حوارئلر 25
25
پولوس فِستوسون حوضوروندا
1بله‌جه فِستوس، وئلایته گلدئکدن اوچ گون سونرا قیصرئیّه‌دن اورشلئمه چیخدی. 2باش کاهئنلر و یهودئلرئن آدلی-سانلی آداملاری پولوسدان اونا شئکایت اتدئلر و اونا یالواردیلار کی، 3اونلارا بئر لوطف ادئب پولوسو اورشلئمه گتئرتسئن. (چونکی یولدا اونا بئر کمئن حاضیرلامیشدیلار کی، اونو اؤلدورسونلر.) 4او زامان فِستوس جاواب وردی کی، پولوس قیصرئیّه‌ده نظارت آلتیندا ساخلانیر و او اؤزو ده تزلئکله اورایا گده‌جک. 5«بونا گؤره ده، قویون آرانیزدا اولان نوفوذلو آداملار منئمله اورایا گتسئنلر و اگر او آدامدا بئر تقصئر وارسا، اونا ائتّئهام وورسونلار.» 6و اونلارین یانیندا سکّئز و یا اون گوندن آرتیق قالماییب قیصرئیّه‌یه گتدی و او گونون صاباحی حؤکم تختئنده اَیله‌شئب، امر اتدی کی، پولوسو گتئرسئنلر. 7پولوس یتشدئکده اورشلئمدن گلن یهودئلر اونون اطرافیندا دوروب، اونا بئر چوخ آغیر بؤهتانلار آتیردیلار کی، اونلاری ائثبات اده بئلمئردئلر. 8لاکئن پولوس اؤز مودافئعه‌سئنده ددی: «نه یهودئلرئن شرئعتئنه، نه معبده، نه ده قیصرئن ضئدّئنه بئر خاطا اتمئشم.» 9آمّا فِستوس یهودئلرئن ریضاسینی قازانماق اوچون پولوسا جاواب ورئب ددی: «آیا ائسته‌یئرسن کی، اورشلئمه گدئب منئم حوضورومدا بو ائتّئهاملارا گؤره موحاکئمه اولوناسان؟» 10آمّا پولوس جاواب وردی: «من قیصرئن حؤکم تختئنئن قاباغیندا دورموشام و منه بورادا حؤکم ادئلمه‌لی‌دئر. اؤزون ده یاخشی بئلئرسن کی، من یهودئلرئن ضئدّئنه هچ بئر خاطا اتمه‌مئشم. 11بونا گؤره، اگر من تقصئرکارام و اؤلومه لایئق بئر ائش گؤرموشم، اؤلمکدن ائمتئناع اتمئرم. لاکئن اگر اونلارین منه ووردوقلاری ائتّئهاملارین اساسی یوخدور، هچ کئم منی اونلارین اَلئنه تسلئم اده‌بئلمز. من قیصرئن محکمه‌سئنی طلب ادئرم.» 12او واخت فِستوس مجلئسی ائله موشاوئره ادئب جاواب وردی: «سن قیصرئن محکمه‌سئنی طلب اتدئن، قیصرئن یانینا دا گده‌جکسن.»
13بئر نچه گون سونرا، اَغرئپا پادشاه و بِرنئکی قیصرئیّه‌یه یتئشئب، احتئرام اوزوندن فِستوسون یانینا گتدئلر. 14اونلار اورادا چوخ گون قالاندان سونرا، فِستوس پولوسون وضعئنی پادشاها عرض ادئب ددی: «بورادا بئری وار کی، فِلئکس اونو محبوس ادئب. 15من اورشلئمده اولان واخت، یهودئلرئن باش کاهئنلر و آغساقّاللاری اوندان شئکایت ادئب محکوم اولونماسینی طلب اتدئلر. 16اونلارا جاواب وردئم کی، روملولارین عادتی دیئل کی، شئکایت اولونانی اوندان شئکایت اِدَنله اوزلشدئرمه‌یئنجه و اونا مودافئعه فورصتی ورمه‌یئنجه، اونو محکوم اتسئنلر. 17اونلار بورایا گلدئکده ده، یوبانماییب اِله صاباحیسی حؤکم تختئنده اوتوردوم و امر اتدئم کی، او آدام گتئرئلسئن. 18شئکایتچئلر آیاغا قالخدیقدا، گومان اتدئیئم جئنایتلردن هچ بئرئنی اونا ائتّئهام وورمادیلار. 19آنجاق اؤز دئنلری باره‌سئنده بئر نچه ائختئلافلاری وار ائدی و عئسا آدلی اؤلموش بئر آدام حاقّیندا دا کی، پولوس اونون دئری اولدوغونو بیان ادئردی. 20بو جور مسله‌لری نجه تفتئش اِده‌جه‌یئمی بئلمه‌دئیئمدن، اوندان سوروشدوم کی، آیا اورشلئمه گدئب اورادا بو مطلبلر حاقّیندا موحاکئمه اولونماق ائسته‌یئر. 21آمّا پولوس ائسته‌دی کی، حبسده ساخلانیلسین و اؤز ائشئنئن حلّئنی ائمپِراطورون محکمه‌سئنده طلب اتدی. من ده امر اتدئم کی، قیصرئن یانینا گؤندَ‌ره‌جه‌یئم زامانا قدر حبسده ساخلانسین.»
22اغرئپا فِستوسا ددی: «من اؤزوم ده بو آدامین سؤزلرئنی اشئتمک ائستردئم.» او دا ددی: «صاباح اونو اشئدرسن.»
پولوس پادشاه اغرئپانین حوضوروندا
23او گونون صاباحی اغرئپا ائله برنئکی بؤیوک طمطراقلا گلدئلر و اونلارلا گلن مئن‌باشی‌لار و شهرئن آدلی-سانلی آداملاری ائله دئوانخانایا گئردئلر. فِستوسون امری ائله پولوس گتئرئلدی. 24فِستوس ددی: «اَغرئپا پادشاه و سئز بورادا بئزئمله اولان جنابلار، سئز بو آدامی گؤرورسونوز کی، هم اورشلئمده، هم ده بورادا یاشایان بوتون یهود خالقی اونون باره‌سئنده قیشقیر-باغیر سالیر کی، بو آدام آرتیق یاشامالی دیئل. 25لاکئن من آنلادیم کی، او، اؤلومه لایئق هچ بئر خاطا اتمه‌یئب و اؤزو ائمپِراطورون محکمه‌سئنی طلب اتدئیئنه گؤره، قرار وردئم کی، اونو گؤندَ‌رئم. 26آمّا سولطانا اونون حاقّیندا یازاجاق قطعی بئر سؤزوم یوخدور. بونا گؤره اونو سئزئن حوضورونوزا، خوصوصَن ده سئز اغرئپا پادشاهین حوضورونا گتئرتمئشم کی، بو ائش تفتئش اِدئلندن سونرا، یازماغا بئر سؤزوم اولسون. 27چونکی منه منطئقسئز گلئر کی، بئر محبوسو گؤندَ‌رَک، لاکئن اوندان ادئلن شئکایتلری گؤندَ‌رمه‌یک.»
Currently Selected:
حوارئلر 25: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
