Zĩn 2

Lua Nisĩna mɔa

1Kɛ́ Pãteko#Lev 23.15-16 dikpɛgɔɔ kà, aa ku gudoũ mpii. 2Kãndo aa kɔ̃fĩ mà, à bɔ̀ musu lan zaa'ĩan gbãawa, ɔ̃ à kpɛ́ pɔ aa zɔ̃̀lɛu wã̀. 3Aa pɔ è lan tɛlɛpiɔnaɔwa, à fã̀aa à nàna an baade miwa. 4Lua Nisĩna dìnɛ́ mpii, ɔ̃ aa nà yãebui'oawa lá Nisĩnapi dànɛ́ aa owa.

5Yudaeɔ ku Yelusalɛũ we, luayãmana pɔ aa bɔ̀ dũnia busu pii guuɔ ũ. 6Kɛ́ aa ń zɔapi mà, aa kã̀aańzi dasidasi, ɔ̃ aa bilikɛ̀, kɛ́ aa mà aalɛ ń baade pii buiyã'o yãi. 7Yãpi ń kṹ gbãa à bɔ̀ ń saɛ aa mɛ̀: Yã'onapiɔá Galiledeɔnɛ piio lò? 8Bɔyãi wá mà aalɛ wá baade buiyã'oi? 9Paatiɔ ń Mɛdɛɔ ń Elaũɔn wá ũ ń gbɛ̃́ pɔ ku Mɛsɔpɔtamiɔ ń Yudeo ń Kapadosio ń Pɔ̃ntuo ń Azio 10ń Filizio ń Pamfilio ń Egipio ń Libi busu pɔ ku Silɛni saɛo ń gbɛ̃́ pɔ bɔ̀ Lomaɔ. 11Yudaɔ ń gbɛ̃́ pɔ aa ń zɛ́ sɛ̀ɔn wá ũ ń Kɛlɛtiɔ ń Alabuɔ, ɔ̃ wá mà, aalɛ Lua yãbɔnsaɛkɛaɔ o ń wá baade buiyão. 12Yãpi ń kṹ gbãa aa bilikɛ̀, aalɛ kɔ̃lala aa mɛ̀: Yãpi dɛ kpelewan wei? 13Gbɛ̃eɔ sɔ̃ aalɛ ń laanikɛ aa mɛ̀: Í mɛ́ ń kã́.

Piɛɛ waasokɛa

14Ɔ̃ Piɛɛ fɛ̀lɛ zɛ̀ ń a gbɛ̃kĩni gbɛ̃ɔn kuɛdoɔ, à yã'ò gbãugbãu à mɛ̀: Á Yudaɔ ń gbɛ̃́ pɔ ku Yelusalɛũɔ pii, tó á ye à yãpi dɔ̃, à swãkpa ma yãi. 15Í i gbɛ̃́piɔ kã lá álɛ ewao, asa kɔɔ mɔ̀ kɛ̃okwiɛ. 16Ãnabi Yoɛli dɔ̀aa à yãɛ bee ò à mɛ̀:

17Lua mɛ̀: Gɔɔgbɛzãzĩ

má a Nisĩna pisi gbɛ̃piiwa,

á nɛgɔ̃ɛɔ ń á nɛnɔɛɔ i ãnabikɛkɛ,

á ɛwaasoɔ i wɛpungu'e,

á maezɔ̃ɔɔ i yãɔ e iu.

18Gɔɔ bee má a Nisĩna pisi

ma zɔblenaɔwa gɔ̃ɛɔ ń nɔɛɔ pii

aai ãnabikɛkɛ.

19Má seelaɔ kɛ musu,

má yãbɔnsaɛɔ kɛ dũniau,

au ń tɛ́o ń tɛluo aɔ ku.

20Ĩatɛ̃ a siakũ,

mɔvua a tã lan auwa

e Dii mɔgɔɔ zɔ̃ɔ gawide àɔ mɔ́,

21Dii sisinaɔ i bɔ pii.#Yoɛ 3.1-5

22Isailiɔ, à yãɛ bee ma. Lá á dɔ̃ ázĩawa, Lua tò a Yesu Nazalɛti dɛa a gbɛ̃́ ũ seela è dabudabuɔ ń yãbɔnsaɛ pɔ a tò Yesupi kɛ̀ á guuɔ yãi. 23Lua zɛ̀ò a pɔeã ń a dɔ̃ao guu kɛ́ wà aà kpawá, ɔ̃ á tò luayãdɔ̃nsaiɔ aà pà líwa aa dɛ̀.#Luk 23.33 24Ɔ̃ Lua ga ba pòlowà, à aà vù,#Luk 24.6 asa a zɛ́ ku kɛ́ ga fɔ̃ àɔ aà kũao. 25Asa Davidi aà yã'ò à mɛ̀:

Miɔ Dii e ma wɛ́u gɔɔpii,

lá a ku ma ɔplaai, má kpaguao.

