Sab 4

Maraŋta Lazglafta ta mbrakwa ni ta Musa

1Ka Musa mantsa: « Wya zlghafta a həŋ wu, snata a həŋ ta gwaɗa ɗa guli wa. “Zlagagap a Yawe ta kəma gha wu!” ka həŋ dzaʼazlay nda iʼi, » kaʼa. 2Ka Yawe nda tsi mantsa: « Nahgani na ma dzva gha na na? » kaʼa. « Dafa ya, » ka Musa. 3Ka Yawe mantsa: « Vzada vza ta haɗik, » kaʼa. Ka vzadatá tsi, ka nutá tsi ka nahaɗik, ka hway Musa ta hwaya. 4Ka Yawe nda Musa mantsa: « Fadap fa ta dzva gha, ka ksafta ka ta htur, » kaʼa. Ka fadaptá tsi ta dzva ni ka ksafta, ka nugəltá tsi ka dafa ma dzva ni. 5« Ka maga ka mantsa ya, kada grafta həŋ kazlay zlagap zlaga, iʼi Yawe, Lazglafta dzidzíha taŋ, Lazglafta Abraham, Lazglafta Izak, Lazglafta Yakubu da kagha kəʼa, » kaʼa. 6Ka Yawe nda tsi guli mantsa: « Fadam fa ta dzva gha ta gərzla ghuva gha, » kaʼa. Ka fadamtá tsi ta dzva ni ta gərzla ghuva ni, ka tsəhagaptá tsi. Kəʼa kəʼa ná, kuɗay ka ŋusliŋ manda papla, ka ghwaɗaka lku dzeʼdzeʼ. 7Ka Yawe nda Musa guli mantsa: « Vradanam vra ta dzva gha ta gərzla ghuva gha, » kaʼa. Ka vradanamtá tsi ta dzva ni ta gərzla ghuva gha, ka vravaftá dzva ni manda va vla ni. 8Ka Yawe nda tsi mantsa: « Ka zlghaghaf a həŋ wu, snagha a həŋ kulam nda va tsa taŋtaŋa ŋizla ya wu katsi, dzaʼa zlghaf zlgha həŋ nda tsa mahisa ni ya. 9Ama ka zlghaf a həŋ nda tsa ŋizlaha his ya wu, snagha a həŋ wu, ka dzaʼa ka tigistá imi ma ghwa Nil, ka pghata ka ta ghwalata vli, dzaʼa nuna tsa imi dzaʼa tagista ka ma ghwa Nil ya ka us, » kaʼa.

Zbafta Lazglafta ta Haruna ŋa kataŋtá Musa

10Ka Musa nda Yawe mantsa: « Nawa nawa! mghama ɗa, kdəkkdək, sna a yu ta gwaɗa wu. Dər ɗahawu, dər beʼetsa, dər daga ghalya ha ka sagha ta na fitik gwaɗgana ka ta kwalva gha ná, pərɗaf a yu ta snaŋtá gwaɗa wu. Laviŋ a yu ta guna wi ka gwaɗa wu, ɗukɗukwa ghanika ɗa ka gwaɗa, » kaʼa. 11Ka Yawe nda tsi mantsa: « Wa ta tsanaftá wi ta mndu na? Wa ta niŋta ka rgha na? Wa ta dərzlanaftá sləməŋ na? Wa ta gunanatá iri ta mndu ŋa nghaŋtá vli na? Wa ta ghulpiŋta na? Iʼi Yawe a kasiʼi wa? 12Ndanana ná, la! kawadaga yu nda kagha ta gwaɗ ka ta gwaɗa, dzaʼa taghaghaf tagha yu ta skwi ŋa gwaɗay gha, » kaʼa. 13Ka Musa mantsa: « Aya! mghama ɗa, kdəkkdək, ghuna ta sana mndu, » kaʼa. 14Mantsa tama, ka gufaftá ŋuɗufa Yawe ta ghəŋa Musa, kaʼa mantsa: « Zwaŋama gha a Haruna mnda la Levi ya ra? Nda sna yu nda sna tsatsi ta gwaɗa ɗina ɗina. Wya va ni ta sagha da kagha. Na gi nghaŋta ni ta kagha ná, dzaʼa rfay ta rfu ma ŋuɗufa ni. 15Ka gwaɗganata ka, ka baluŋta ka ta gwaɗa. Vərɗa iʼi ná, kawadaga yu nda kaghuni ma fitik dzaʼa gwaɗ kuni ta tsa gwaɗa ya, dzaʼa taghaghunaf tagha yu ta skwi dzaʼa kuni magay. 16Tsatsi dzaʼa gwaɗa nda mnduha ma vla gha, tsatsi dzaʼa kla lwa gha, manda nzata nzakwa Lazglafta ya kagha ma tsatsi. 17Ka klafta ka ta na dafa na ma dzva gha, nda tsi dzaʼa maga ka tsa ŋizlaha ya, » kaʼa.

