Maa 16

Yesu bɔa gau

(Mat 28.1-10; Luk 24.1-12; Zãa 20.1-10)

1Kãmabogɔɔ laaa ĩatɛ̃ gɛ̃a kpɛ́u Maliama Madelɛni ń Maliama Zaki dao ń Salomɛo nisi gĩnana lù, kɛ́ wà gɛ́ mái Yesu mɛwa. 2Ãsɔ̃anɛnzĩ kɔɔkɔɔ ĩatɛ̃ bilɛa ɔ̃ aa bɔ̀ gɛ̀ miapi kĩi. 3Aalɛ kɔ̃lala zɛ́u aalɛ mɛ: Demɛ a gbɛpi gbeembo à gowɛ̃ɛ mia'ɛ lɛ́i? 4Asa gbɛpi gbɛ̃̀nɛɛ. Kɛ́ aa wɛsɛ̀, ɔ̃ aa è wà gbɛpi gbeembò kɔ̀. 5Kɛ́ aa gɛ̃̀ mia'ɛpiu, ɔ̃ aa ɛwaasoe è zɔ̃lɛa ɔplaa oi, a ulatao pua daa. Ɔ̃ í wãa kà ń pɔa. 6A ònɛ́: Ásu to í wãa ká á pɔao. Yesu Nazalɛti pɔ wa pà líwa ɔ̃ álɛ wɛɛlɛo lò? À vù. A gu pɔ wà aà dìlɛu èa? A ku lao. 7À tá, í o aà iwaɔnɛ ń Piɛɛo, a dɔaanɛ́ Galile. Aa aà e we lá a ònɛ́wa.#Maa 14.28 8Í wãa kà an pɔa, aalɛ lualua, ɔ̃ aa bɔ̀lɛ miapiu ń bao. Aai yãe o gbɛ̃eɛo, kɛ́ vĩa ń kṹ yãi.

Yesu azĩa ɔlɔa a iwaɔnɛ

(Mat 28.16-20; Luk 24.36-53; Zãa 20.11-23)

9Kɛ́ Yesu bɔ̀ gau ãsɔ̃anɛnzĩ gufɛ̃nɛ, Maliama Madelɛni pɔ à tãa mɛn soplaɔ gòɛ̀ ɔ̃ à azĩa ɔlɔ̀ɛ̀ káau. 10Ɔ̃ nɔɛpi gɛ̀ a ò aà gbɛ̃́ pɔ an pɔ yaa, aalɛ ɔɔlɔɔnɛ. 11Kɛ́ aa mà Yesu vù, nɔɛpi aà è, aai yãpi sio.

12Bee gbɛa gɔɔ pɔ an gbɛ̃ɔn plaɔ bɛ zɛ́ guu, aalɛ gɛ́ wɛ̃lɛu, à azĩa ɔlɔ̀nɛ́ lan gbɛ̃pãlewa. 13Kɛ́ aa ɛ̀a sù ń wɛ̃lɛpio, ɔ̃ aa ò gbɛ̃kĩniɔnɛ. Ń beeo aai ń yãsio. 14Gbɛzã ɔ̃ à azĩa ɔlɔ̀ a gbɛ̃ɔn kuɛdoɔnɛ gɔɔ pɔ aalɛ pɔble. Ɔ̃ à zɔadɔ̀má, kɛ́ an swã gbãa mɛ́ aai a naaikɛo yãi. Asa aai gbɛ̃́ pɔ aa aà è à vùɔ yãsio. 15Ɔ̃ a ònɛ́: À gɛ́ dũniau pii, í ma baokpa gbɛ̃piiɛ. 16Gbɛ̃́ pɔ sì mɛ́ à da'ilɛkɛ̀ a bɔ. Gbɛ̃́ pɔ i sio sɔ̃, yã a zɔ̃lɛwà. 17Gbɛ̃́ pɔ aa yãpi sìɔ yãkɛaɔn kɛ: Aali tãaɔ go ń ma tɔ́o, aali yãebui'o. 18Tó aa mlɛ kũ̀ ń ɔo ge tó aa kona'i mì, a pɔe kɛnɛ́o. Aali ɔna gyãeɔwa, aai aafia'e.

Yesu taa luabɛ

(Zĩn 1.9-11)

19Kɛ́ Dii Yesu yã'ònɛ́ a làa, ɔ̃ Lua aà sɛ̀ tàò musu, à zɔ̃̀lɛ Luapi ɔplaai. 20Ɔ̃ aà iwapiɔ bɔ̀lɛ gɛ̀ waasokpà gupiiu. Dii zĩkɛ̀ńnɔ, ɔ̃ an dabudabukɛaɔ yã pɔ aa ò sĩana pìliwa gbɛ̃́ɔnɛ.

Currently Selected:

Maa 16: Boo2024

Highlight

Copy