Sab 12
12
Skala Pak
1Ka Yawe gwaɗganatá i Musa nda Haruna ma Masar mantsa: 2« Nana tili na dzaʼa nzakway ka taŋtaŋa tili ka ŋa ghuni mataba tiliha, tsatsi dzaʼa nzakway ka taŋtaŋa tili ma vaku, da kaghuni. 3Mnanawa mna ta guyatá ghəŋa la Israʼila demdem: Baɗ maghwaŋa fitik ma na tili na, ka klafta inda wa tgha həga ta slaɓalakwa skwi nda səla, inda wa tgha həga nda ŋa ni. 4Ka sira a tsa həga ya ka ŋa tsa skwi nda səla ya wu, klafta taŋ nda sləvda ni ya ndusa həga taŋ. Ka kinawu mbsaka mnduha ya, zbafta taŋ ta skwi nda səla ya prək ka zuta taŋ. 5Tsa slaɓalakwa skwi nda səla dzaʼa klafta həŋ ya ná, maŋazak ka dugzum turtuk vakwa ni a tsi katsi, kul haɗ maslivinza tida. 6Ka fata kuni ha baɗ ghwaŋpəɗ fwaɗ ma tsa tili ya. Ga hawu baɗ tsaya, ŋa hanata inda guyatá ghəŋa la Israʼila ta tsa skwi nda səla ya zbap həŋ ya. 7Ka taʼata həŋ ta usa ni, ka magafta ta slərpuha wa tgha his his, nda ya ta zləŋata ni, ma inda həga ta zə lu ta tsa sluʼi ya. 8Ta tsa rviɗik ya dzaʼa fsata kuni ta sluʼa ni ŋa zuta ghuni nda buradi ya kul haɗ is mida. Nda masuʼataha ɗahɗaha dzaʼa za kuni. 9Yaha kuni da za nzakwa ni ndiri ndiri, nda ya da lu nda da, ama fsata ni nda vu katsi. Ka fasata kuni nda fasa ta ghəŋa ni, nda dagulamaha ni, nda nihuɗa ni tani. 10Yaha kuni pɗanatá mapɗaka ni dər ka kiʼa ŋa ga sərɗək. Ka lab la tsi ta sərɗək, ka driŋta ghuni nda vu. 11Wya ka kuni dzaʼa za tsa skwa zay ya: Ka hbafta kuni ta huɗi, nda ɓaɓah ma səla, dafa ma dzvu. Kwats kwats dzaʼa za kuni. Tsaya Pak ŋa Yawe. 12Ta tsa rviɗik ya dzaʼa lama yu ranaftá haɗika Masar, ŋa rwiŋta ɗa ta inda zumali ta haɗika Masar, zlrafta ni ta mndu ha ta rini. Dzaʼa tsanagha tsa yu ta guma ta inda lazglaftaha la Masar. Iʼi ná, Yawe yu. 13Us dzaʼa nzakway ka ŋizla ta həga mida kuni. Na nghaŋta ɗa ta us ya, ŋa tsughwaɗaghuta ɗa ta kaghuni, haɗ tsa zləmnda zaɗa mndu ya dzaʼa slaghunaghata ta dzuŋtá yu ta haɗika Masar wa. 14Dzaʼa nzakway tsa fitik ya ŋa ghuni ka fitika havu. Ka ŋanata kuni ka skalu ŋa Yawe. Ka ŋanata kaghuni nda zivirha ghuni ka skwi ŋa magay ha ŋa ɗekɗek.
