Luk 8

Nɔɛ pɔ tɛ́ Yesuziɔ

1Bee gbɛa Yesu lɛ́ bɛbɛ wɛ̃lɛ ń wɛ̃lɛo, mɛɛwiaɔ ń zɔ̃ɛwiaɔ pii, àlɛ waasokɛ, àlɛ kia pɔ Lua kpà baokpanɛ́. Aà iwa gbɛ̃ɔn kuɛplaɔ gɛ̀aanɔ 2ń nɔɛ pɔ à tãagònɛ́ à ń gbãgbã̀ ń ń gyãɔɔ. Maliama pɔ wì mɛ lɔ Maliama Madelɛni, Yesu tãa mɛn soplaɔ gòɛ̀ ku ń guu 3ń Helodi ziia Kuza na Yoanao ń Suzãnao ń nɔɛ pãleɔ dasidasi. Aaìɔ Yesu ń a iwaɔ gwa ń pɔ pɔ aa vĩo.

Pɔwɛnkɛɛlɛa

(Mat 13.1-23; Maa 4.1-25)

4Wà bɔ̀ wɛ̃lɛ ń wɛ̃lɛo wà kã̀aa Yesuzi, ɔ̃ à yãlɛ̀ɛũnɛ́ à mɛ̀: 5Zɔ̃ɛe mɛ́ bɔ̀ gɛ̀ pɔwɛna kɛɛlɛi. Kɛ́ àlɛ kɛɛlɛ, a keeɔ lɛ̀lɛ zɛ́ guu, wà taa'òwà, ɔ̃ bãɔ mɔ̀ wa blè. 6A keeɔ lɛ̀lɛ gbɛsɛɛna musu. Kɛ́ aa bɔ̀lɛ, ɔ̃ aa giigàga, kɛ́ aai mɔsɛ eo yãi. 7A keeɔ lɛ̀lɛ lɛɔ guu, ɔ̃ lɛpiɔ fɛ̀lɛńnɔ sãnu, aa kũ̀aamá. 8A keeɔ lɛ̀lɛ tɔɔlɛ maawa, ɔ̃ aa bɔ̀lɛ aa nɛ'ì basɔobasɔo. Kɛ́ a ò màa, à pũ̀na à mɛ̀: Gbɛ̃́ pɔ nɔ̀sɛ vĩ aà yãpi ma.

9Aà iwaɔ aà là yãpi bɔɔlɛi. 10Ɔ̃ à mɛ̀: Lua á gba zɛ́ à kia pɔ Lua kpà asiiɔ dɔ̃, ãma mi o gbɛ̃kĩniɔnɛ ń yãlɛɛũanɛoɛ, kɛ́ aa gugwa pɔe'esai mɛ́ aa yãma a gbá dɔ̃sai.#Isa 6.9 11Yãpi bɔɔlɛn kɛ: Pɔwɛnapiá Lua yãɛ. 12Zɛ́ guu pɔɔ mɛ́ gbɛ̃́ pɔ aa Lua yãmàɔ ũ, ɔ̃ Ibiisi mɔ̀ à yãpi bɔ̀ an sɔ̃ guu, kɛ́ aasu Lua naaikɛ, i ń suabao yãi. 13Gbɛsɛɛna pɔɔ mɛ́ gbɛ̃́ pɔ aa Lua yãmà aa sì ń pɔnaoɔ ũ, ãma yãpi líɔ zĩ́na vĩ ń guuo. Aaì Lua naaikɛ gĩ́a, ãma tó wà ń yɔ̃́, aaì kpɛkpa. 14Lɛ guu pɔɔ mɛ́ gbɛ̃́ pɔ aa Lua yãmàɔ ũ, ɔ̃ yãkãakɛa ń aizɛɛ yão ń dũnia pɔnakɛao ì kũaamá, aali nɛ'ì à mào. 15Tɔɔlɛ maa pɔɔ mɛ́ gbɛ̃́ pɔ aa Lua yãmà ń nɔsɛpuao ɔ̃ aa kũa ń nɔsɛmaaoɔ ũ. Aaì mɛnafɔ̃ e aa gɛ kãfĩakɛò.

16Wìli filia na wà pɔ́ kulɛwào ge wà dilɛ wulɛbɔ ziɛo. Wì di babanawaɛ, kɛ́ gbɛ̃́ pɔ aalɛ gɛ̃ɔ gupua e yãi. 17Pɔe ku ulɛa kɛ́ à gi bɔi gupuauo. Asiiyãe ku kɛ́ wà gi mai wà o balu guuo. 18Bee yãi à yãma ń laaio. Gbɛ̃́ pɔ pɔ vĩ ɔ̃ Lua a kãfĩɛ̀. Gbɛ̃́ pɔ pɔe vĩ sɔ̃o, pɔ pɔ àlɛ e á vĩ Lua a siwàɛ.

