Maa 15

Pilati yãkpalɛkɛa ń Yesuo

(Mat 27.11-31; Luk 23.1-25; Zãa 18.28–19.16)

1Kɛ́ gu dɔ̀ gɔ̃̀ɔ sa'onkiaɔ ń gbɛ̃zɔ̃ɔɔ ń Mɔizi ikoyãdanɛdeɔ ń gbãadeɔ pii aa lɛkpàaĩ, ɔ̃ aa Yesu yè, aa gɛ̀ aa aà kpà Pilatiwa. 2Ɔ̃ Pilati aà là à mɛ̀: Yudaɔ kian n ũa? Yesu wèwà à mɛ̀: Ɔ̃ ń ò we. 3Sa'onkiaɔ lɛ́ yãdɔdɔwà, 4ɔ̃ Pilati ɛ̀a à aà là à mɛ̀: Ńyɔ̃ yãe ooa? Yã pɔ wàlɛ dɔdɔma ma fa! 5Kɛ́ Yesu i yãe zãsimáo, ɔ̃ aà yã bɔ̀ Pilati saɛ.

6Gɛ̃amusu dikpɛgɔɔzĩ Pilati ì dakpɛunaɔ do pɔ wa yei kɛ̃nɛ́ɛ. 7Busudɛna pɔ aa bɔ̀ gbãadeɔ kpɛ aa gbɛ̃́ dɛ̀ɔ ku kpɛ́u. An gbɛ̃do tɔ́n Balaba. 8Ɔ̃ bila sɔ̃̀ Pilatizi aa wabikɛ̀wà aà kɛ lá ì kɛnɛ́wa. 9Ɔ̃ Pilati ń lá à mɛ̀: Á ye mà Yudaɔ kia kɛ̃ɛ́ yã? 10Asa a dɔ̃ sãasã kɛ́ sa'onkiaɔ wɛdɔ̀ Yesuɛ yãi ɔ̃ wà aà kpàiwa. 11Ɔ̃ sa'onkiaɔ tɛkpà bilagu, ɔ̃ wa òɛ̀ aà Balaba kɛ̃nɛ́. 12Ɔ̃ Pilati ń lá à mɛ̀: Kpelewa á ye mà kɛ ń gbɛ̃́ pɔ wì mɛ Yudaɔ kiaoi? 13Ɔ̃ aa ɛ̀a wiilɛ̀: Ǹ aà pá líwa! 14Ɔ̃ Pilati ń lá à mɛ̀: Bɔyãii? Vãi kpele a kɛ̀i? Ɔ̃ an wiilɛa kã̀fĩ aa mɛ̀: Ǹ aà pá líwa! 15Kɛ́ Pilati ye à yã pɔ a kańgu kɛ, ɔ̃ à Balaba kɛ̃̀nɛ́. À Yesu kpà sosaɔwa aa aà gbɛ̃ ń flaalao, aai aà pá líwa.

16Ɔ̃ sosapiɔ gɛ̀aanɔ busu gbãadepi bɛ'ua, aa ń gãli gbɛ̃́ɔ kã̀aa pii. 17Aa gomusu tɛ̃a dàɛ̀, ɔ̃ aa fùa tã̀ ń lɛo aa kpàɛ̀. 18Ɔ̃ aalɛ fɔkpakpawà aa mɛ̀: Yudaɔ kia fɔɔ! 19Aalɛ aà gbɛ̃ a miwa ń feeo, aalɛ lɛ'ikakawà, aalɛ kulɛkulɛ aà aɛ, aalɛ lɛmawà. 20Kɛ́ aa aà kɛ̀ pɔɔpɔɔ aa làa, ɔ̃ aa gomusu tɛ̃api bɔ̀aala, aa aazĩa pɔkasa dàɛ̀. Ɔ̃ aa bɔ̀aanɔ, aalɛ gɛ́ aà pai líwa.

Yesu gaa

(Mat 27.32-56; Luk 23.26-49; Zãa 19.17-30)

21Kɛ́ aalɛ gɛ́, gɔ̃ɛe bɔ̀ sɛ̃ oi, àlɛ dɔńzi, ɔ̃ aa teasidàɛ̀, aa Yesu lipãakɔ̃a dìɛ̀. Gɔ̃ɛpi tɔ́n Simɔ, Silɛni busu gbɛ̃́ɛ, Alɛsanda ń Lufuo de'iaɛ. 22Ɔ̃ aa gɛ̀ ń Yesuo gu pɔ wì mɛ Gɔgɔta. (Bee mɛ̀ mitɔɔnagu.) 23Ɔ̃ aa vɛ̃ɛ pɔ wà li'ɔ kàu dɔ̀ɛ̀, ãma i mio. 24Kɛ́ aa aà pà líwa, ɔ̃ aa aà pɔkasaɔ kpaalɛ̀ aa kàlɛ, ɔ̃ aa tɛlɛpà a sɛa yãmusu.#Soũ 22.19 25Aa aà pà líwa ĩatɛ̃ muuwãamigɔɔɛ. 26Yã pɔ wa dɔ̀wa ɔ̃ wa kɛ̃̀ wa nà aà mia wà mɛ̀:

Yudaɔ Kia.

