چیخیش 24
24
تاری ائله ائسرایئل آراسیندا عهدئن باغلانماسی
1رب موسایا ددی: «سن، هارون، ناداب، ابئهو و ائسرایئل آغساقّاللاریندان یتمئش نفر ربّئن یانینا چیخین. اوزاقدان سجده ادئن. 2سونرا آنجاق سن، ای موسا، ربّئن حوضورونا یاخینلاش؛ او بئرئلری یاخینلاشماسینلار؛ خالق دا بورایا چیخماسین.»
3موسا گلئب ربّئن بوتون سؤزلرئنی و حؤکملرئنی خالقا نقل اتدی. بوتون خالق بئر سَسله جاواب ورئب ددئلر: «ربّئن ددئیی سؤزلرئن هامیسینا عمل ادهجیئک.» 4موسا ربّئن بوتون سؤزلرئنی یازدی. او سحر اِرکَن دوروب داغین اَتهیئنده قوربانگاه و ائسرایئلئن اون ائکی قبئلهسئنه گؤره، اون ائکی سوتون تئکدی. 5سونرا موسا ائسرایئلئن جاوانلارینی گؤندَردی و اونلار ربّه یاندیرما قوربانلاری و باریش قوربانلاری اولاراق گامیشلار کَسدئلر. 6موسا حیوانلارین قانینین یاریسینی گؤتوروب لَیَنلره تؤکدو. قانین او بئری یاریسینی دا قوربانگاهین اوستونه سَپدی. 7او، عهد کئتابینی الئنه آلیب خالقا اوجادان اوخودو و اونلار ددئلر: «ربّئن ددئیی بوتون سؤزلره عمل ادئب قولاق آساجاغیق.» 8سونرا موسا قانی گؤتوروب خالقین اوستونه سَپهرَک ددی: «بوتون بو سؤزلره گؤره، بودور ربّئن سئزئنله کَسدئیی عهدئن قانی!»
9سونرا موسا هارون، ناداب، ابئهو و ائسرایئل آغساقّاللاریندان یتمئش نفرله بئرلئکده چیخدی 10و ائسرایئلئن تاریسینی گؤردولر. اونون آیاقلاری آلتیندا لاجورد داشیندان دؤشهمه کئمی، سَمایین اؤزونه بَنزهر آیدین بئر شی وار ائدی. 11تاری ائسرایئلئن باشچیلارینا الئنی اوزاتمادی؛ اونلار تارینی گؤردولر و ییئب-ائچدئلر.
12رب موسایا ددی: «منئم یانیما داغا چیخ و اورادا دور؛ سنه او داش لؤوحهلری ورهرم کی، اونلارین اؤیرنمهسی اوچون اوستونه قانون و امرلری یازمیشام.» 13موسا خئدمتچئسی یوشَعله قالخدی و موسا تارینین داغینا چیخدی. 14آمّا آغساقّاللارا ددی: «بئز سئزئن یانینیزا گری قاییداناجاق بورادا گؤزلهیئن. باخ، هارون و خور یانینیزدادیر؛ کئمئن نه چتئن ائشی وار، اونلارین یانینا گده بئلر.»
15سونرا موسا داغا چیخدی. بولود داغی بورودو. 16ربّئن عئزّتی سئنا داغینین اوستونده ساکئن اولدو. بولود اونو آلتی گون بورودو. یدّئنجی گونده رب موسانی بولودون ائچئندن چاغیردی. 17ائسرایئل اؤولادلارینین گؤزونده، ربّئن عئزّتئنئن گؤرونوشو داغین باشیندا کوله دؤندَرَن اود کئمی ائدی. 18موسا داغا چیخارکن بولودون ائچئنه گئردی و قیرخ گون-قیرخ گجه داغدا قالدی.
Currently Selected:
چیخیش 24: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
