Luk 6

Kãmabogɔɔ

(Mat 12.1-14; Maa 2.23–3.6)

1Kãmabogɔɔe zĩ́ Yesu lɛ́ pã blɛ bua, ɔ̃ aà iwaɔ pɔwɛna wòlo wà a suumpà ń ɔu, aalɛ só.#Iko 23.25 2Ɔ̃ Falisieɔ ònɛ́: Bɔyãi álɛ yã pɔ dɛ wà kɛ kãmabogɔɔzĩo kɛi? 3Yesu wèmá à mɛ̀: Lá Davidi ń a gbɛ̃́ɔ kɛ̀ gɔɔ pɔ nɔana lɛ́ ń dɛ, i a kyokɛo le? 4À gɛ̃̀ Lua ua, à pɛ̃ɛ pɔ wa kàlɛ Luaɛ sɛ̀ a sò, a kpà a gbɛ̃́ɔwa,#1 Sam 21.1-6 pɛ̃ɛ pɔ gbɛ̃e lí soo, sema sa'onaɔ baasio.#Lev 24.9 5Ɔ̃ Yesu ònɛ́: Gbɛ̃nazĩn Nɛ mɛ́ iko vĩ kãmabogɔɔwa.

6Kãmabogɔɔ pãle zĩ́ lɔ Yesu gɛ̃̀ luasisikpɛu, àlɛ yãdanɛ́. Gɔ̃ɛe ku we, aà ɔplaa imia. 7Mɔizi ikoyãdanɛdeɔ ń Falisiɔ lɛ́ Yesu kpakpa, tó a gbɛ̃́pi gbãgbã kãmabogɔɔzĩ, wi e wà yãdaaala. 8À ń laasoo dɔ̃̀, ɔ̃ a ò gbɛ̃́ pɔ a ɔ imiapiɛ: Fɛlɛ ǹ zɛ zã guu. Kɛ́ à fɛ̀lɛ zɛ̀ we, 9ɔ̃ Yesu ònɛ́: Malɛ á láɛ. A zɛ́ vĩ wà yãmaakɛ kãmabogɔɔzĩ yã̀, ge yãvãiɛ? Wà gbɛ̃́ misi yã̀, ge wà aà dɛɛ? 10Yesu wɛpã̀ńla mpii, ɔ̃ a ò gbɛ̃́ pɔ a ɔ imiapiɛ: Ǹ n ɔpi poo. Kɛ́ a pòo, ɔ̃ aà ɔ sù a gbɛu. 11Falisiɔ pɔ fɛ̃̀ maamaa, ɔ̃ aa lɛkpàaĩ Yesuzi lá wà kɛɛ̀ yãmusu.

Iwa gbɛ̃ɔn kuɛplaɔ sɛa

(Mat 5.1-12, 10.1-4; Maa 3.13-19)

12Gɔɔ bee Yesu gɛ̀ wabikɛi sĩ̀sĩ musu, ɔ̃ àlɛ wabikɛ Luawa e gu gɛ̀ dɔ̀ò. 13Kɛ́ gu dɔ̀, ɔ̃ à a iwaɔ kã̀aa, à gbɛ̃ɔn kuɛplaɔ sɛ̀ ń guu à ń dilɛ zĩnaɔ ũ. 14Gbɛ̃́piɔ tɔ́ɔn kɛ: Simɔ pɔ à tɔkpàɛ̀ Piɛɛ, aà dãuna Ãndele, Zaki, Zãa, Filipi, Batelemi, 15Matie, Toma, Alafe nɛ Zaki, Simɔ pɔ wì oɛ̀ Ginzĩao, 16Zaki nɛ Yudasi ń Yudasi Isaliɔti pɔ gɔ̃̀ Yesu gbɛ̃kpamade ũo.

