Luk 7

Sosaɔ gbɛ̃zɔ̃ɔ zĩkɛna gbãgbãa

(Mat 8.5-13)

1Kɛ́ Yesu yãpiɔ ònɛ́ pii a làa, ɔ̃ à gɛ̀ Kapɛnaũ. 2Sosaɔ gbɛ̃zɔ̃ɔe ku we, a zĩkɛna vĩ, a yeaaziɛ maamaa, ɔ̃ àlɛ gyãkɛ à kà gaa. 3Kɛ́ aà diipi Yesu baomà, à Yuda gbɛ̃zɔ̃ɔɔ zĩ̀ wabikɛiwà aà mɔ à a zĩkɛnapi gbãgbãɛ. 4Kɛ́ aa kà Yesu kĩi, aa wabikɛ̀wà kɔ̃sɔ̃kɔ̃sɔ̃ aa mɛ̀: Gbɛ̃́pi kà ǹ dɔaalɛ. 5A ye wá buizi, ɔ̃mɛ luasisikpɛ dɔ̀wɛ̃ɛ. 6Ɔ̃ Yesu gɛ̀ńnɔ. Kɛ́ à kà kãi ń aà bɛo, ɔ̃ sosaɔ gbɛ̃zɔ̃ɔpi a gbɛ̃naɔ zĩ̀ a ònɛ́: À oɛ̀ asu ĩada azĩawao, mi ka aà gɛ̃ ma kpɛ́uo. 7Ayãmɛto má dìlɛ mi ka mà mɔ aà kĩi mazĩao. À oɛ̀ aà yã'o, ma zĩkɛna i gbãgbã. 8Asa mapi sɔ̃, wa iko vĩaɛ, mɛ́ má iko vĩ sosaɔwa. Mi o an gbɛ̃doɛ aà gɛ́, ɔ̃ ì gɛ́. Mi o a pãleɛ aà mɔ́, ɔ̃ ì mɔ́. Mi o ma zĩkɛnaɛ aà kɛ́ bee kɛ, ɔ̃ ì kɛ. 9Kɛ́ Yesu yãpi mà, à bɔ̀ aà saɛ. Ɔ̃ à lìli a ò bila pɔ tɛaziɛ: Malɛ oɛ́, mi e gbɛ̃e ma naaikɛ̀ kɛ́wao, baa Isailiɔ guu. 10Kɛ́ zĩnapiɔ ɛ̀a sù, aa è zĩkɛnapi gbã̀gbã.

Gyaa nɛ mɛndona vua

11Bee gbɛa Yesu gɛ̀ wɛ̃lɛ pɔ wì mɛ Naini. Aà iwaɔ ń gbɛ̃pãleɔ gɛ̀aanɔ dasidasi. 12Kɛ́ à kà kãi ń wɛ̃lɛpi bĩibɔlɛo, a è wa gɛ sɛa wàlɛ bɔò. Gyaae nɛ mɛndonaɛ. Wɛ̃lɛpideɔ ku ń nɔɛpio dasi. 13Kɛ́ Dii aà è, ɔ̃ à kɛ̀ɛ̀ wɛ̃naũ a òɛ̀: Nsu ɔɔlɔo. 14Ɔ̃ à sɔ̃̀ gɛpizi à ɔkã̀ aà pɛwa. Kɛ́ gbɛ̃́ pɔ sɛaɔ zɛ̀, ɔ̃ à mɛ̀: Ɛwaaso, má ònɛ ǹ vu. 15Ɔ̃ gɛpi fɛ̀lɛ zɔ̃̀lɛ, à nà yã'oawa. Ɔ̃ Yesu aà kpà aà dawa. 16Vĩa gbɛ̃pii kũ̀, aa Lua saaukpà aa mɛ̀: Wa ãnabi zɔ̃ɔ è wá guu. Aa mɛ̀ lɔ: Lua mɔ̀ a gbɛ̃́ɔ gwai. 17Ɔ̃ Yesu bao lì Yude busua ń busu pɔ liaaiɔ pii.

