حوارئلر 26
26
1اَغرئپا پولوسا ددی: «اؤزون حاقّیندا دانیشماغا ائجازن وار.» او زامان پولوس اَلئنی اوزادیب مودافئعه‌سئنی باشلادی:
2«اغرئپا پادشاه! من اوچون بئر سعادتدئر کی، یهودئلر طرفئندن وورولدوغوم بوتون ائتّئهاملارا گؤره بو گون سنئن حوضوروندا اؤزومدن دئفاع ادئرم. 3عَلَلخوصوص کی، سن اؤزون یهودئلرئن بوتون آیئنلر و موباحئثه‌لرئنی بئلئرسن. بونا گؤره ده خاهئش ادئرم کی، منه صبئرله قولاق آساسان. 4بوتون یهودئلر بئلئرلر کی، نجه من جاوانلیغیمدان عؤمرومو خالقیمین ائچئنده و اورشلئمده کچئرتمئشم. 5منی اوّلدن اوزون بئر مودّت تانیدیقلارینا گؤره، اگر ائسته‌سه‌لر، شهادت وره بئلرلر کی، دئنئمئزئن لاپ جئدّی فئرقه‌سی اولان فرئسی فئرقه‌سئنه باغلی یاشامیشام. 6و ائندی تاری طرفئندن آتالاریمیزا ورئلمئش وعده اومئدی اوچون موحاکئمه‌یه چکئلمئشم. 7او وعده کی، بئزئم اون‌ائکی قبئله‌مئز، گجه-گوندوز تارییا صداقتله خئدمت اده‌رک یرئنه یتئشمه‌سئنی گؤزله‌یئرلر. و بو اومئد اوچون ای پادشاه، یهودئلر طرفئندن موتّهئم اولموشام. 8نه اوچون سئز تارینین اؤلولری دئرئلتمه‌سئنی ائنانیلماز بئر شی حساب ادئرسئنئز؟ 9دوغروسو، من اؤزوم ده گومان ادئردئم کی، ناصئره‌لی عئسانین آدینا گرک چوخ عداوتلی ائشلر گؤروم. 10اله اورشلئمده ده بونو ادئردئم. باش کاهئنلردن ائختئیار آلیب موقدّسلردن چوخلارینی زئندانلارا سالدیم، اونلارین اؤلومه ورئلمه‌سئنه ده راضی ائدئم. 11بوتون کنئسه‌لرده اونلاری جزالاندیریب چالیشدیم کی، کوفر دمه‌یه مجبور ادئم. اونلارین ضئدّئنه حددن آرتیق قودوروب، حتّا یاد شهرلرده بله اونلاری تعقئب ادئردئم. 12بو خوصوصدا باش کاهئنلرئن ائختئیار و فرمانی ائله دمشقه گدئردئم. 13گون اورتا واختی، ای پادشاه، یول اوستونده گونون ائشیغیندان داها پارلاق بئر ائشیق منئم و منئمله سفره چیخانلارین اطرافینا ساچدی. 14بئز هامیمیز یره ییخیلدیق و بئر سس اشئتدئم کی، عئبرانی دئلئنده منه دیئر: ”شاعول! شاعول! نه اوچون منه عذاب ورئرسن؟! میخلارا تپئک وورماق سنه چتئندئر.“#26:14 کئتابین اَصل دئلی یونانی‌ده میخ یرئنه «بئز» گلئب. «بئز» باشی تئز بئر تاختا آغاج ائدی کی، اوندان مَرکَبلری سورمَک اوچون ائستئفاده اولونوردو. بو عئبارت بئر مَثَل ائدی و بله بئر مَثَل فارسی دئلئنده «سندانا یومروق وورماق» کئمی بئر مَثَل اولور. پولوس مسئحئلرئن ضئدّئنه قالخارکن، اؤزونه ضرر-زئیان یتئرئردی. 15ددئم: ”سن کئمسن، یارب؟“ رب ده ددی: ”من عذاب وردئیئن عئسایام! 