Zlr 44

Tsanavatá ghali ta Biŋyamiŋ

1Ka mnanaftá Yusufu ta tsa mndu ta nghapta ka həga ni ya, kaʼa mantsa: « Ndaghanam ndagha ta skwa zay ma buhwa na mnduha na, manda ya dzaʼa laviŋta həŋ ta klay, ka fafunusta ka ta tseda inda taŋ ta wa buhwa inda taŋ. 2Ta wa buhwa tsa zwaŋ ka sagəŋ katakata ya, ka funusta ka ta leghwa ɗa, tsa ka kfura tsedi ya, nda tsedi si dzaʼa kəl tsi ka skwa hya, » kaʼa. Ka magatá tsa mndu ya manda ya mnana Yusufu. 3Tsaɗakwa vli, ka zliŋtá lu ta tsa mnduha ya, ka laghu həŋ nda kəɗiha taŋ. 4Ka sab həŋ ma luwa, ta zaghu a həŋ diʼiŋ wu, ka Yusufu nda tsa mndu ta nghapta ka həga ni ya mantsa: « Sliʼaf sliʼa ka hwayiŋta ka ta tsa mnduha ya, ka ksafta ka ta həŋ, ka da ɗawaŋta da həŋ. “Kabgawu kəl kuni ka plamtá zɗaku nda ŋaslu na? 5Nya kəl kuni ka ghalagaghutá leghwa sa skwa mghama ɗa, nda ya ta kəl tsi ka wya skwa ni na? Ɗina a skwi maga kuni wu,” ka ka dzaʼazlay, » kaʼa.

6Ka laghu tsa mndu ya ksaftá həŋ, ka mnanatá tsa gwaɗa ya ta həŋ manda tsaya. 7Ka həŋ mantsa: « Nya kəl ka ka mna gwaɗa mantsa ní, mghama ɗa? Haɗ kwalvaha gha dzaʼa walaŋtá maga skwi mantsa wa! 8Tsa tsedi slanagha ŋni ta wa buhwa ŋni ya kay ní, vraganagha vra ŋni daga ma haɗika Kanʼana ra? Waká ŋni dzaʼa ghala tsedi, ka dasu a tsi ma həga ga mghama gha na? 9Ka ma buhwa dər wa mataba aŋni kwalvaha gha dzaʼa slanaghata lu ta tsa leghwa ya, dzata! Ta nzatá vərɗa aŋni ka vuʼa gha mghama ɗa, » ka həŋ. 10Ka tsa mndu ya mantsa: « Ndanana tama, ka nza tsi manda ya gwaɗa kuni. Ka da wa dzaʼa slanaghata lu ta tsa leghwa ya, dzaʼa nzakway tsa mndu ya ŋa vuʼa ɗa, flaʼu vgha sanlaha, » kaʼa. 11Ka gi hlagatá dər wa ma həŋ ta buhwa ni ta haɗik, ka gwanay. 12Ka kwatsaɗ tsi, ka zlraftá tsi ta ŋa mali, ka kɗiŋta nda ŋa tsa sagəŋ gudzekw ya. Ka slanaghata lu ta tsa leghwa ya ma buhwa Biŋyamiŋ. 13Tsaya tama, ka kwahiŋtá həŋ ta lgut ta vgha#44:13 Kwahiŋtá lgut ta vgha ná, tsaya maraŋtá kuzlakwa gwaɗa gruŋta lu ta ŋuɗuf. taŋ, ka varadanaftá həŋ ta buhwa taŋ ta kəɗihha taŋ, ka vrəglaghata da luwa.

Vlata Yahuda ta ghəŋa ni da vla Biŋyamiŋ

14Ka lam i Yahuda nda zwana ma ni da həga ga Yusufu, tata nzakwa ni hada ta laghu a wu, ka zlambata zluzlumbruh ta kəma ni. 15Ka Yusufu nda həŋ mantsa: « Wati ma slna na maga kuni? Sna a kuni kazlay mndu manda na iʼi na na, ta sunay yu ta skwi kəʼa ra? » kaʼa 16Ka Yahuda mantsa: « Nu dzaʼa mnəglaghata ŋni tama mghama ɗa? Waká ŋni dzaʼa mnay? Waká ŋni dzaʼa waɗaptá ghəŋa ŋni? Ksaf ksa Lazglafta ta aŋni kwalvaha gha, gwal dmaku aŋni. Nda nza ŋni ka vuʼa gha, mghama ɗa, nda na mndu slanagha lu ta leghwa ma buhwa ni na tani, » kaʼa. 17Ka Yusufu mantsa: « Mantsa a wu! Maga a yu mantsa wa! Tsa mndu slanagha lu ta leghwa da tsi ya, tsaya dzaʼa nzakway ka vuʼa ɗa. Pɗakwa ghuni ya, lawa la ka ɓhata kuni nda vgha ta zɗaku, ka slanaghatá da ghuni, » kaʼa.