17Yesu pìlańnɔ à zɛ̀ gusalalaa, gu pɔ aà iwa kĩniɔ ń bilao kuu. Aa bɔ̀ Yelusalɛũɛ ń Yude busuo pii ń isialɛ wɛ̃lɛ pɔ ku Tii ń Sidɔ̃o saɛɔ. 18Aa mɔ̀ aà yãmai, mɛ́ kɛ́ aà ń gbãgbã ń ń gyãɔ yãi. Gbɛ̃́ pɔ tãaɔ lɛ́ ĩadamáɔ gbã̀gbã lɔ. 19Gbɛ̃pii lɛ́ wɛɛlɛ à ɔkãwà, asa gbãa lɛ́ bɔ aà guu, àlɛ gbɛ̃pii gbãgbãɛ.

20Ɔ̃ à wɛsɛ̀ à a iwaɔ gwà à mɛ̀:

Baaadeɔn á ũ, á taasideɔ,

asa kpala pɔ Lua kpà dɛ á pɔ ũɛ.

21Baaadeɔn á gbɛ̃́ pɔ nɔana lɛ́ á dɛ gbãɔ ũ,

asa á kã́.

Baaadeɔn á gbɛ̃́ pɔ álɛ ɔɔlɔ gbãɔ ũ,

asa á yaalɔ.

22Baaadeɔn á ũ,

tó wà zàágu mɛ́ wà gìázi,

mɛ́ wà á sɔ̃sɔ̃ mɛ́ wà á tɔbɛ̃ɛsì Gbɛ̃nazĩn Nɛ yãi.

23Gɔɔ pɔ yã beeɔ á lé, àɔ vĩvĩ ń pɔnao, asa á asea zɔ̃ɔ luabɛ. Beewa an deziɔ kɛ̀ ãnabiɔnɛ.

24Waiyoo á ɔdeɔ,

á mɛ namamà kɔ̀.

25Waiyoo á gbɛ̃́ pɔ á kãa gbãɔ,

nɔana a á dɛ.

Waiyoo á gbɛ̃́ pɔ álɛ yaalɔ gbãɔ,

á wɛ̃nakɛ, á ɔɔlɔ.

26Waiyoo apiɔ, tó gbɛ̃pii lɛ́ á tɔnasi,

asa beewa an deziɔ kɛ̀ ãnabi ɛgɛnaɔnɛ.

Yea ibɛɛzi

(Mat 5.38-48)

27Malɛ o á gbɛ̃́ pɔ álɛ ma yãmaɔnɛɛ, àliɔ ye á ibɛɛɔzi, àli maakɛ gbɛ̃́ pɔ zaáguɔnɛ. 28Àli samaa'o gbɛ̃́ pɔ aaì savãi'oɛ́ɔnɛ. Àli wabikɛ gbɛ̃́ pɔ aaì ĩadawáɔnɛ. 29Tó gbɛ̃́ n sãnkɛ n gɛɛ dowa, ǹ ado dɔɛ̀ lɔ. Tó gbɛ̃́ n ulada sìma, nsu giɛ̀ ń n danziioo. 30Pɔ pɔ gbɛ̃́ gbɛ̀ama pii ǹ kpawà. Tó gbɛ̃́ n pɔ sìma, nsu gbɛawào. 31Lá á ye wà kɛɛ́, à kɛnɛ́ màa sɔ̃. 32Tó gbɛ̃́ pɔ aa yeáziɔ ɔ̃ áliɔ yeńzi, bɔ́ sáau bee vĩi? Baa luayãdansaiɔ aaìɔ ye gbɛ̃́ pɔ yeńziɔziɛ. 33Tó gbɛ̃́ pɔ aaì maakɛɛ́ɔ ɔ̃ áli maakɛnɛ́, bɔ́ sáau bee vĩi? Baa luayãdansaiɔ aaì kɛ màaɛ. 34Tó gbɛ̃́ pɔ á wɛ́ dɔi à pɔ emáɔ ɔ̃ áli pɔsɛ̃anɛ́, bɔ́ sáau bee vĩi? Asa luayãdansaiɔ ì pɔ sɛ̃akɔ̃ɛ a ea a lɛ́ gbɛu yãiɛ. 35Àliɔ ye á ibɛɛɔzi àli maakɛnɛ́, àli pɔsɛ̃anɛ́ wɛdɔisai, í asea zɔ̃ɔ e, íɔ dɛ Musude nɛɔ ũ, asa ì maakɛ guluɔnɛ ń gbɛ̃vãiɔɛ. 36Àɔ sosobi vĩ lá á Mae sosobi vĩwa.