16لاکئن قالخ، آیاغا دور. چونکی بو مقصد اوچون سنه ظاهئر اولموشام کی، سن هم گؤردویون هم ده سنه ظاهئر اده‌جه‌یئم شیلرئن خئدمتچی و شاهئدی اولاسان؛ 17سنی یهودی خالقیندان و قیری‌یهودئلردن خئلاص اده‌رک، ائندی اونلارین یانینا گؤندَ‌رئرم کی، 18گؤزلرئنی آچاسان و اونلار قارانلیقدان ائشیغا و شیطانین حاکئمئیّتئندن تارییا طرف دؤنه‌لر و گوناهلارین باغیشلانماسینا و منه اولان ائمانلا تقدئس ادئلنلر آراسیندا مئراثا نایئل اولالار.“ 19بونا گؤره، ای پادشاه اَغرئپا، گؤیدن گلن رؤیایا ناموطئع اولمادیم، 20آمّا اوّلجه دمشقده اولانلارا، اورشلئمده‌کئلره، سونرا بوتون یهودئیه دئیاریندا یاشایانلارا، و حتّا قیری‌یهودئلره ده اعلان اتدئم کی، تؤوبه ادئب تارییا طرف دؤنسونلر و تؤوبه‌یه لایئق ائشلر گؤرسونلر. 21بونلاردان اؤتری یهودئلر منی معبدده توتوب اؤلدورمه‌یه چالیشدیلار. 22لاکئن تاریدان گلن کؤمکله بو گونه قدر قالیب هم کئچئیه، هم ده بؤیوکه شهادت ورئرم و هچ بئر شی دمئرم مگر بو کی، پیغمبرلر و موسانین بویوردوقلاری یرئنه یتئشئر؛ 23بو کی، مسئحئن عذاب چکمه‌سی واجئب ائدی و اؤلولردن ائلک دئرئلن اولدوغو اوچون ائشیغی، هم یهودی خالقینا هم ده قیری‌یهودئلره اعلان اده‌جک.»
24پولوس اؤز دئفاعسیندا حله بو سؤزو دیئردی کی، فِستوس اوجا سَسله ددی: «پولوس، عاغیلین باشیندان چیخیب! علمئنئن چوخلوغو سنی دلئیه دؤندَ‌رئر.» 25آمّا پولوس ددی: «عالئجناب فِستوس، عاغیلیم باشیمدان چیخماییب، آنجاق حقئقت و عاغیلا سیغان سؤزلری دیئرم. 26چونکی پادشاهین دا بو شیلردن خبری وار و یقئنلئکله اونا خئطاب ادئرم. آرخایینام کی، بونلارین هچ بئری اونون نظرئندن قاچماز، چونکی بو ائش خلوت بئر گوشه‌ده باش ورمه‌یئب. 27پادشاه اغرئپا، آیا سن پیغمبرلره ائنانیرسان؟ بئلئرم کی، ائنانیرسان.»
28اغرئپا پولوسا جاواب وردی: «آز بئر زاماندا منی مسئحی اولماغا بله قانع اده‌جکسن.» 29پولوس دا اونا ددی: «آز یا چوخ، تاریدان ائستردئم کی، آنجاق سن یوخ، بو گون منی اشئدنلرئن هامیسی، منئم کئمی اولسایدیلار، بو زنجئرلردن باشقا.»
30پادشاه قالخدی. والی، برنئکی و اونلارلا اوتورانلار دا قالخدیلار. 31و بئر یانا چکئلدئکلری زامان، بئربئرلری ائله دانیشیب دیئردئلر: «بو آدام اؤلومه، و یا حبسه لایئق بئر ائش گؤرمور.» 32و اَغرئپا فِستوسا ددی: «بو آدام اگر قیصرئن محکمه‌سئنی طلب اتمه‌سیدی، آزاد اولا بئله‌ردی.»
Currently Selected:
حوارئلر 26: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
