Zlr 42

Ɓhadaghata zwana ma ni ma Yusufu ta haɗika Masar

1Ka snanaghatá tsi ta Yakubu kazlay mamu zimi ma Masar kəʼa. Kaʼa nda zwana ni mantsa: « Nya ta kəl kuni ka laghu da nzaku ka nagha vgha sani nda sani na? 2Ta snə yu na manda skwi mamu zimi ma Masar ka lu. Valawa da skwagafta, kada nzakwa mu nda hafu, yaha mu da rwuta, » kaʼa. 3Ka sliʼaftá zwana ma ni ma Yusufu ghwaŋ, ka laghu da Masar da skwa zimi. 4Ama ghunaf a Yakubu ta Biŋyamiŋ zwaŋama ni ma Yusufu, mista zwana da ni wu, kabga kaʼa na: « Yaha skwi da slanaghata, » kaʼa. 5Ka ɓhadaghatá zwana Israʼila da skwa zimi mista sanlaha ma mnduha ta lagha, kabga ta kəbaku nda kəba tsa maya ya ta haɗika Kanʼana guli.

6Nda nza Yusufu ka ŋumna ta haɗik. Tsatsi ta dzawanaptá zimi ta inda gwal ta tsa haɗik ya. Ka sliʼadaghatá zwana ma ni ma Yusufu zlambata zluzlumbruh ta kəma ni. 7Kəʼa ka Yusufu ná, zwana ma ni ya, tsəmaf tsəma ta həŋ. Ama maranaŋ a tsatsi ta ghəŋa ni ta həŋ wa. Ka ɗawu tsi nda mbraku nda mbraku da həŋ, kaʼa mantsa: « Sagha ga kuni? » kaʼa. « Sab ta haɗika Kanʼana ŋni, da skwa skwa zay, » ka həŋ. 8Tsəmaf tsəma Yusufu ta hahəŋ, tsəmaf a hahəŋ ta tsatsi wa. 9Ka havaktá Yusufu ta suniha ni ya ta fanaghata ta ghəŋa taŋ ya kay, kaʼa nda həŋ mantsa: « Gwal sunaptá mndu kuni, sagha da sunaptá vla htatá mbraku ma haɗik kuni, » kaʼa. 10Ka həŋ mantsa: « Mantsa a rvera ɗa wu, sagha da skwaʼatá skwa zay kwalvaha gha. 11Zwana mndu turtuk inda ŋni, ŋərma mnduha ŋni, gwal vitsa luwa a kwalvaha gha wu, » ka həŋ. 12Kaʼa nda həŋ mantsa: « Mantsa a wu, sagha da sunaptá vli nda hta mbrakwa haɗik kuni, » kaʼa. 13Ka həŋ mantsa: « Aŋni kwalvaha gha ná, zwana ma ŋni ma da turtuk, sliʼaf ta haɗika Kanʼana ŋni. Si ghwaŋpəɗ his ŋni ma da ŋni, waʼa zughuva da da ŋni, zwaɗ zwaɗa sani, » ka həŋ. 14Ka Yusufu nda həŋ mantsa: « Tsaya kəl yu ka mnay ŋa ghuni kazlay gwal sunaptá haɗik kuni, kəʼa kay rke. 15Wya ka yu dzaʼa dzəghaghunata. Ta waɗa waɗa yu nda hafa Firʼawna, kada laba kuni hadna, ba ta sagha tsa sagəŋa ghuni ya karaku. 16Ghunafwa sani mataba ghuni ka dzaʼa tsi klaktá tsa zwaŋama ghuni ya. Na pɗakwa ghuni ná, dzaʼa tsam tsa lu ta kaghuni ma gamak, mantsa ya dzaʼa dzəghaghuna dzəgha lu guli, ŋa nghay ka mamu kahwathwata ma gwaɗa ghuni na. Ka mantsa a tsi wu, waɗa waɗa yu nda hafa Firʼawna, kaghuni ná, gwal sunaptá haɗik kuni, » kaʼa. 17Ka tsamtá tsi ta həŋ fitik hkən.

18Baɗu mahkəna fitik, ka Yusufu nda həŋ mantsa: « Iʼi ná, mnda zləŋa Lazglafta yu, wya skwi dzaʼa kuni magay ka ta kumay kuni ta nzakwa ghuni nda hafu. 19Ka ŋərma mnduha kuni katsi, zlanawa zla ta sani turtuk mataba zwana ma ghuni hadna ma na gamak si mida kuni na, kaghuni sanlaha ka kla kuni ta zimi ŋa gwal mintgha ta dzə maya. 20Ka klaɗikta kuni ta tsa zwaŋama ghuni ka sagəŋ ya. Tsaya dzaʼa grafta kazlay kahwathwata gwaɗa ghuni kəʼa, mantsa tama haɗ lu dzaʼa rwaghunata wu, » kaʼa. Ka tsuʼaftá həŋ mantsa ya. 21Ka həŋ mataba taŋ mantsa: « Kahwathwata, plamagha pla vu ta ghəŋa skwi magana mu ta Yusufu zwaŋama mu. Nda ngha mu ta ghuyay ni ma fitika ndəɓay ni ta dzvu da amu, ka ɗawa zɗakatahuɗi, ama ka kwalaghutá mu, tsaya kəl na ghuya ɗaŋwa na ka slamaghata, » ka həŋ.