27Aa kpãiwɛliwɛɔ pà líwa we lɔ gbɛ̃ɔn pla, gbɛ̃do aà ɔplaai, ado aà ɔzɛɛi. 28Ɔ̃ yã pɔ kɛ̃aɛ bee pà wà mɛ̀: Wà aà gwà doũ ń taaekɛnaɔ.#Isa 53.12

29Gbɛ̃́ pɔ aalɛ gɛ̃ weɔ lɛ́ ń midɛ,#Soũ 22.8, 109.25 aalɛ aà sɔ̃sɔ̃ aa mɛ̀: Ɛ̃hɛ̃! Tò! N mɛ̀ ńyɔ̃ luakpɛ wí, ní ɛa ǹ dɔ gɔɔ aaɔ̃ nolo?#Maa 14.58 30Ǹ nzĩa suaba! Pila líwa mɛ! 31Màa lɔ sa'onkiaɔ ń Mɔizi ikoyãdanɛdeɔ lɛ́ aà kɛ pɔɔpɔɔ aa mɛ̀: À gbɛ̃pãleɔ suabà, ãma a fɔ̃ à azĩa suabao. 32Tó wá è Isailiɔ kia pɔ wì mɛ Mɛsipi pìla líwa, wá aà naaikɛ sa. Ɔ̃ gbɛ̃́ pɔ wà ń pá líwa sãnuɔ lɛ́ aà sɔ̃sɔ̃ sɔ̃.

33Sɛa za ĩatɛ̃ minanguo e aua gɛ̀ pìlaò gu siakũ̀ busupiu piiɛ. 34Ĩatɛ̃'auapilaa ɔ̃ Yesu wiilɛ̀ gbãugbãu à mɛ̀: Ɛloi, Ɛloi, lɛma sabatani! Bee bɔɔlɛ mɛ̀: Ma Lua, ma Lua, akɛa n ma to wei?#Soũ 22.12 35Kɛ́ gbɛ̃́ pɔ zɛa weeɔ yãpi mà, ɔ̃ aa mɛ̀: Ma we, àlɛ Ɛlia sisiɛ. 36Ɔ̃ gbɛ̃e baalɛ̀, à gɛ̀ sao zɔ̃̀ vɛ̃ɛ kũmawa,#Soũ 69.22 a pɛ̀ feea a dɔ̀ Yesuɛ à mɛ̀: À zɛ gĩ́a wà gwa, tó Ɛlia a mɔ à aà pila. 37Yesu wii gbãa lɛ̀, ɔ̃ à gà. 38Ɔ̃ luakpɛ zwãa#Bɔa 26.31-33 pɔ daa luakukĩi aɛ pàa pla za musu e zĩlɛ. 39Kɛ́ sosaɔ gbɛ̃zɔ̃ɔ pɔ zɛ Yesu aɛ we à aà gaa è màa à mɛ̀: Gɔ̃ɛpiá Lua Nɛɛ sĩana. 40Nɔɛeɔ ku we lɔ, aalɛ gugwa kãaa. Maliama Madelɛni ku ń guu ń Maliama pɔ dɛ Yosɛfu ń Zaki Nɛna da ũo ń Salomɛo. 41Gɔɔ pɔ Yesu ku Galile, aamɛ aaìɔ tɛaazi aaɔ blɛkɛɛ̀. Nɔɛ pãleɔ mɔ̀aanɔ Yelusalɛũ aa ku we lɔ dasi.

Yesu vĩa

(Mat 27.57-61; Luk 23.50-56; Zãa 19.38-42)

42Ãsɔ̃adazĩ oosi lɛ́ kɛ. Lá kãmabogɔɔ ye daalɛi, 43Yosɛfu Alimate mɔ̀. Tɔdeɛ Yuda gbãadeɔ guu, mɛ́ aà wɛ́ dɔ kia pɔ Lua kpàzi. À sɔ̃dìlɛ à gɛ̀ Pilati kĩi, à Yesu gɛ wabikɛ̀wà. 44Kɛ́ Pilati mà Yesu gà kɔ̀, à bɔ̀ aà saɛ. Ɔ̃ à sosaɔ gbɛ̃zɔ̃ɔ sìsi, à aà là tó Yesu gà kɔ̀. 45Kɛ́ Pilati gbɛ̃zɔ̃ɔpi yãmà, ɔ̃ à Yosɛfu gbà zɛ́ aà gɛpi sɛ́. 46Yosɛfu gɛ̀ à baabaa lù, ɔ̃ à gɛ̀ à aà bùa, à baabaapi fĩ̀wà. À aà dà gbɛ'ɛ pɔ wa sɔ̀ mia ũ guu, ɔ̃ à gbɛ̀ gbɛ̃̀nɛ gbeembo a tà ɛpilɛ. 47Maliama Madelɛni ń Maliama Yosɛfu dao lɛ́ gwa, aa è gua pɔ wà Yesu gɛpi dàu.

Currently Selected:

Maa 15: Boo2024

Highlight

Copy