Maa 12

Vɛ̃ɛbu zĩkɛnaɔ

(Mat 21.33-46; Luk 20.9-18)

1Ɔ̃ Yesu fɛ̀lɛ yãlɛ̀ɛũnɛ́ à mɛ̀: Gbɛ̃e mɛ́ vɛ̃ɛbu vĩ, à kaa lìai, à ɛyɔ̃̀ vɛ̃ɛ'ibɔkĩi ũ à gbadà,#Isa 5.1-2 ɔ̃ à búpi nà zĩkɛnaɔnɛ ń ɔzĩ, ɔ̃ à fɛ̀lɛ ń táo. 2Kɛ́ vɛ̃ɛkɔzɔ̃zɔ̃gɔɔ kà, ɔ̃ à a iwae zĩ̀ zĩkɛnapiɔwa, aà a vɛ̃ɛpi asea simáɛ. 3Ɔ̃ zĩkɛnapiɔ aà kũ̀, aa aà gbɛ̃̀, aa aà gbàɛ ɔgii. 4Ɔ̃ à ɛ̀a à iwa pãle zĩ̀má. Ɔ̃ aa gbɛ̃́ bee mi fɔ̃̀, aa widàwà. 5À ɛ̀a à a pãle zĩ̀ lɔ, ɔ̃ aa gbɛ̃́ bee dɛ̀. Màa à gbɛ̃pãleɔ zĩ̀ dasi, aa ń gbɛ̃eɔ gbɛ̃̀, aa ń gbɛ̃eɔ dɛ̀. 6Budepi nɛ mɛndona mɛ́ gɔ̃̀ɛ̀ sa, ɔ̃ à aà zĩ̀ gbɛzã à mɛ̀: Aa ma nɛ yãda. 7Ɔ̃ zĩkɛnapiɔ òkɔ̃ɛ aa mɛ̀: Tubiblenan kee. À to wà aà dɛ, bú i gɔ̃wɛ̃ɛ. 8Ɔ̃ aa aà kũ̀ aa dɛ̀, aa aà gɛ sɛ̀ aa zù kaa kpɛ. 9Too, kpelewa budepi a kɛ sai? A gɛ à zĩkɛnapiɔ dɛdɛ, i búpi kpa gbɛ̃pãleɔwaɛ. 10I Lua yãɛ bee kyokɛo le? Wà mɛ̀:

Gbɛ pɔ ɛ̃bonaɔ pãkpài

mɛ́ gɔ̃̀ gbɛɔ mide ũ.

11Dii mɛ́ bee kɛ̀,

ɔ̃ à bɔ̀ wá saɛ.#Soũ 118.22-23

12Ɔ̃ aa zɛwɛ̀ɛlɛ aa aà kṹ, asa aa dɔ̃̀ ń yãi ɔ̃ à yãpi lɛ̀ɛũi. Ń beeo aa vĩakɛ̀ bilaɛ, ɔ̃ aa aà tò we aa tà.

Yesu Yuda gbãadeɔ fua

(Mat 22.15-46; Luk 20.19-47)

13Ɔ̃ wà Falisieɔ ń Helodi kpala zɛnkpɛdeeɔ zĩ̀ Yesuwa ɔ̃nɔkɛiɛ̀ a yã'oa guu. 14Kɛ́ aa kà, ɔ̃ aa òɛ̀: Mɛtulu, wá dɔ̃ kɛ́ gbɛ̃́ naaiden n ũ. Nili yãsi ń gbɛ̃́o ublembɛkɛ yãio, asa nili gbɛ̃e wɛgwao. Lua zɛ́ ni ɔlɔnɛ́ wasawasa. A zɛ́ vĩ wà wɛ̃̀'ɔ̃a kpa Sezaawaa, ge a zɛ́ vĩo? Wà kpa yã̀, ge wásu kpao? 15Yesu ń mɔafili dɔ̃̀, ɔ̃ a ònɛ́: Bɔyãi álɛ filifilimba kpamɛɛi? À ɔ̃api do dɔmɛɛ mà gwa. 16Kɛ́ aa dɔ̀ɛ̀, ɔ̃ à ń lá à mɛ̀: Dé mi ń aà tɔ́on lai? Aa wèwà aa mɛ̀: Sezaa pɔɛ. 17Ɔ̃ Yesu ònɛ́: À Sezaa dee pɔ kpawà, í Lua pɔ kpawà. Aà yã bɔ̀ ń saɛ.