26A yãi ma pɔ ìɔ na,

ma nɔ̀sɛ ìɔ yaalɔ,

ma wɛ́ dɔi baa ma mɛ aɔ aafiaɛ,

27asa ńyɔ̃ ma to miauo,

ńyɔ̃ wei n gbɛ̃́ pɔ a kua adoa yaikɛo.

28N ma ka wɛ̃ni zɛ́wa,

n kĩi pɔna ìɔ pɛɛau.#Soũ 16.8-11

29Ma gbɛ̃́ɔ, má fɔ̃ mà wá dezikaau Davidi yã'oɛ́ wasawasa. À gà, wà aà vĩ̀, aà mia ku wɛ̃lɛu la e ń a gbão. 30Aà ãnabikɛ guu a dɔ̃̀ kɛ́ Lua lɛgbɛ̃̀ɛ à mɛ̀ á a buie kpa a kpalau.#Soũ 132.11; 2 Sam 7.12-13 31Ɔ̃ Davidi dɔ̀aa à Mɛsi vua yã'ò à mɛ̀:

Lua a aà to miauo,

a wei aà yaikɛo.

32Yesupi ɔ̃ Lua aà bɔ̀ gau. A seeladeɔn wá ũ wapii. 33Zɔ̃lɛa a Mae Lua ɔplaai à aà Nisĩna pɔ à a lɛgbɛ̃̀wɛ̃ɛ èwà, ɔ̃ a pìsiwɛ̃ɛ. Yã pɔ álɛ e mɛ́ álɛ ma tiaɛ bee bɔ̀ weɛ. 34Asa i kɛ Davidi mɛ́ fɛ̀lɛ gɛ̀ luabɛo à mɛ̀:

Dii ò ma Diiɛ aà zɔ̃lɛ a ɔplaai

35e àɔ aà ibɛɛɔ kɛɛ̀ aà gbadibɔ ũ.#Soũ 110.1

36Isailiɔ, àɔ dɔ̃ sãasã kɛ́ Yesu pɔ á pà líwapi ɔ̃ Lua aà dìlɛ Dii ũ, Mɛsi ũ.

37Kɛ́ aa yãpi mà, à ń sɔ̃ zɔ̃̀, ɔ̃ aa Piɛɛ ń zĩna kĩniɔ là aa mɛ̀: Gbɛ̃́ɔ, wá sɛ́ kpelewa ni? 38Ɔ̃ Piɛɛ ònɛ́: Á baade nɔsɛlilɛ, í da'ilɛkɛ ń Yesu Kilisi tɔ́o, á duunaɔ i kɛ̃wá, Lua i á gba a Nisĩna. 39Asa lɛ́ pɔ Lua gbɛ̃̀pi dɛ á pɔ ũɛ ń á nɛɔ ń gbɛ̃́ pɔ ku zã̀zãɔ, gbɛ̃́ pɔ Dii wá Lua a ń sisi à ń sɛ́piɔ pii. 40À yãpãleɔ ònɛ́ dasi, à nàɛmá à mɛ̀: À ázĩa bɔ gbãgbɛ̃ vãiɛ beeɔ guu. 41Ɔ̃ gbɛ̃́ pɔ aa aà yãsìɔ da'ilɛkɛ̀. Zĩ́ bee ɔ̃ wà kã̀fĩ an guu gbɛ̃ɔn ɔaasɔsɔo lɛɛ aaɔ̃ (3 000).

Yesu naaikɛnaɔ kua ń kɔ̃o

42Aa laaidɔ̀ zĩnaɔ yãdaanɛ́wa ń gbɛ̃kɛkɛakɔ̃ɛo ń Dii blɛbleao ń wabikɛao. 43Zĩnapiɔ lɛ́ dabudabuɔ ń yãbɔnsaɛɔ kɛ, ɔ̃ vĩa gbɛ̃pii kũ̀. 44Dii naaikɛnaɔ pii gãli doũ. An pɔvĩaɔ dɛ ampii pɔ ũɛ. 45Tó aa ń pɔvĩaɔ yìa, aaì a ɔ̃a kpakɔ̃wa lá gbɛ̃́ a bɔɔlɛ vĩwa. 46Lagulɛdɔ aaìɔ kɔ̃kãaa Lua ua ń lɛdoũo, aaìɔ Dii blɛ ble kɔ̃ bɛ, aaìɔ pɔble ń pɔnao ń nɔsɛmɛndoo. 47Aaìɔ Lua taasilɛ mɛ́ aaìɔ na ń gbɛ̃piio. Dii ìɔ gbɛ̃́ pɔ alɛ ń suabaɔ kãfĩ ń guu lagulɛdɔ.

Currently Selected:

Zĩn 2: Boo2024

Highlight

Copy