چیخیش 23
23
صالحلئک و وئجدان
1«یالان خبر گزدئرمهیئن. یالانچی شاهئد اولماق اوچون، حاقسیز آداملا اَلبئر اولمایین. 2شر ائش گؤرن قالابالیغا قوشولمایین. محکمهده چوخلاری ائله بئرلَشهرَک عدالتئن قاباغینی آلماق اوچون یالانچی شاهئد اولمایین. 3کاسیبا دا محکمهده طرفدارلیق اتمه.
4اگر دوشمنئنئن آزمیش اؤکوزونه و یا اِششهیئنه راست گلهسن، صاحئبئنه قایتارمالیسان. 5سندن نئفرت ادن آدامین اِششهیئنی، یوکو آلتیندا ییخیلمیش حالدا گؤرنده، اونو ترک اتمه؛ اونا کؤمک ات کی، بو یوکدن آزاد اولسون. 6مؤحتاج اولان آدامین محکمه ائشئنده، اونون ضئدّئنه عدالتی تحرئف اتمه. 7یالان ائشدن اوزاق اول. معصوم و یا صالح آدامی دا اؤلومه ورمه. چونکی من خاطاکار آداما بَرائت قازاندیرمایاجاغام. 8روشوت آلما، چونکی روشوت گؤزو آچیقلاری کور ادر، صالحلرئن سؤزلرئنی ده تحرئف ادر. 9قرئب آداما ظولم اتمه، سئز اؤزونوز قرئب آدامین نه حئسّ اتدئیئنی بئلئرسئنئز، چونکی سئز اؤزونوز ده مئصئر اؤلکهسئنده قرئب ائدئنئز.
ائستئراحت واختلاری و بایراملار
10آلتی ائل تورپاغینیزی اَکئن و محصولونو ییغین؛ 11یدّئنجی ائل اونا اَل دَیمهیئن کی، خالقینیزدان اولان مؤحتاجلار اورادان یسئنلر. اونلاردان آرتیق قالانی دا وحشی حیوانلار یسئنلر. اوزوم و زیتون باغلارینیزدا دا بله ادئن. 12آلتی گون ائشلرئنئزی گؤرون، آمّا یدّئنجی گونده ائستئراحت ادئن کی، اؤکوزونوز و اِششهیئنئز راحاتلانسین، کنئزئنئن اوغلو، نؤکرلر و قرئبلر ده دئنجَلسئنلر. 13منئم سئزه ددئیئم هر شیی رئعایت ادئن. آیری آللاهلارین آدینی چکمهیئن، قوی او آدلار سئزئن آغزینیزدان اشئدئلمهسئن.
14منه ائلده اوچ دفه بایرام ادئن: 15مایاسیز چؤرک بایرامینی توتون. من سئزه امر اتدئیئم کئمی، آبئب آییندا تعیئن اولونان واخت یدّی گون مایاسیز چؤرک ییئن. چونکی مئصئردن او آیدا چیخدینیز. هچ کس حوضوروما اَلیبوش گلمهسئن. 16زمئدهکی اَکئن ائشئنئزئن نوباری ائله بئچئن بایرامینی توتون. ائلئن آخیریندا ائشئنئزئن بوتون محصولونو زمئدن ییغیب، ییغیم بایرامینی توتون. 17ائلده اوچ دفه سئزئن بوتون اِرکَک آداملارینیز رب پروردئگارین حوضورونا گلسئنلر.
18منه گتئردئیئنئز قوربانین قانینی مایالی چؤرکله تقدئم اتمهیئن. بایرام قوربانیمین پئیی سحره قدر قالماسین. 19تورپاغین نوبارینین ائلک حئصّهسئنی تارینیز ربّئن معبدئنه گتئرئن. کچی بالاسینی، آناسینین سودونده پئشئرمهیئن.
وعده و نصئحتلر
20باخ، من یولدا، سنئن قاباغیندا بئر مَلَک گؤندَرئرم کی، سنی حئفظ ادئب، حاضیرلادیغیم یره سنی گتئرسئن. 21اونون حوضوروندا احتئیاطلی اول و سَسئنه قولاق آس. اونون ضئدّئنه عوصیان قالدیرما، او سئزئن عوصیانینیزی باغیشلاماز، چونکی منئم آدیم اونون اوستوندهدئر. 22اگر اونون سَسئنه حقئقتن قولاق آسیب ددئیئمه عمل ادهسئنئز، اوندا من سئزئن دوشمنلرئنئزه دوشمن، خصملرئنئزه ده، خصم اولاجاغام. 23منئم مَلهیئم قاباغینیزدا گدهجک و سئزی اِمورلولارین، خئتلیلرئن، پِرئزلیلرئن، کَنَعانلیلارین، خئولیلرئن و یِبوسلولارین تورپاغینا گتئرهجک؛ من اونلاری تامامن محو ادهجیم. 24اونلارین آللاهلارینا سجده اتمهیئن، اونلارا عئبادت اتمهیئن و اونلار ادن عمللره، عمل اتمهیئن؛ او آللاهلاری داغیدیب یوخ ادئن، اونلارین موقدّس سوتونلاری تئکه-تئکه اتمهلیسئنئز. 25لاکئن سئز تارینیز ربّه خئدمت ادئن، او دا چؤرهیئنئزه و سویونوزا برکت ورهجک؛ سئزئن آرانیزدان ناخوشلوغو اوزاقلاشدیراجاغام. 26اؤلکهنئزده نه اوشاق سالان اولاجاق، نه ده سونسوز آرواد. عؤمرونوزو ده اوزون ادهجیم.
27اؤز دهشتئمی سئزدن قاباق گؤندَرئرم؛ آرالارینا یِتئشدئیئنئز بوتون خالقلارا قاریشیقلیق سالاجاغام و بوتون دوشمنلرئنئزی دؤنوب سئزدن قاچماسینا باعئث اولاجاغام. 28اِششَکچئبئنئنی#23:28 بو سؤزدن مقصد دهشت و یا بئر جور ناخوشلوق اولا بئلر. ده سئزدن قاباق گؤندَرهجیم کی، خئولیلری، کَنَعانلیلاری و خئتلیلری قاباغینیزدان قووسون. 29لاکئن بئر ائل عرضئنده اونلاری قاباغینیزدان قوومایاجاغام کی، اؤلکه وئرانه قالماسین و وحشی حیوانلار چوخالیب، سئزئن اوستونوزه داراشماسین. 30یاواش-یاواش اونلاری قاباغینیزدان او واختاجاق قوواجاغام کی، سئز نسئل گتئرئب چوخالاراق، اؤلکهنئن صاحئبی اولاسینیز. 31قیرمیزی دهنزدن فئلئسطلیلرئن دهنزئنه قدر، صحرادان فَرات چایینا قدر سرحدلرئنئزی چکهجیم. اؤلکهنئن ساکئنلرئنی سئزئن اَلئنئزه تسلئم ادهجیم، آمّا سئز اونلاری یانینیزدان قووارسینیز. 32نه اونلارلا عهد باغلایین، نه ده آللاهلاری ائله؛ 33قویمایین اونلار اؤلکهنئزده یاشاسینلار کی، باعئث اولسونلار سئز منئم ضئدّئمه گوناه ادئب، اونلارین آللاهلارینا عئبادت ادهسئنئز. بو سئزه تله اولاجاق.»
Currently Selected:
چیخیش 23: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