Kɔ̃ taae'ea

(Mat 7.1-6)

37Ásuli gbɛ̃́ taae'eo, Lua a á taae'e sɔ̃o. Ásuli yãda gbɛ̃́ao, Lua a yãdaálao. Àli suuukɛ ń gbɛ̃́ɔ, Lua i suuukɛánɔ. 38Àli gbɛ̃́ gba pɔ, Lua i á gba. A zaa maa pɔ a gbɛ̃̀gbɛ̃ à wɛ̃̀ à pà yɛlɛlɛ kaɛ́ á ula lɛu. Asa zaa pɔ ń yɔ̃̀u gbɛ̃́ɛ ɔ̃ Lua a yɔ̃unɛ sɔ̃.

39Ɔ̃ à yãtaa ònɛ́ à mɛ̀: Vĩ̀a a fɔ̃ dɔaa vĩ̀aɛe? Ampla mpii aa zu ɛuo le? 40Iwa líɔ dɛ a diilao. Gbɛ̃́ pɔ yãdàda a làa dɛ lá a diiwaɛ. 41Bɔyãi nlɛ sɛ̃kɔna pɔ da n gbɛ̃dee wɛ́u e, mɛ́ nlɛ limiɔna pɔ da n wɛ́u yãdao ni? 42N gbɛ̃́ pɔ nlɛ limiɔna pɔ da n wɛ́u eo, kpelewa ńyɔ̃ o n gbɛ̃deeɛ aà to ǹ sɛ̃kɔna pɔ da aà wɛ́u bɔɛ̀i? Mɔafilide! Lí miɔna pɔ da n wɛ́u bɔ gĩ́a, ní gu'e wasawasa kɛ́ ǹ e ǹ sɛ̃kɔna pɔ da n gbɛ̃dee wɛ́u bɔɛ̀.

Gbɛ̃́ dɔ̃a a yãkɛawa

(Mat 7.15-27, 12.33-37)

43Lí maa lí nɛ vãi io, lí vãi lí nɛ maa io. 44Wì lí pii dɔ̃ a bɛwaɛ. Wìli kpa bo lɛliwao, wìli kukɛ kaelɛwao. 45Gbɛ̃maa ì maa bɔ a sɔ̃̀ laasoo maaɔ guuɛ. Gbɛ̃vãi sɔ̃ ì vãi bɔ a sɔ̃̀ laasoo vãiɔ guuɛ. Asa yã pɔ kɔ̃̀ sɔ̃ guu ɔ̃ lɛ́ ì o.

46Bɔyãi iɔ omɛɛ Dii, Dii, mɛ́ ili yã pɔ má ò kɛo ni? 47Gbɛ̃́ pɔ mɔ̀ ma kĩi à ma yãmà mɛ́ a kɛ̀, má ɔlɔɛ́ lá ade dɛ. 48A dɛ lan ɛ̃bona pɔ ɛyɔ̃̀ zã̀zã à kpɛ́ kpàlɛ gbɛwawaɛ. Kɛ́ swa pà, í dàgua à kà kpɛ́pizi, i deeo, kɛ́ a zɛa gbãa yãi. 49Gbɛ̃́ pɔ lɛ́ ma yãma mɛ́ àlɛ kɛo, ade dɛ lan ɛ̃bona pɔ kpɛ́ kpàlɛ tɔɔlɛa pã ɛ̃yɔ̃saiwaɛ. Kɛ́ swa'i kài, ɔ̃ à kwɛ̀ gɔ̃̀ɔ. Kpɛ́pi ɔ̃ɔkpaa kɛ̀ zɔ̃ɔ.

Currently Selected:

Luk 6: Boo2024

Highlight

Copy