Daa 35

Lua baaadaa Yakɔbugu Bɛtɛli

1Lua yã'ò Yakɔbuɛ à mɛ̀: Fɛlɛ ǹ ta Bɛtɛli, ní zɔ̃lɛ we. Ma gbagbakĩi kɛ we, asa we ma bɔu ma mɔma gɔɔ pɔ nlɛ baalɛ n vĩiɛ.#Daa 28.10-22 2Ɔ̃ Yakɔbu ò a bɛdeɔnɛ ń gbɛ̃́ pɔ kuanɔɔ pii à mɛ̀: À dii zĩlo pɔ á vĩɔ kɔlɛ, í zu'o, í á pɔkasaɔ lilɛ, 3wí fɛlɛ wà ta Bɛtɛli. Má Lua gbagbakĩi bo we, asa à dɔ̀malɛ ma taasikɛgɔɔɛ, a kumanɔ gu pɔ ma gɛu piiɛ. 4Ɔ̃ aa dii zĩlo pɔ aa vĩɔ kpàwà ń swãli pɔ aa daaɔ, ɔ̃ a vĩ̀lɛ gbɛ̃́nɛ lí pɔ ku Sikɛũ saɛ gbau. 5Kɛ́ Yakɔbu ń a nɛɔ dà zɛ́u, Lua tò vĩa wɛ̃lɛ kãinadeɔ kũ̀ maamaa, ɔ̃ gbɛ̃e i pɛlɛńzio. 6Ɔ̃ Yakɔbu ń gbɛ̃́ pɔ kuaanɔɔ pii aa kà Luzu pɔ wì mɛ tia Bɛtɛli, Kanaa busuu. 7À sa'okĩi bò we, ɔ̃ à tɔkpà gupiɛ Bɛtɛli Lua, asa wekĩi Lua bɔ̀ à mɔ̀uwà gɔɔ pɔ àlɛ baalɛ a vĩiɛ. 8Debola pɔ dɛ Lɛbɛka gwana ũ yãa gà weɛ, ɔ̃ wà aà vĩ̀ gbɛ̃́nɛ lí gbau Bɛtɛli saɛ. Ɔ̃ wà tɔkpàɛ̀ Ɔɔlɔlizĩ.

9Lua bɔ̀ à mɔ̀ Yakɔbuwa lɔ aà sua ń Mɛsɔpɔtamio gbɛa, à baaadàaagu 10à mɛ̀: N tɔ́n Yakɔbu, ãma wali onɛ Yakɔbu lɔo, wali onɛ sa Isailiɛ. Màa à tɔkpàɛ̀ Isaili. 11Lua òɛ̀ lɔ: Lua Gbãapiiden ma ũ. Àɔ nɛ'i àɔ kãfĩ. Bui zɔ̃ɔ a bɔ n kĩi, aaɔ dasi, mɛ́ n buieɔ aaɔ dɛ kiaɔ ũ. 12Má busu pɔ má kpà Ablahaũ ń Izaakiowa kpama ń n buiɔ n kpɛ. 13Ɔ̃ Lua fɛ̀lɛ bɔ̀ gu pɔ à yã'òɛ̀u. 14Yakɔbu gbɛpɛ̀lɛ gu pɔ Lua yã'òɛu dɔngubɔ ũ. À itɔ̃̀lɛwà, à nisikàwà. 15Ɔ̃ Yakɔbu tɔkpà gu pɔ Lua yã'òuɛpiɛ Bɛtɛli.

Lasɛli ń Izaakio gaa

16Ɔ̃ aa fɛ̀lɛ Bɛtɛli aa dà zɛ́u. Kɛ́ aa kà kãi ń Ɛflatao, Lasɛli nɛ'igɔɔ kà, ɔ̃ nɛ'i zĩ'ũkũ̀. 17Nɛ'iwãwã zɔ̃ɔkũ̀, ɔ̃ nɔɛ nɛ'ina òɛ̀: Nsu to vĩa n kũo, n nɛgɔ̃ɛ ì lɔ. 18Lasɛli yɛ̃ɛɛ vĩ lɔo, àlɛ ga, ɔ̃ à tɔkpà a nɛpiɛ Bɛ̃nɔni,#35.18 Bee mɛ̀ ma taasi nɛ ɔ̃ aà mae tɔkpàɛ̀ Bɛ̃yãmɛ.#35.18 Bee mɛ̀ ɔplaa nɛ 19Kɛ́ Lasɛli gà, wà aà vĩ̀ Ɛflata pɔ wì mɛ tia Bɛtɛlɛũ zɛ́u. 20Yakɔbu yãdɔngugbɛ pɛ̀lɛ aà miawa. Lasɛli miagbɛpi ku we e ń a gbão.

21Isaili ɛ̀a dà zɛ́u, ɔ̃ à bookpà sãdãnaɔ gugwakĩi kpɛle. 22Gɔɔ pɔ a ku busupiu ɔ̃ Lubɛni gɛ̀ ì ń Bila, Yakɔbu nɔ pɔ i mɛsɛdilɛɛ̀oo. Yakɔbu yãpi mà.

Yakɔbu nɛgɔ̃ɛɔ kuɛplaɛ. 23Lea nɛgɔ̃ɛɔ tɔ́ɔn kɛ: Yakɔbu yoa Lubɛni, Simɛɔ, Levi, Yuda, Isakaa, Zabulɔni. 24Lasɛli nɛɔn Yosɛfu ń Bɛ̃yãmɛo ũ. 25Lasɛli zɔnɔɛ Bila nɛɔn Dã ń Nɛfatalio ũ. 26Lea zɔnɔɛ Zilipa nɛɔn Gada ń Asɛɛo ũ. Nɛgɔ̃ɛ pɔ wà ń í ń Yakɔbuo Mɛsɔpɔtamiɔn we.

27Ɔ̃ Yakɔbu kà a mae Izaaki kĩi Mamale. A ku Kiliataaba pɔ wì mɛ tia Hɛblɔ̃ saɛ, gu pɔ Ablahaũ ń Izaakio zɔ̃̀lɛu. 28Izaaki kà wɛ̃̀ ɔaa do baosai, 29à zikũ̀ taotaoɛ, ɔ̃ à gà, à zù a gbɛ̃́ɔ guu, ɔ̃ aà nɛɔ Esau ń Yakɔbuo aa aà vĩ̀.

Currently Selected:

Daa 35: Boo2024

Highlight

Copy