائیئرمی ائل سنئن یانیندا ائشله‌دئم، قویونلارین و کِچئلرئن هچ بالاسی دوشمه‌دی، سورولرئنده‌کی قوچلارینی یمه‌دئم. 39وحشی حیوانلارین پارچالادیغی حیوانی سنئن یانینا گتئرمزدئم، ضررئنی اؤزوم چکَردئم. ائستر گوندوز، ائستر گجه اوغورلانان هر حیوانی مندن طلب ادردئن. 40گوندوزون ائستئسی، گجه‌نئن سویوغو منی اَلدن سالاردی، یوخوم گؤزومدن تؤکولردی. 41بو ائیئرمی ائل سنئن اِوئنده قالمیشدیم: ائکی قیزین اوچون اون دؤرد ائل و سورون اوچون آلتی ائل سنه خئدمت اتدئم. آمّا سن اون دفه حاقّیمی دیئشدئردئن. 42اگر آتامین و ائبراهئمئن تاریسی، ائسحاقین سئتایئش اتدئیی تاری منئمله اولماسایدی، ائندی یقئن منی اَلی‌بوش یولا سالاردین. تاری عذابیمی و اَلئمئن زحمتئنی گؤردو، دونَن گجه سنی توبئخ اتدی.» 43لابان یعقوبا بله جاواب وردی: «قیزلار منئم قیزلاریم، اوشاقلار منئم اوشاقلاریم، سورولر منئم سورولرئم و سنئن گؤردویون هر شی منئمدئر. بو گون قیزلاریما و یا اونلارین دوغدوغو اوشاقلارا نه اده بئله‌رم؟ 44ائندی گل بئربئرئمئز؛ من و سن عهد ادک کی، منئمله سنئن آراندا شاهئد اولسون.» 45یعقوب بئر داش گؤتوروب سوتون کئمی قویدو. 46اورادا اؤز قوحوملارینا ددی: «داش ییغین.» اونلار داشلاری گؤتوروب بئر قالاق دوزَلتدئلر و او قالاغین یانیندا یمک یدئلر. 47لابان اونون آدینی یِگَر‌ساحه‌دوتا#31:47 «یِگَر‌ساحه‌دوتا» - آرامی دئلئنده «شهادت داش قالاغی» قویدو، لاکئن یعقوب اونون آدینی قَلعِد#31:47 «قَلعِد» - عئبرانی دئلئنده ده «شهادت داش قالاغی.» قویدو. 48لابان ددی: «بو قالاق بو گون منئمله سنئن آراندا شاهئددئر». بونا گؤره ده اونون آدی قَلعِددئر. 49اونا هم ده مئصپا#31:49 «مئصپا» - عئبرانی دئلئنده «گؤزَتچی بورجو» دیئلدی، چونکی لابان ددی: «بئربئرئمئزدن آیریلان زامان قوی رب سنئنله منئم آرامدا گؤزتچی اولسون. 50اگر قیزلاریمی ائنجئده‌سن و یا اونلارین اوستونه آرواد آلاسان، بئل کی، بئزئم آرامیزدا بئر نفر شاهئد اولماسا دا، تاری آرامیزدا شاهئددئر.» 51لابان گئنه یعقوبا ددی: «باخ بو دا اؤز آرامیزدا دوزَلتدئیئم قالاق و سوتون! 52بو قالاق و سوتون شاهئد اولسون کی، نه من سنئن طرفئنه-قالاغین او تایینا گده‌جیم، نه ده سن پئسلئک اتمک اوچون منئم طرفئمه-قالاغین و سوتونون بو تایینا گله‌جکسن. 53قوی ائبراهئمئن، ناخورون و اونلارین آتاسینین تاریسی آرامیزدا حؤکم اتسئن!» یعقوب آتاسی ائسحاقین سئتایئش اتدئیی تارییا آند ائچدی. 54سونرا یعقوب او داغدا قوربان کسدی و قوحوملارینی یمیه چاغیردی. اونلار یدئلر و داغدا گجه‌نی قالدیلار. 55لابان سحر تزدن قالخیب نوه‌لرئنی و قیزلارینی اؤپدو، اونلارا برکت وردی. سونرا اؤز یرئنه گتدی.
Currently Selected:
یارادیلیش 31: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