Zãa Da'ilɛna zĩnaɔ

(Mat 11.1-19)

18Zãa iwaɔ yãpi dàu wà sìuɛ̀ pii. Ɔ̃ Zãa ń gbɛ̃ɔn plaɔ sìsi, 19à ń zĩ́ Yesuwa aa aà laɛ, aapi mɛ́ gbɛ̃́ pɔ a mɔ ũa, ge wàɔ wɛdɔ gbɛ̃pãleziɛ? 20Kɛ́ gbɛ̃́piɔ kà Yesu kĩi, aa òɛ̀: Zãa Da'ilɛna mɛ́ wá zĩ́ wà n la, mmɛ ń gbɛ̃́ pɔ a mɔ ũa, ge wàɔ wɛdɔ gbɛ̃pãleziɛ? 21Wegɔ̃ɔ Yesu gbɛ̃́ɔ gbã̀gbã dasi ń ń gyãɔ ń ń wãwãɔ ń ń tãaɔ. A tò vĩ̀aɔ gu'è dasi lɔ. 22Ɔ̃ a ò Zãa zĩnaɔnɛ: À gɛ́ yã pɔ á è mɛ́ á màɔ dau à siuɛ̀. À oɛ̀ vĩ̀aɔ lɛ́ gu'e, kɔ̃̀ɔɔ lɛ́ taa'o, malɛ gbãbɔ kusudeɔnɛ, swãdoɔ lɛ́ yãma, gɛɔ lɛ́ vu, taasideɔ lɛ́ baona waaso ma.#Isa 35.5-6, 61.1 23Baaaden gbɛ̃́ pɔ lí fuao ũ.

24Kɛ́ Zãa zĩnaɔ tà, Yesu nà aà yã'oa bilaɛwa à mɛ̀: Bɔ́ a gɛ gwai gbáaui? Fee pɔ ĩana lɛ́ deedee yã? 25Bɔ́ a gɛ gwai wei? Gbɛ̃́ pɔ pɔkasa zãɛ naaazi yã? Namablena pɔ aaì pɔkasa maa daɔ ìɔ ku kibɛɛ. 26Bɔ́ a gɛ gwai wei? Ãnabi yã? Ao! Malɛ oɛ́ a dɛ ãnabia se. 27Asa Zãapi wà aà yã kɛ̃̀ láu wà mɛ̀:

Má a zĩna gbaɛ aà dɔaa à zɛkɛkɛnɛ.#Mal 3.1

28Malɛ oɛ́, nɔɛɔ nɛ'ia guu wi nɛe i à kà Zãawao. Ń beeo gbɛ̃́ pɔ kɛ̃sãańzi kpala pɔ Lua kpà guu dɛaala. 29Kɛ́ gbɛ̃pii aà yãmà, baa ɔsinaɔ, ɔ̃ aa yãnakpà Luawa, ɔ̃ Zãa ń da'ilɛkɛ̀.#Luk 3.12 30Falisiɔ ń Mɔizi ikoyãdanɛdeɔ sɔ̃ aa gì yã pɔ Lua dìlɛ à kɛnɛ́i, ɔ̃ aai wei Zãa ń da'ilɛkɛ̀o.

31Bɔ́ má gbãgbɛ̃ɔ lɛɛũòi? Bɔ́ aa bɔ̀wài? 32Aa bɔ̀ lan nɛ pɔ ku gãaɛ aalɛ lɛzukɔ̃iɔwaɛ aalɛ mɛ:

Wa kulɛpɛ̀ɛ́, i ɔ̃wão.

Wa wɛ̃nalɛ sìɛ́, i ɔɔlɔo.

