Sab 3

Hgaŋta Lazglafta ta Musa

1Ma sana fitik, ka nghə Musa ta rina fisika Yitru dzidza ni, mnda dra skwi ŋa Lazglafta ma Midyaŋ. Ka mbadaptá tsi ta bra rina ni da huɗa mtak, ka lagha tsi da Hwarev, ghwá Lazglafta. 2Ka zlagaptá duhwala Yawe da tsi ma zlghakwa vu ma takataka mubuk ka teki. Ka nghaŋtá tsi ta mubuk ka vu, ama haɗ ta draku guli wu. 3Ka Musa guli mantsa: « Ka mbəɗava mbəɗa yu, ka dzaʼa yu da nghanavatá mndərga nana ma mandərmimi, ka kabgawu kwal tsa mubuk ya dravata ya? » kaʼa. 4Nghay Yawe ná, ta mbəɗa vgha Musa ka dzaʼa da nghay. Ka hgaŋtá Lazglafta ma tsa mubuk ya, kaʼa mantsa: « Musa! Musa! » kaʼa. « Wana yu! » ka Musa. 5Kaʼa Yawe mantsa: « Ma gavagagha ka da hadna! Hlap hla ta ɓaɓah ma səla gha, kabga tsa vli hada ka ya ná, haɗik nda ghuɓa ya. 6Iʼi Lazglafta da gha, Lazglafta Abraham, Lazglafta Izak, Lazglafta Yakubu, » kaʼa. Gi ka bukwamtá Musa ta kuma ni, kabga ta zləŋay ta nghaŋtá Lazglafta.

7Ka Yawe mantsa: « Nda ngha yu kahwathwata ta sa duni ta sə mnduha ɗa ma Masar. Nda sna yu ta waha taŋ ta ghəŋa vəl ghuya ɗaŋwa ya ta ghuy gwal ta mara mbrakwa taŋ ta ghəŋa taŋ. Nda sna yu ta duni ta sə həŋ. 8Tsaya tama kəl yu ka saha da zluʼagaptá həŋ ma dzva la Masar. Dzaʼa hlaf hla yu ta həŋ ma Masar, ŋa hlaghata ɗa ta həŋ ta sana haɗik ká ka nda ɗinakwa ni, dagala guli, ta mbəzaku uʼa nda zuɗum mida. Tsa vli ya ná, haɗika la Kanʼana, nda la Het, nda la Amuru, nda la Periz, nda la Hiv, nda ya nda la Yəbus ya. 9Ndanana, ɓhaɗigha ɓha waha la Israʼila kahwathwata, nda ngha yu guli ka la Masar ta giri ŋa taŋ. 10Ndanana tama, sawi ta ghuna kagha yu da Firʼawna ŋa hligiŋta gha ta mnduha ɗa la Israʼila ma Masar, » kaʼa. 11Ka Musa nda Lazglafta mantsa: « Wa iʼi ŋa laviŋtá dzaʼa da Firʼawna ŋa hlagaptá la Israʼila ma Masar na? » kaʼa. 12Kaʼa nda tsi mantsa: « Kawadaga yu nda kagha. Ŋa graghafta kazlay iʼi ta ghunaftá kagha kəʼa, mamu ŋizla ta vlaghata yu: Baɗ hlagapta gha ta la Israʼila ma Masar ya, ŋa sagha ghuni da tsəlɓu ŋa ɗa ta na ghwá na, » kaʼa.

13Ka Musa nda Lazglafta mantsa: « Mantsa nzakwa ni, dzaʼa sliʼaf sliʼa yu slanaghatá la Israʼila. “Lazglafta dzidza ghuni ta ghunaktá iʼi da kaghuni,” ka yu dzaʼazlay nda həŋ. A ka ɗawihaha həŋ kazlay “wa hga ni na?” kəʼa ní, nu ka yu dzaʼazlay həŋ? » kaʼa. 14Ka Lazglafta nda Musa mantsa: « “Iʼi ná, Iʼi ya,” ka ka. Tsaya skwi dzaʼa ka mnanatá la Israʼila. “Iʼi ya ta ghunɗikta da kaghuni,” » ka ka dzaʼazlay. 15« Ka ka dzaʼazlay nda la Israʼila guli na: “Yawe, Lazglafta dzidzíha ghuni, Lazglafta Abraham, Lazglafta Izak, Lazglafta Yakubu ta ghungiɗaghata da kaghuni.” Tsaya hga ɗa ŋa kɗekedzeŋ. Nda tsa hgu ya dzaʼa hava inda zivira mnduha ta Iʼi. 16La! ka tskanata ka ta la galata mndu mataba la Israʼila, ka mnanata ka ta həŋ: “Yawe, Lazglafta dzidzíha ghuni, Lazglafta Abraham, Lazglafta Izak, Lazglafta Yakubu, ta zlagagapta da iʼi. Kaʼa nda iʼi mantsa: Nghaghunagha ngha yu kahwathwata, nda ngha yu ta skwi ta mag lu ŋa ghuni ma Masar. 17Mantsa ya tama, dzaʼa hlap hla yu ta kaghuni ma na Masar ta sə kuni ta duni na, ka hlaghatá kaghuni ta haɗika la Kanʼana, nda la Het nda la Amuru, nda la Periz, nda la Hiv nda la Yəbus. Ta tsa haɗik ya ná, ta mbəzaku uʼa nda zuɗum mida.” 18Dzaʼa sna sna həŋ ta gwaɗa gha. Ŋa sliʼafta gha kawadaga nda tsa la galata mnduha la Israʼila ya slanaghatá mghama Masar. Ka kuni dzaʼazlay nda tsi na: “Yawe, Lazglafta la Hebru, ta guyata nda aŋni. Ndanana ta ndəɓa dzvu ŋni da kagha, zlaŋna zla ka dzaʼa ŋni za fitik hkən ta mbaɗa ma mtak, da planatá ghəŋ ta Yawe, Lazglafta ŋni.” 19Ama nda sna yu kazlay na, zlighunista a mghama Masar wu kəʼa, ba ka nda nza tsi tkweʼ ka magay ni kasiʼi. 20Tsaya tama dzaʼa kəl yu ka kapaftá dzva ɗa ka dzuŋtá la Masar, nda inda mandərmimiha dzaʼa magata yu mataba taŋ. Tahula tsa, ŋa slighunista ni. 21Dzaʼa vla vla yu ta tvi ŋa nghay la Masar ta kaghuni nda zɗaku. Ma sliʼa ghuni, haɗ kuni dzaʼa sliʼafta nda dzvu bətbət wa. 22Dzaʼa ɗaway inda miʼa la Israʼila da sləvdaha taŋ, nda ya da miʼaha ta nzaku da həŋ, ta huzlaha magaf lu nda kfura tsedi, nda dasu, nda lgutha tani. Tsa lgutha ya ná, ŋa suɗay ghuni ŋa zwana zgwana ghuni, nda ya ŋa kwagha ghuni. Mantsa ya dzaʼa kəɓatá kuni ta huta ta la Masar, » kaʼa.

Currently Selected:

Sab 3: xed

Highlight

Copy