Yesu daɛɔ

(Mat 12.46-50; Maa 3.31-35)

19Yesu da ń aà dãunaɔ mɔ̀ aà kĩi, ɔ̃ aai e sɔ̃̀aazio dasi yãi. 20Ɔ̃ wa ò Yesuɛ: N da ń n dãunaɔ ku bàasi, aa ye n kɔ̃'eai. 21Ɔ̃ a ònɛ́: Gbɛ̃́ pɔ aaì Lua yãma wà zĩkɛwàɔ mɛ́ ma da ń ma dãunaɔ ũ.

Yesu zaa'ĩana zɛa

(Mat 8.23-27; Maa 4.35-41)

22Zĩewa Yesu gɛ̃̀ go'ilɛna guu ń a iwaɔ, ɔ̃ a ònɛ́: Wà bua isida baale. Ɔ̃ aa dà zɛ́u. 23Gɔɔ pɔ aalɛ gɛ́, Yesu gɛ̃̀ ń io. Ɔ̃ zaa'ĩana fɛ̀lɛ isidaa, í lɛ́ ká gó guu, aa ku kai lɛzĩ. 24Ɔ̃ aa sɔ̃̀aazi aa aà vù aa mɛ̀: Mae! Mae! Wálɛ kaalɛ! Ɔ̃ à fɛ̀lɛ gì ĩanaɛ ń í pɔ lɛ́ ń gó zãampapao, ɔ̃ à zɛ̀, gu kɛ̀ kílikili. 25Ɔ̃ a ònɛ́: Á ma naai vĩoa? Ɔ̃ yãpi dìmá, vĩa ń kṹ, ɔ̃ aa òkɔ̃ɛ: Dén gbɛ̃́pi ũi mɔɔ? Baa ĩana ń ío, ì yãdilɛnɛ́, aaì aà yãmaɛ.

Tãaɔ dia sawaɔnɛ

(Mat 8.28-34; Maa 5.1-20)

26Ɔ̃ aa kà Gadala busuu isida baale, Galile busu gukpɛ oi. 27Kɛ́ Yesu bùa sĩsĩa, à kpàaũ ń wɛ̃lɛpi gbɛ̃́ pɔ tãaɔ vĩo. À gɔɔplakɛ̀ ń pɔnaaazio, mɛ́ ìliɔ ku bɛo, sema miagbɛ'ɛɔ guu. 28-29Wì aà yeye ń mɔdaonaɔ, wì aà da líu aà zuukɛa yãi, kási ì mɔdaonapiɔ kɛ̃kɛ̃ɛ, ɔ̃ tãapiɔ i aà zu sɛ̃u. Kɛ́ à Yesu è, ɔ̃ à wiilɛ̀, à azĩa kwɛ̀ aà aɛ, à pũ̀na à mɛ̀: Lua Musude Nɛ Yesu, bɔmɛ wá daaai? N yã na! Nsu ĩadaao. A ò màa kɛ́ Yesu lɛ́ o tãapi gowà yãiɛ. 30Ɔ̃ Yesu aà là à mɛ̀: N tɔ́n kpelewai? Ɔ̃ à mɛ̀: Ma tɔ́n Dasi. Asa tãaɔ kuwà dasiɛ. 31Ɔ̃ tãapiɔ wabikɛ̀ Yesuwa asu onɛ́ wà si gbão zoolo guuo.

32Sawakusan waiɔ ku we, aa kpɛɛsɛ, aalɛ pɔble sĩsĩpɔlɛu. Ɔ̃ tãapiɔ wabikɛ̀ Yesuwa aà ń gba zɛ́ wà dinɛ́. Ɔ̃ Yesu ń gba zɛ́. 33Ɔ̃ tãapiɔ gò gbɛ̃́piwa aa dì sawaɔnɛ. Ɔ̃ sawapiɔ wì ń bao aa sì sòonau, aa kà isiu aa kpàlɛ. 34Kɛ́ an dãnaɔ è màa, aa baalɛ̀, aa gɛ̀ yãpi onɛ́ wɛ̃lɛ guu ń bualoũɔ. 35Ɔ̃ wà bɔ̀lɛ wà gɛ̀ yã pɔ kɛ̀pi gwai. Kɛ́ aa kà Yesu kĩi, aa gbɛ̃́ pɔ tãaɔ gòwàpi è zɔ̃lɛa Yesu gbázĩ. A pɔkasa naaazi, à sù a laaiwa. Ɔ̃ vĩa ń kṹ. 36Kɛ́ gbɛ̃́ pɔ yãpi kɛ̀ ń wáaɔ ònɛ́ lá wà tãadepi gbã̀gbã, 37ɔ̃ Gadala busu gbɛ̃pii awakpà Yesuɛ aà gońla, asa vĩa ń kṹ maamaaɛ. Ɔ̃ à gɛ̃̀ gó guu, a ye tá. 38Gbɛ̃́ pɔ à tãaɔ gòɛ̀pi awakpàɛ̀ à e àɔ kuaanɔ. Yesu gìɛ̀ à mɛ̀: 39Ɛa ǹ ta n bɛ, ní yã pɔ Lua kɛ̀nɛ dau ǹ siunɛ́ pii. Ɔ̃ à tà, à yã pɔ Yesu kɛ̀ɛ kpawakɛ̀ wɛ̃lɛpiu pii.