33Asa Zãa Da'ilɛna mɔ̀, ili pɛ̃ɛsoo, ili vɛ̃ɛmio, ɔ̃ i mɛ tãadeɛ. 34Gbɛ̃nazĩn Nɛ mɔ̀, ì pɔble, ì imi, ɔ̃ i mɛ asiade wɛ̃minaɛ, ɔsinaɔ ń luayãdansaiɔ gbɛ̃naɛ. 35Ãma wì ɔ̃nɔ dɔ̃ ɔ̃nɔna pii yãkɛawaɛ.

Tulalekaa Yesu gbáɔwa

36Falisie Yesu gbɛ̀a aà mɔ pɔbleanɔ. Yesu gɛ̀ aà bɛ, ɔ̃ àlɛ pɔble gɛngɛsɛkɛa. 37Nɔɛ dɔɛ'ĩidee ku wɛ̃lɛpiu. Kɛ́ a mà Yesu lɛ́ pɔble Falisipi bɛ, ɔ̃ à gɛ̀ we, a tulale loona kũa. 38À zɛ̀ aà kpɛ aà gbázĩ, àlɛ ɔɔlɔ. Aà wɛ'i lɛ́ ká aà gbakpɛaa, ɔ̃ a wàa ń a mikão, à lɛpɛ̀pɛ aà gbáwa, ɔ̃ à tulalepi kàwà.

39Kɛ́ Falisi pɔ à aà sìsipi è màa, ɔ̃ a ò a sɔ̃ guu: Tó gbɛ̃́piá ãnabiɛ, dɔ̃ à nɔɛ pɔ lɛ́ ɔkãwapi taa dɔ̃̀, kɛ́ dɔɛ'ĩideɛ. 40Ɔ̃ Yesu ò Falisipiɛ: Simɔ, má yãe vĩ mà onɛ. Simɔ mɛ̀: O, Mɛtulu. 41Yesu mɛ̀: Ɔdakɛnae mɛ́ ku, gbɛ̃ɔn plaɔ aà fĩa kũa, gbɛ̃do ãnusu ɔwatɛ̃ ɔaa pla ń basɔoo, gbɛ̃do sɔ̃ ãnusu ɔwatɛ̃ blakwi. 42Lá aa pɔe vĩ wà fĩaboòo, ɔ̃ à ń kɛ̃́ ampla mpii. An guu, demɛ aɔ yeaazi dɛ a deelai? 43Simɔ wèwà à mɛ̀: Malɛ e gbɛ̃́ pɔ wà aà kɛ̃̀ ń ɔ zɔ̃ɔoɛ. Yesu òɛ̀: N wè maaɛ.

44Ɔ̃ Yesu aɛdɔ̀ nɔɛpiwa, a ò Simɔɛ: N nɔɛpi èa? Kɛ́ ma gɛ̃ n bɛ, ni í kpaa n ma gbapìpio, ɔ̃ nɔɛpi ma gbapìpi ń a wɛ'io, a wàa ń a mikão. 45Ni lɛpɛao. Nɔɛpi sɔ̃, za gɔɔ pɔ ma gɛ̃ la, i kãmabo ń lɛpɛa ma gbáwaoo. 46Ni nisidɔɔ ma miwao. Nɔɛpi sɔ̃ à tulale kà ma gbáɔwa. 47Ayãmɛto malɛ onɛ, a yemazi maamaa kɛ́ aà duun zɔ̃ɔ kɛ̃̀wà yãiɛ. Gbɛ̃́ pɔ wà aà kɛ̃̀ ń a yɔɔnao sɔ̃, aà yeanzi aɔ bilao. 48Ɔ̃ a ò nɔɛpiɛ: N duuna kɛ̃̀ma. 49Ɔ̃ gbɛ̃́ pɔ aalɛ pɔble sãnuɔ òkɔ̃ɛ: Dén gbɛ̃́pi ũ kɛ́ àlɛ duunakɛ̃mái? 50Ɔ̃ Yesu ò nɔɛpiɛ: Ma naai pɔ ń kɛ̀ mɛ́ n suabà. Ta bɛ aafia.

Currently Selected:

Luk 7: Boo2024

Highlight

Copy