22Ka Rubeŋ zlghanaftá həŋ mantsa: « Mnaghuna a yu kay ra. “Ma magana kuni ta ghwaɗaka skwi ta na zwaŋ na” a ka yu nda kaghuni kay ra. Ama ka kwalaghutá kuni ta sna ŋa ɗa. Wana plamaghatá vu ndana tama dabga vəl dzata mu, » kaʼa. 23Sna a hahəŋ kazlay nda sna Yusufu ta tsa gwaɗa taŋ ya kəʼa wu, kabga mamu turdzuma mataba taŋ. 24Ka mbəɗaghutá Yusufu ta vgha ta vata həŋ da taw. Ka vraktá tsi slanaghatá həŋ ka gwaɗa nda həŋ. Ka klaftá tsi ta Simghuŋ mataba taŋ, ka hbamta tsi ma gamak ta wa ira taŋ. 25Tahula tsa, ka mnaftá Yusufu ta ndaghanamtá alkama ta həŋ ma buhwa taŋ, ka varanamtá tseda taŋ da buhwa taŋ. « Hlanafwa skwa zay ta həŋ, ŋa zay taŋ ta tvi, » kaʼa guli. Tsaya skwi magana lu ta həŋ. 26Ka habaftá zwana ma ni ta alkama taŋ ta kəɗiha taŋ, ka sliʼaftá həŋ ka laghwi.

27Ɓhadaghata taŋ da vla mbiʼa vgha, ka gunanaftá sani ma həŋ ta buhwa ni ŋa vlaŋtá skwa zay ta kəɗiha ni, kəʼa kəʼa ná, ka nghaŋtá tsi ta hbatá tseda ni ta wa buhwa ni. 28Kaʼa nda zwana ma ni mantsa: « Wana vriɗiva vra lu ta tseda ɗa, wana tsi ma buhwa ɗa, » kaʼa. Ka tsutá ŋuɗufa taŋ, ka ghudzaku həŋ ta ghudzaku. Ka həŋ mataba taŋ mantsa: « Nu na magama Lazglafta na? » ka həŋ.

29Ka lagha həŋ slanaghatá Yakubu da taŋ ta haɗika Kanʼana, ka rusanaftá həŋ ta inda skwiha ta slanaghatá həŋ, ka həŋ mantsa: 30« Tsa mndu ka mghama tsa haɗik ya ná, davaŋnagha dava katakata, ka hlaftá tsi ta aŋni ka gwal sunaptá haɗik. 31Ka ŋni nda tsi mantsa: “Gwal sunaptá luwa a aŋni wu, ŋərma mnduha aŋni. 32Si zwana maghwaŋpəɗ his ŋni ma da turtuk. Zwaɗ zwaɗa sani turtuk, wa a zughuva kawadaga nda da ŋni ta haɗika Kanʼana,” ka ŋni nda tsi. 33Ka tsa mndu ta nzakway ka mghama tsa haɗik ya nda aŋni mantsa: “Kada grafta yu kazlay ŋərma mndu kuni kəʼa na: Zlanawa zla ta sani ma zwaŋama ghuni da iʼi, klawa skwi ŋa katá maya gwal mintgha ghuni, ka dzaʼa kuni. 34Ka klaɗikta kuni ta tsa zwaŋama ghuni ka sagəŋ ya. Tsaya dzaʼa kəl yu ka grafta kazlay ŋərma mnduha kuni, gwal sunaptá luwa a kuni wu, kəʼa. Dzaʼa vraghunava vra yu ta sana zwaŋama ghuni, dzaʼa zlaghunaŋ zla yu ta tvi ŋa nzata ghuni nda platá vgha ta na haɗik na,” » ka həŋ. 35Ka palanaptá həŋ ta buhuha taŋ, ka slaslanaghatá inda taŋ ta haba ta tseda taŋ ma zlibi ma buhwa taŋ. Nghaŋta taŋ ta tsa zlibaha tseda taŋ varanava lu ta həŋ ya, ka hlutá zləŋ ta həŋ demdem nda da taŋ Yakubu tani.

36Ka da taŋ Yakubu nda həŋ mantsa: « Dgiha dga kuni ta zwana ɗa, ta haɗ Yusufu wu, ta haɗ Simghuŋ guli, ta kumay kuni ta kləgəltá Biŋyamiŋa ɗa guli! Ta iʼi ta zləmbakwa inda ni! » kaʼa. 37Ka Rubeŋ nda tsi mantsa: « Ka vraghak a yu ta zughuva gha wu katsi, ka pslata ka ta zwana zgwana ɗa his ŋa play. Vliha vla ma dzva ɗa, dzaʼa vraghak vra yu, » kaʼa. 38« Kadzeŋkadzeŋ, haɗ zwaŋa ɗa ta laha mista ghuni wa. Mtu mta zwaŋama ni, tsatsi turtuktuk pɗakwa ni. A ka lagha skwi ka slanaghata ta tvi ta lab kuni, kaghuni dzaʼa kladatá na ɓata ghəŋa ɗa na da haɗik ma ŋərata ŋuɗuf, » ka Yakubu.

Currently Selected:

Zlr 42: xed

Highlight

Copy