Zailu nɛ vua ń nɔɛ pɔ ɔkã̀ Yesu ulawao

(Mat 9.18-26; Maa 5.21-43)

40Kɛ́ Yesu ɛ̀a sù, ɔ̃ bila gbãakpàaazi, asa gbɛ̃pii lɛ́ aà dãɛ. 41Ɔ̃ gɔ̃ɛ pɔ dɛ luasisikpɛ dɔaana ũ, wì mɛ Zailu, mɔ̀ wùlɛ a gbɛɛu Yesu gbázĩ, à awakpàɛ̀ aà gɛ́ a bɛ, 42kɛ́ aà nɛ mɛndona lɛ́ ga yãi. Nɛnɔɛpi kà wɛ̃̀ kuɛpla. Kɛ́ àlɛ gɛ́, ɔ̃ bila lɛ́ aà gɛ̃soomble.

43Nɔɛe ku we, au lɛ́ bɔlɛwà, à kà wɛ̃̀ kuɛpla. Pɔ pɔ nɔɛpi vĩ pii a dɛ̀ ɛsɛdeɔ kĩi, ãma gbɛ̃e i fɔ̃ à aà gbã̀gbão. 44Kɛ́ à sɔ̃̀ Yesuzi aà kpɛ, ɔ̃ à ɔkã̀ aà ula lɛ́wa. Wegɔ̃ɔ aà aubɔlɛa zɛ̀. 45Ɔ̃ Yesu mɛ̀: Demɛ ɔkã̀ai? Ɔ̃ gbɛ̃pii mɛ̀ á a yã dɔ̃o. Ɔ̃ Piɛɛ mɛ̀: Mae, bila liaanzi, wàlɛ naɛma. 46Ɔ̃ Yesu mɛ̀: Gbɛ̃e ɔkã̀a, asa má dɔ̃̀ kɛ́ gbãa bɔ̀maguɛ. 47Kɛ́ nɔɛpi è wà a yã dɔ̃̀, ɔ̃ à mɔ̀ ń lualuaao, à wùlɛ a gbɛɛu aà gbázĩ, ɔ̃ à yã pɔ tò a ɔkã̀wà ò gbɛ̃pii wáa ń lá pɔ à aafia è gɔ̃̀ɔo. 48Yesu òɛ̀: Nɔɛ, ma naai pɔ ń kɛ̀ mɛ́ n gbãgbã̀. Ta bɛ aafia.

49Kɛ́ Yesu lɛ́ o màa, gbɛ̃e bɔ̀ luasisikpɛ dɔaanapi bɛ, à mɔ̀ a òɛ̀: N nɛpi kɛ̀sai. Nsu takpa mɛtulu deezi pão. 50Yesu yãpi mà, ɔ̃ a ò Zailuɛ: Nsu to n sɔ̃ vĩo. Ma naaikɛ lé, a gbãgbã. 51Kɛ́ à kà aà bɛ, i wei gbɛ̃e gɛ̀anɔo, sema Piɛɛ ń Zãao ń Zakio ń nɛpi deo ń aà dao. 52Gbɛ̃́ pɔ ku weɔ lɛ́ ɔɔlɔ pii, aalɛ ńzĩa gbɛ̃gbɛ̃. Ɔ̃ Yesu mɛ̀: Ásu ɔɔlɔo. I gao, àlɛ i'oɛ. 53Ɔ̃ wà aà kɛ̀ pɔɔpɔɔ, asa wa dɔ̃̀ à gàɛ. 54Yesu aà kũ̀ a ɔwa, ɔ̃ à pũ̀na à mɛ̀: Nɛnɔɛna, fɛlɛ! 55Ɔ̃ aà wɛ̃ni sù, à fɛ̀lɛ gɔ̃̀ɔ. Yesu mɛ̀ wà pɔblea kpawà. 56Yãpi dì nɛpi de ń aà daowa, ɔ̃ Yesu ònɛ́ aasu yãpi o gbɛ̃e mao.

Currently Selected:

Luk 8: Boo2024

Highlight

Copy