Daa 34

Sikɛũ kusia Dinawa

1Lea nɛnɔɛ Dina pɔ a ì ń Yakɔbuo bɔ̀ busupi nɔɛɔ gwai. 2Kɛ́ busupi ki Hamɔɔ nɛ Sikɛũ, Hivi bui aà è, à kùsiwà, ɔ̃ à wùlɛaanɔ. 3Aà pɔ dɔ wɛ̃ndiapiwa, a yeaazi, ɔ̃ à yãnana'òɛ̀. 4Ɔ̃ Sikɛũ ò a maeɛ: Nɔpi wɛɛlɛmɛɛ mà sɛ́. 5Kɛ́ Yakɔbu mà wà a nɛnɔɛ kpɛbɔ̀, aà nɛɔ ku sɛ̃u ń aà pɔɔ, ɔ̃ à nìlɛ e aa sù. 6Ɔ̃ Sikɛũ mae Hamɔɔ gɛ̀ Yakɔbu lè, à yãpi oɛ̀. 7Kɛ́ Yakɔbu nɛɔ sù ń sɛ̃o gɔ̃̀ɔ, aa yãpi mà, ɔ̃ an nɔ̀sɛ ɔ̃ɔkpà, an pɔ pà maamaa, kɛ́ Sikɛũ yãdɔɔsai kɛ̀ Isailiɔnɛ yãi, à wùlɛ ń Yakɔbu nɛnɔɛo, à yã pɔ dɛ wà kɛo kɛ̀. 8Ɔ̃ Hamɔɔ ònɛ́ à mɛ̀: Ma nɛ Sikɛũ pɔ dɔ á nɛnɔɛwa. Á yã na. À aà kpawà nɔ ũ. 9Wà lɛdoũkɛ, wíliɔ wá nɛnɔɛɔ kpãsãkɔ̃wa. 10Àɔ kuwanɔ, wá busu aɔ dɛ á pɔ ũɛ. À zɔ̃lɛu, íɔ laatau, íɔ tɔɔlɛ vĩ. 11Ɔ̃ Sikɛũ ò Dina mae ń aà dãɔɔnɛ: Á yã na. Pɔ pɔ á ò mà kpawá, má kpaɛ. 12À ãnsueblebɔ lɛ́ damɛɛ zɔ̃ɔ ń gbaɔ dasidasi. Lá pɔ á ò, má kpaɛ. À nɛnɔɛpi kpaa.

13Ɔ̃ Yakɔbu nɛɔ wè Sikɛũ ń aà mae Hamɔɔowa ń mɔafilio, kɛ́ Sikɛũ ń dãe kpɛbɔ̀ yãi. 14Aa ònɛ́: Wá fɔ̃ wà bee kɛo, wá fɔ̃ wà wá dãe kpa gyafɔɔdewao, asa beeá wiyãɛ wá kĩi. 15Wá we á yãio, mɛ́ i kɛ a gɔ̃ lan wapiɔwa, á gɔ̃ɛɔ tɔ̃zɔ̃̀ pii baasio. 16Tó a tɔ̃zɔ̃̀, wá wá nɛɔ kpãsãwá, wí á pɔɔ sɛ nɔ ũ, wíɔ kuánɔ, wí gɔ̃ bui doũ. 17Ãma tó i we wá yãio, mɛ́ i tɔ̃zɔ̃o, wá wá dãe sɛ wà taòɛ. 18Yãpi kɛ̀ Hamɔɔ ń a nɛ Sikɛũoɛ na. 19Ɛwaasopi yãpi gɔ̃̀gɔ̃ kpakpa, kɛ́ Yakɔbu nɛnɔɛ yã kàaagu yãi, mɛ́ a bɛɛɛ vĩ dɛńla a mae bɛdeɔ guu.

20Hamɔɔ ń a nɛ Sikɛũo gɛ̀ ń wɛ̃lɛ bĩibɔlɛu, ɔ̃ aa yã'ò ń wɛ̃lɛdeɔ aa mɛ̀: 21Gbɛ̃́piɔ yãe vĩwanɔo. Wà to aaɔ ku wá busuu, aaiɔ laatau, asa busupi zɔ̃ɔɛ, a mɔwá. Wá ń nɛnɔɛɔ sɛ́, wí wá pɔɔ kpamá. 22Gbɛ̃́piɔ sɔ̃ aa we wàɔ kuwanɔ kɛ́ wà gɔ̃ bui doũo, mɛ́ i kɛ wá gɔ̃ɛɔ wa tɔ̃zɔ̃̀ lá ampiɔwa wapii baasio. 23An pɔtuoɔ ń ń aizɛɛɔ ń ń zuɔ pii a gɔ̃ wá pɔ ũo le? Wà weinɛ́, kɛ́ aaɔ kuwanɔ. 24Wɛ̃lɛpideɔ Hamɔɔ ń a nɛ Sikɛũo yãmà, ɔ̃ gɔ̃ɛɔ tɔ̃zɔ̃̀ mpii.

25A gɔɔ aaɔ̃dezĩ kɛ́ aa ku ń wãwão mɛ́ aa ku ń yãe laasoooo, Yakɔbu nɛ gbɛ̃ɔn plaɔ Simɛɔ ń Levio, Dina vĩiɔ, an baade a fɛ̃nda sɛ̀, aa sì wɛ̃lɛu, aa gɔ̃ɛɔ dɛ̀dɛ pii. 26Aa Hamɔɔ ń a nɛ Sikɛũo dɛ̀dɛ, ɔ̃ aa Dina sɛ̀ aa bɔ̀ò Sikɛũ kpɛ́u aa tàò. 27Wɛ̃lɛdeɔ dɛdɛa gbɛa Yakɔbu nɛɔ mɔ̀ aa wɛ̃lɛ pɔɔ nàaa, kɛ́ wà widà ń dãewa yãi. 28Aa ń sãɔ ń ń bleɔ sɛ̀lɛ ń ń zuɔ ń ń zaa'ĩnaɔ, pɔ pɔ ku wɛ̃lɛ guuɔ ń pɔ pɔ ku ń búaɔ pii. 29Aa ń aizɛɛɔ sɛ̀lɛ pii ń ń nɛɔ ń ń nɔɛɔ ń pɔ pɔ ku ń bɛɔ pii.

30Ɔ̃ Yakɔbu ò Simɛɔɛ ń Levio: A gu ɔ̃ɔkpàmɛɛ. Kanaaɔ ń Pɛliziɔ ń busu la buipãleɔ aaɔ ye ma gĩyãio. Lá wá dasio, tó aa lìawázi mɛ́ aa sìwágu, aa ma dɛ ń ma buiɔ piiɛ. 31Ɔ̃ aa wèwà aa mɛ̀: Kɛ́ à wá dãe dìlɛ kaalua ũ, a maa yã?

Currently Selected:

Daa 34: Boo2024

Highlight

Copy