18Ɔ̃ Saduse pɔ aaì gɛɔ vua ɛɛboeɔ mɔ̀ aa Yesu lè, aa aà là aa mɛ̀: 19Mɛtulu, Mɔizi òwɛ̃ɛ a lá guu à mɛ̀, tó gbɛ̃́ vĩi gà à a nɔ tò nɛsai, aà dãuna gyaapi da'uakɛ, i a vĩi gɛ̃ɛ kɛò.#Iko 25.5 20Màaɛ, vĩi ń dãunaɔ ku gbɛ̃ɔn sopla. Woo nɔsɛ̀, ɔ̃ à gà, à aà tò we nɛsai. 21Se aà da'uakɛ̀, ɔ̃ à gà, à nɔpi tò we lɔ nɛsai. Ɔ̃ Biɔ kɛ̀ màa lɔ 22e à gɛ̀ kà an sopladewa. Ampii aa aà tò nɛsaiɛ. An gbɛa ɔ̃ nɔpi gà. 23Gɛɔvugɔɔzĩ an demɛ aɔ nɔpi vĩi? Asa an gbɛ̃ɔn sopla pii aa aà dɔ̃ nɔ ũɛ. 24Yesu wèmá à mɛ̀: Á Lua yã ń a gbãao dɔ̃sai yãi a sãsãio lò? 25Tó gɛɔ vù, aa nɔsɛo, aa zãkɛo, aaɔ ku lan malaikaɔwaɛ luabɛ. 26Kɛ́ gɛɔ bɔ gau sɔ̃ bɛ, i Mɔizi lá gua pɔ à lɛli yã'òu kyokɛo le? Lua òɛ̀ à mɛ̀, ámɛ á Ablahaũ ń Izaakio ń Yakɔbuo Lua ũ.#Bɔa 3.6 27Luaá gɛɔ Lua no, gbɛ̃́ bɛ̃́ɛɔ pɔɛ. A sãsã à kɛ̀ zai.

28Mɔizi ikoyãdanɛdee ku we, à ń lɛkpaapi mà. Kɛ́ a è Yesu yãmaa wèmá, ɔ̃ à sɔ̃̀aazi à aà là à mɛ̀: Ikoyã kpele mɛ́ dɛńlai? 29Yesu wèwà à mɛ̀: A miden kɛ: À ma, Isailiɔ. Dii wá Lua mɛ́ Dii ũ ado. 30Àɔ ye Dii á Luazi ń nɔsɛmɛndoo teasisai á gbãapualɛu, á sɔ̃ iɔ kuwà.#Iko 6.4-5 31A plaaden kɛ: Àɔ ye á gbɛ̃deezi lan ázĩa wɛ̃niwa.#Lev 19.18 Ikoyãe dɛ beeɔlao. 32Ɔ̃ yãdanɛdepi òɛ̀: Yãmaaɛ, Mɛtulu. N sĩana ò, n mɛ̀ Lua mɛndoɛ, a plaade kuo, sema aapi.#Iko 4.35 33Yea Luazi ń nɔsɛmɛndoo ń n ɔ̃nɔo pii n gbãapualɛu ń yea gbɛ̃́i lá nzĩa wɛ̃niwao dɛ sa pɔ wì a pɔ katɛu à tɛkũ ń sa'oa bui piiola.#Oze 6.6 34Kɛ́ Yesu è, à yãwèwa ń laaio, a òɛ̀: Gɛ̃a kpala pɔ Lua kpà guu zã̀nnɔo. Bee kpɛ gbɛ̃e i we yãe làwà lɔo.

35Yesu ɛ̀a àlɛ yãdadanɛ́ Lua ua, ɔ̃ à ń lá à mɛ̀: Bɔyãi Mɔizi ikoyãdanɛdeɔ ì o Mɛsiá Davidi buiɛi? 36Kɛ́ Lua Nisĩna dɛ̀dɛ Davidiwa à mɛ̀:

Dii ò ma Diiɛ aà zɔ̃lɛ a ɔplaai

e àɔ aà ibɛɛɔ kalɛɛ̀ aà gbá ziɛ.#Soũ 110.1

37Lá Davidi òɛ̀ Dii, kpelewa aɔ dɛ aà bui ũ lɔi? Ɔ̃ bila lɛ́ aà yãma ń pɔnao.

38Aà yãdaanɛ́ guu à mɛ̀: À laaika Mɔizi ikoyãdanɛdeɔzi. Aaìɔ ye bɛbɛa ń uladao daa wàɔ fɔkpakpamá gãaɛ. 39Aaìɔ wɛɛlɛ wà zɔ̃lɛ luasisikpɛ zɔ̃lɛkĩi maaɔ guu ń blɛble zɔ̃lɛkĩi maaɔ. 40Aaì wabikɛ gbã̀agbãa gbɛ̃́ɔ wɛ́ yãi, ɔ̃ aaì gyaaɔ kpɛ́ siòmá. An ĩadama pãsĩ aɔ dɛńla.

Gyaa taaside gbadaa

(Luk 21.1-4)

41Ɔ̃ Yesu zɔ̃̀lɛ Lua ua ɔsikpagolo aɛ, àlɛ gbɛ̃́ɔ gwa lá wàlɛ ɔ̃a dau. Ɔde saɔ lɛ́ ɔ zɔ̃ɔ dau. 42Ɔ̃ gyaa taaside mɔ̀ à tãnga dàu mɛn pla, i ka dalao. 43Ɔ̃ Yesu a iwaɔ kã̀aa a ònɛ́: Sĩana malɛ oɛ́, gyaa taasidepi ɔ̃a dà kpagolo guu dɛ gbɛ̃piila. 44Asa ɔ dia ɔ̃ aa dã̀ aa kàu mpii. Nɔɛpi sɔ̃, aà taasidekɛ guu pɔ pɔ a vĩ à pɔbleò ɔ̃ a dàu we pii.

Currently Selected:

Maa 12: Boo2024

Highlight

Copy