Dga vgha i Musa nda Yitru

18Tahula tsa, ka sliʼaftá Musa ka vraghuta slanaghatá Yitru dzidza ni. Kaʼa nda tsi mantsa: « Kdəkkdək! zliha zla ka dzaʼa yu da nghanaghatá zwana ma ɗa la Hebru ma Masar. Ka dzaʼa yu nghanaghatá həŋ ka ta nda hafu həŋ tsi, ka ki tsi, » kaʼa. Ka Yitru mantsa: « La ka ɓhata ka nda vghata zɗaku, » kaʼa. 19Ma tsa Midyaŋ ya, ka Yawe si nda Musa na: « La! ka vra ka da Masar, kabga nda rwa tsa mnduha ta zba dzatá kagha ya, » kaʼa. 20Ka hlaftá Musa ta i markwa taŋ nda zwana ni, ka pghaftá həŋ ta kəɗiha ni. Ka ksaftá həŋ ta tvi ka vrə ta haɗika Masar. Ka klaftá tsi ma dzva ni ta tsa dafa mnana Lazglafta ŋa klafta ni ya.

21Ka Yawe nda Musa guli mantsa: « Vradaghata gha da Masar ya ná, yaha ka da zanaptá maga mandərmimiha ya vlagha yu ta mbrakwa magay ta kəma Firʼawna. Ama Iʼi, dzaʼa təŋanaf təŋa yu ta ghəŋa ni, haɗ dzaʼa zliŋtá la Israʼila ŋa sliʼafta taŋ wa. 22Ka ka dzaʼazlay nda Firʼawna na: “Ka Yawe nda kagha wa: Israʼila ná, zwaŋa ɗa ya, zumala ɗa ya. 23Ka yu si nda kagha na: Zliŋ zla ta zwaŋa ɗa ŋa dzaʼa ni da tsəlɓu ŋa ɗa ka yu, ama ka kwalaghuta ta zliŋta. Mantsa tama, dzaʼa dza dza yu ta zwaŋa gha, zumala gha,” » kaʼa.

24Ɓhadaghata Musa da vla mbiʼa vgha ta tvi, girviɗik, ka lagha Yawe da slanaghata, ka kuma dzata. 25Gi ka klaftá Tsifura ta pala nda za wa ni, ka tsanaghutá fafaɗa zwaŋa ni, ka ksaŋta ndəheɗ ta skwa Musa nda tsi. Kaʼa mantsa: « Kahwathwata ná, zəʼala us kagha ma iʼi, » kaʼa. 26Ka zlanatá Yawe. Ma tsa fitik ya, ka Tsifura mantsa: « Zəʼala us ka, dabga tsatá fafaɗ, » kaʼa.

27Ka Yawe nda Haruna mantsa: « La da gəma Musa ma mtak, » kaʼa. Ka sliʼaftá tsi ka laghu da gəmay ta ghwá Lazglafta, ka brusatá tsi. 28Ka rusanaftá Musa ta Haruna ta inda gwaɗa mnana Yawe taghunafta ya, nda inda ŋizlaha mnana tsi ŋa magay. 29Ka sliʼaftá i Musa nda Haruna ka laghu, ka tskanatá həŋ ta inda la galata mndu mataba la Israʼila. 30Ka rusanaftá Haruna ta həŋ ta inda gwaɗa mnanaf Yawe ta Musa. Magaŋha Musa guli ta ŋizlaha ta kəma la Israʼila. 31Ka zlghaftá la Israʼila ta tsa gwaɗaha ya. Ka snaŋtá həŋ kazlay nghanagha ngha Yawe ta la Israʼila kəʼa, nda ngha ta satá duna taŋ. Mantsa tama, ka tsəlɓatá həŋ ta haɗik, ka vlaŋtá glaku.

Currently Selected:

Sab 4: xed

Highlight

Copy