Zĩn 1

Yesu taa luabɛ

1Teofili, má ònɛ ma lá sɛ̃ia guu lá Yesu kɛ̀ ń yã pɔ a dànɛ́ɔ pii za a daalɛgɔɔ#Luk 1.1-4 2e gɔɔ pɔ à yãdìlɛ a zĩnaɔnɛ ń Lua Nisĩna gbãao, ɔ̃ Lua aà sɛ̀ tàò a kĩi. 3Asa aà gaa gbɛa à azĩa ɔlɔ̀nɛ́, ɔ̃ aa dɔ̃̀ seasai a bɛ̃́ɛ. À azĩa ɔlɔ̀nɛ́ e gɔɔ bla, à kpala pɔ Lua kpà yã'ònɛ́. 4Kɛ́ aa kãaaa, ɔ̃ a ònɛ́: Ásu bɔlɛ Yelusalɛũo. Àɔ lɛ́ pɔ ma Mae gbɛ̃̀ɛ́ dã́ lá ma a yã'òɛ́wa.#Luk 24.49 5Asa Zãa gbɛ̃́ɔ da'ilɛkɛ̀ ń íoɛ, ãma gɔɔplanaɛa má á da'ilɛkɛ ń Lua Nisĩnaoɛ.#Luk 3.16

6Lá aa kãaaa màa, ɔ̃ aa aà là aa mɛ̀: Dii, gɔɔ bee ɔ̃ ńyɔ̃ Isailiɔ kpala vua? 7A wèmá à mɛ̀: Á a zɛ́ vĩ àɔ a gɔɔ ge zaa pɔ ma Mae dìlɛ ń azĩa ikoo dɔ̃o. 8Tó Lua Nisĩna dìɛ́, á gbãa'e, íɔ dɛ ma seeladeɔ#Mat 28.19; Maa 16.15; Luk 24.47-48 ũ Yelusalɛũ ń Yude busuo gupiiu ń Samali busuo e à gɛ pɛò dũnialɛwa. 9Yãpi oa gbɛa Lua aà sɛ̀ ń wáa e à gɛ̀ sã̀alɛ ń wɛ́wa lounaau.#Luk 24.50-51 10Aà taa guu, lá an wɛ́ pɛ́ musuwa, gbɛ̃ɔn plaeɔ bɔ̀, aa mɔ̀ zɛ̀ ń saɛ, aa pɔkasa puaɔ daa. 11Aa mɛ̀: Galile busudeɔ, akɛa á zɛa álɛ musu gwai? Yesu pɔ Lua aà bɔ̀ á guu à tàò a kĩipi, a ɛa mɔ́, lá á è àlɛ tá weɛwa.

Yudasi gɛ̃ɛ dilɛa

12Ɔ̃ aa pìla Kukpɛ sĩ̀sĩwa aa sù Yelusalɛũ. Sĩ̀sĩpi zã̀ ń Yelusalɛũo lan lon do taawaɛ. 13Kɛ́ aa kà, ɔ̃ aa gɛ̃̀ kpɛdiakɔ̃au musu, gu pɔ aa kuu yãa. Piɛɛ ku we ń Zãao ń Zakio ń Ãndeleo ń Filipio ń Tomao ń Batelemio ń Matieo ń Alafe nɛ Zakio ń Simɔ Ginzĩaoo ń Zaki nɛ Yudasio.#Luk 6.14-16 14Ampii aa ńzĩa kpà wabikɛawa ń lɛdoũo ń Maliama Yesu dao ń Yesupi dãunaɔ ń nɔɛ kĩniɔ.

15Gɔɔ bee Piɛɛ fɛ̀lɛ zɛ̀ a gbɛ̃́ pɔ aa kà gbɛ̃ɔn basoolo taawaɔ guu à mɛ̀: 16Gbɛ̃́ɔ, yã pɔ Davidi ò ń Lua Nisĩna gbãao Yudasi pɔ dɔ̀aa gbɛ̃́ pɔ aa Yesu kũ̀ɔnɛ musu, bee kũ̀ɛ̀, ɔ̃ à kɛ̀ màa. 17A dɛ wá gbɛ̃do ũ yãaɛ, aà baa ku wá zĩɛ bee guu. 18Wà tɔɔlɛ lù ń ɔ̃a pɔ a è a vãikɛa musupio, ɔ̃ à lɛ̀lɛ aà mi pɛ̀lɛ à pũ̀na, ɔ̃ aà nɔnaɔ bɔ̀lɛ pii. 19Yelusalɛũdeɔ pii aa yãpi mà, ɔ̃ aa tɔkpà gupiɛ Akɛdama ń ń bui yão. Bee mɛ̀ Gbɛ̃́dɛna tɔɔlɛ.#Mat 27.3-8 20Wà aà yã'ò Soũ lá guu wà mɛ̀:

Aà bɛ a gɔ̃ uazĩ ũɛ,

gbɛ̃e aɔ ku a guu lɔo.#Soũ 69.26

Wa ò lɔ:

Sema gbɛ̃pãle zɔ̃lɛ aà gbɛu.#Soũ 109.8

21-22Ayãmɛto gbɛ̃́ pɔ aaìɔ tɛwázi gɔɔ pɔ wá sãnu ń Dii Yesuo za Zãa gbɛ̃́ɔ da'ilɛkɛgɔɔ e gɔɔ pɔ Lua aà bɔ̀ wá guuɔ, wà ń gbɛ̃do sɛ aàɔ dɛ aà vua seelade ũwanɔ. 23Ɔ̃ wà gbɛ̃ɔn plaɔ sɛ̀, Yosɛfu pɔ wì mɛɛ̀ Baasaba, wì oɛ̀ lɔ Yusitu, ń Matiasio. 24Ɔ̃ aa wabikɛ̀ aa mɛ̀: Dii, ń gbɛ̃pii nɔ̀sɛ dɔ̃. Gbɛ̃ɔn plaɛɔ guu gbɛ̃́ pɔ ń sɛ̀ ɔlɔwɛ̃ɛ, 25kɛ́ aà ɔ àɔ ku wá zĩnaɔ zĩpi guu yãi, zĩ pɔ Yudasi bɔ̀u à gɛ̀ gu pɔ kɔ̃sìanɔ guu. 26Ɔ̃ aa tɛlɛpà gbɛ̃ɔn plapiɔ yãmusu. Matiasi tɛlɛblè, ɔ̃ aa aà dà zĩna gbɛ̃ɔn kuɛdoɔ guu.

Currently Selected:

Zĩn 1: Boo2024

Highlight

Copy