18Ka gavanavatá Yahuda təv Yusufu, kaʼa mantsa: « Mghama ɗa, ka guram kagha guli nda mghama Masar. Tsaya tama, kdəkkdək, ma guf ŋuɗufa gha ta ghəŋa kwalva gha kabga ka gragra kagha nda Firʼawna. Ama vliha vla ta tvi ka mnaghata yu ta sana skwi. 19Ma taŋtaŋa səla ŋni mghama ɗa, ka ka ɗawaŋta da kwalvaha gha na: “Mamu da ghuni ra? Ta mamu sana zwaŋama ghuni ra?” kəʼa. 20Ka ŋni nda kagha mghama ɗa na: “Ta tekeʼa da ŋni nda hala, ta tekeʼa sagəŋa ŋni ta ka zwaŋ ya tsi ma halaku. Ɗvu ɗva da ŋni katakata, kabga tsaya zwaŋ ta pɗata turtuktuk da markwa taŋ, mtu mta zwaŋama ŋni,” ka ŋni. 21Ka ka nda kwalvaha gha mantsa: “Klaɗikwa kla, ta kumay yu ta nghaŋta,” ka ka. 22Ka rusaghaftá ŋni mghama ɗa: “Laviŋ a tsa zwaŋ ya ta tsata vgha nda da ni wu, ka klaghu kla lu da da ni, dzaʼa mtu mta da ni,” ka ŋni. 23“Ka klagagha a kuni ta tsa sagəŋa ghuni ya mista ghuni wu ná, haɗ kuni dzaʼa nghəglaŋtá kəma ɗa wu,” ka ka nda kwalvaha gha. 24Ka vraghutá ŋni slanaghatá da ŋni kwalva gha, ka mnanaftá ŋni ta skwiha mnaŋna ka mghama ɗa. 25Ka da ŋni mantsa: “Vrawa vra da skwagistá skwa zay kiʼa,” kaʼa. 26Ka ŋni nda tsi mantsa: “Laviŋ a ŋni ta dzaʼa wu: Ka kawadaga sagəŋa ŋni nda aŋni katsi, ta dzaʼa ŋni. Ama laviŋ a aŋni ta lami da tsa mndu ya, ka haɗ sagəŋa ni kawadaga nda aŋni wu,” ka ŋni nda tsi. 27Ka kwalva gha, da ɗa mantsa: “Nda sna kaghuni ka ghəŋa ghuni kazlay his kweŋkweŋ yihata markwa ini ta zwana zgwana kəʼa. 28Ka zwaɗutá sani turtuk mataba taŋ, ta grafta yu na nimtak ta ksata ka kwahanapta, ngha a yu ha gita wa. 29Ta ghəŋa tsa ná, ta kumay kuni ta kləgəltá nana guli? A ka slanaghaha skwi, kaghuni dzaʼa kladatá na ɓata ghəŋa ɗa na da haɗik nda ŋərata ŋuɗuf,” » kaʼa. 30« Ndanana, ka vradap vra yu slanaghatá da ɗa kwalva gha, ka haɗ na zwaŋ ɗvu tsi ma ŋuɗufa ni na kawadaga nda aŋni wu katsi, 31dzaʼa mtu mta, ka haɗ na zwaŋ na kawadaga nda aŋni. Kwalvaha gha dzaʼa kladatá ɓata ghəŋa kwalva gha, da ŋni da haɗik nda ŋərata ŋuɗuf. 32Iʼi kwalva gha ta klafta dguv ta ghəŋa ɗa ta gwaɗa ta na zwaŋ na, ka yu nda tsi: “Ka vrəgaghagha a yu wu, ka mndu ta gaghatá dmaku dzaʼa ngha ka ta iʼi ha kɗekedzeŋ.” 33Wya dzvu, zlana zla ta kwalva gha ka nzata tsi ka vuʼa gha mghama ɗa, ma vla na zwaŋ na, ka vra tsatsi kawadaga nda zwana ma ni. 34Waká yu dzaʼa lagha da da ɗa, ka haɗ na zwaŋ na kawadaga nda iʼi? A iy! Va a yu ta ngha ɓadzaku dzaʼa slanaghatá da ɗa wu, » kaʼa.

Currently Selected:

Zlr 44: xed

Highlight

Copy