Zlr 45

Maraŋta Yusufu ta ghəŋa ni da zwana ma ni

1Lavəgliŋ a Yusufu ta spaftá skwi ma ŋuɗufa ni ta wa ira inda gwal kawadaga wu, « Hlidiŋwa hla ta inda mnduha ta kəma ɗa, » kaʼa nda həŋ. Haɗ mndu kawadaga nda Yusufu ma fitika maraŋta ni ta ghəŋa da zwana ma ni wa. 2Ka wahu tsi ta wahu nda lwi dagala, ha ka snaŋtá la Masar nda gwal ma həga ga Firʼawna tani. 3Ka Yusufu nda zwana ma ni mantsa: « Yusufu yu! Ta nda iri da ɗa? » kaʼa. Triɗ sna a zwana ma ni ta skwi ŋa zlghanaftá wu, kabga ta ghudzaku həŋ ta kəma ni. 4Ka Yusufu nda zwana ma ni mantsa: « Gavagaghawa gava ta vata iʼi, » kaʼa. Ka gavadaghatá həŋ. « Iʼi tsa Yusufu zwaŋama ghuni, skwap kuni ŋa klagaghuta da Masar ya kay ya. 5Ndanana ná, ma ɓasə kuni ta ŋuɗuf, ma nza kuni nda rwatá vgha ta ghəŋa vəl skwapta ghuni ta iʼi hadna, kabga ŋa nzulaghunatá hafu kəl Lazglafta ka ghunaktá iʼi da hadna makəɗ kaghuni. 6Mahisa vaku na ma maya, ta tekeʼa a vaku hutaf ma maya lu ta na haɗik na. Ma tsa vakuha ya, haɗ ta a hva, dər tska skwi ta vwah wa. 7Lazglafta ta tiŋlaghutá ghunaktá iʼi ŋa nzulaghunatá hafu ta na haɗik na, nda ma na glakwa mbaku na. 8Mantsa tama, kaghuni a ta ghungiɗaghata da hadna wu, Lazglafta ya. Tsatsi ta vlihatá nzaku ka minista ta mbruta ŋa Firʼawna, ka ga mgham guli ta ghəŋa həga ni, ta ga mgham ta ghəŋa inda haɗika Masar. 9Ndanana, sliʼafwa sliʼa, lawa misimmisim ka dzaʼa kuni mnanatá da ɗa. “Wya ka zwaŋa gha Yusufu: Fa fa Lazglafta ta iʼi ka mgham ta ghəŋa inda haɗika Masar, ka saba ka slaɗighata, yaha ka nzəɗavata. 10Dzaʼa nzata gha ta haɗika Guseŋ ka, ŋa nzakwa gha ndusa nda iʼi, nda zwana gha, nda zighiha gha, nda rina fisikha gha tani nda slaha gha tani, nda inda skwa gha tani. 11Dzaʼa nghap ngha yu ka kagha hada, nda gwal ga ghuni tani, nda inda skwiha gha tani, haɗ skwi dzaʼa kuni da pɗata wu, kabga ta tekeʼa vakwa maya ta hutaf.” 12Nghaɗivawa ngha ɗina. Kagha guli Biŋyamiŋ, nghaɗiva ngha ɗina kazlay iʼi ya ta gwaɗa kaghuni kəʼa, 13Lawa la tama mnanatá da ɗa ta nzakwa ɗa ka mndu dagala ta haɗika Masar, nda inda skwiha ya nghaŋ kuni. Misimmisim, ka klagihata kuni ta da ɗa da hadna, » kaʼa.

14Ka brusu tsi ta Biŋyamiŋ zwaŋama ni, ka taw tsi ta taw, ka taw Biŋyamiŋ guli ta taw ta brusu tsi. 15Ka taw Yusufu ta taw, ta brusu tsi ta inda tsa zwana ma ni ya. Tahula tsa, ka gwaɗuvtá zwana ma ni ta gwaɗa nda tsi.

Hgay Firʼawna ta Yakubu ta haɗika Masar

16Ka yə mnduha ta wi ma həga ga Firʼawna kazlay sliʼak sliʼa zwana ma ni ma Yusufu kəʼa. Ka zɗəganatá tsi ta Firʼawna nda kwalvaha ni tani. 17Ka Firʼawna nda Yusufu mantsa: « Mnana mna ta zwana ma gha: “Wya skwi ŋa magay ghuni: Habafwa haba ta huzla ghuni ta kəɗiha ghuni, vrawa vra ta haɗika Kanʼana. 18Ka klakta kuni ta da ghuni, nda gwal ga ghuni tani da iʼi, ka vlaghunata yu ta vli ya ta zɗuta ta haɗika Masar, ŋa zay ghuni ta zɗakwa na haɗik na.” 19Mnanaf mna ta zwana ma gha: “Hlawa hla ta mwataha sla ma Masar ŋa hla zwana ghuni nda miʼa ghuni, nda ya ŋa kla da ghuni, ka saha həŋ. 20Yaha kuni da tha madər nda skwiha ghuni dzaʼa zlanata kuni hada, dzaʼa mutsay kuni ta vli zɗa ta inda haɗika Masar,” » kaʼa.

21Ka magatá zwana Israʼila manda tsaya. Ka vlaŋtá Yusufu ta mwataha sla ta həŋ manda ya mna Firʼawna. Ka vlaŋtá tsi ta skwa zay ta həŋ ŋa zay taŋ ta tvi. 22Ka valaŋtá tsi ta inda taŋ ta lgutha ŋa mbaɗaptá lgutha taŋ. Ama ŋa Biŋyamiŋ ya ná, ka vlaŋtá tsi ta sulay hkən dərmək, nda lgutha hutaf ŋa mbaɗa lgutha ni. 23Ka tsəghanaftá da ni ta kəɗihha ghwaŋ nda ndaghatá skwiha zɗa zɗa ma Masar ta həŋ, nda mamaha kəɗih ghwaŋ guli, nda ndaghatá buhwa alkama ta həŋ, nda buradi, nda skwiha kavghakavgha ŋa zay da ni ta mbaɗa ta tvi. 24« Yaha kuni da zlərɗa wi ta tvi, » kaʼa davanaghatá zwana ma ni. Tahula tsa, ka ghuniŋtá tsi ta həŋ.

Vradaghata zwana ma ni ma Yusufu da Yakubu

25Ka sliʼaftá həŋ ma Masar ka vradafta ta haɗika Kanʼana slanaghatá Yakubu da taŋ. 26Ka həŋ nda tsi mantsa: « Ya ta nda hafu Yusufu kay! Tsatsi ta ga mgham ta inda haɗika Masar, » ka həŋ nda da taŋ. Ama ksaŋ a ta ŋuɗufa Yakubu wu, kabga zlghaf a ta tsa gwaɗa taŋ ya wa. 27Ka rusanaftá həŋ ta inda gwaɗa mnana Yusufu ta həŋ. Kəʼa kəʼa ná, wya mwataha sla vla Yusufu ŋa klay, hrem ká ŋuɗufa da taŋ Yakubu vravakta. 28Ka Israʼila mantsa: « Kweŋ! Ta nda hafu zwaŋa ɗa Yusufu, ta dzaʼa yu da nghanata ma kɗaku yu da mtuta, » kaʼa.

Currently Selected:

Zlr 45: xed

Highlight

Copy