15Ndəfáŋ fitik dzaʼa zata kuni ta za buradi kul haɗ is mida. Daga baɗ taŋtaŋ dzaʼa hliŋta kuni ta is ma həga ghuni. Ka daga baɗ taŋtaŋ ha baɗ mandəfáŋ zaŋ za mndu ta buradi nda is mida katsi, kliŋtá tsa mndu ya mataba la Israʼila. 16Baɗ taŋtaŋa fitik nda ya baɗ mandəfáŋ, dzaʼa mamu kuni nda guyatá ghəŋ nda ghuɓa. Haɗ kuni dzaʼa magaŋtá slna dər ka kiʼa wa, ba skwi ya ŋa zay inda kaghuni dzaʼa kuni dá data. 17Ka nzakwa tsa skala buradi kul haɗ is mida ya ka skwa havay fitik ya hligiŋ yu ta kaghuni ka ghuɓa gwal vulu ma haɗika Masar. Ka ŋanata kuni ta tsa fitik ya ŋa zivira ghuni, ka skwi ŋa magay ghuni ŋa ɗekɗeka ghuni. 18Zlrafta ga hawu baɗ maghwaŋpəɗ fwaɗa fitik ma taŋtaŋa tiliha ka labi ta hawu baɗ fitik hisambsak ndeŋ mida, zay ghuni ta buradi kul haɗ is mida. 19Ma fitik ndəfáŋ, yaha lu slanaghatá is ma həga ghuni. Dər wa ta zaŋtá skwi ŋlanaf lu nda is, kliŋtá tsa mndu ya mataba guyatá ghəŋa la Israʼila, dər má ka mayəm tsi, dər má zwaŋa haɗik a tsi. 20Yaha kuni zaŋtá skwi ŋlanaf lu nda is. Ma inda vli dzaʼa nzata kuni, ka za kuni ta buradi kul haɗ is mida, » kaʼa.
21Ka hagatá Musa ta inda la galata mnduha mataba la Israʼila, kaʼa nda həŋ mantsa: « Lawa la misimmisim ka zabafta kuni ta slaɓalakwa skwi nda səla ga həga ga həga, ka hanata inda ghuni ŋa skala Pak. 22Ka klafta kuni ta hbatá sluhwa izwap, ka tsughumamta kuni ma tsa us pgham lu ma glifiŋ ya, ka magafta kuni ta zləŋatá wa tgha nda ya ta slərpuha ni his his guli. Ama kaghuni, yaha kuni walaŋtá sab ta wa tghaha ka tsaɗata vli. 23Ma ranafta dzaʼa ranafta Yawe ta Masar ŋa dzuŋtá həŋ, ka nda ngha tsi ta us ta zləŋatá wa tgha, nda ya ta slərpuha ni his his katsi, dzaʼa tsughwaɗaghu tsughwaɗa Yawe, haɗ dzaʼa zlanatá tsa mnda zaɗanatá mndu ya ŋa lama ni da həga ghuni ŋa dzughunusta wa. 24Tsa skwiha ya ná, ka ŋanata kuni ka skwi ŋa magay, kaghuni nda zwana ghuni ha ŋa ɗekɗeka ghuni. 25Baɗ da lam kuni da tsa haɗik dzaʼa vlaghunata Yawe ya, manda ya taghunaf tsi ta imi ta sləməŋ, ka kɗaŋta kuni ta tsa skalu ya. 26Ka ɗawaghuna ɗawa zwana ghuni ta klatá ghəŋa tsa skalu ya, 27ka kuni dzaʼazlay nda həŋ na: “Tsaya skwa pla ghəŋa ka Pak ŋa Yawe kabga tsughwaɗaghuta ni ta həga la Israʼila ma Masar ma fitika dzuŋta ni ta Masar. Ama ka zluŋtá tsi ta həgaha amu,” » kaʼa. Ka tsəlɓatá la Israʼila ka zlambata zluzlumbruh. 28Ka laghu la Israʼila, ka magatá həŋ manda va ya mnanaf Yawe ta i Musa nda Haruna.
Rwakwa zumaliha
29Ma takala tama, ka pslatá Yawe ta inda zumali ma haɗika Masar, zlrafta ni ta zumala Firʼawna ta dzaʼa lafi ta dughuruk ya, ha ta zumala mndu ya hbam lu ma gamak, nda inda zumala rini guli. 30Ka sliʼaftá Firʼawna girviɗik, tsatsi nda inda kwalvaha ni, nda la Masar tani demdem. Ka wahu lu ta wahu katakata ma Masar, kabga haɗ həga ya kul haɗ mndu nda mta mida wa. 31Ka hgadaghata tsi girviɗik ta i Musa nda Haruna, kaʼa nda həŋ mantsa: « Sliʼapwa sliʼa mataba mnduha ɗa, lawa la, kaghuni nda la Israʼila demdem. Lawa da tsəlɓu ŋa Yawe manda ya ɗawaŋ kuni. 32Hlawa hla nda rina fisika ghuni nda slaha ghuni tani manda ya mnə kuni! Sliʼawa sliʼa, magawa duʼa da Lazglafta ghuni guli ka tfiɗaghata tsi ta wi, » kaʼa. 33« Dzaʼa rwu rwa ŋni demdem, » ka la Masar ka kwatsa sliʼapta la Israʼila misimmisim ma haɗika taŋ. 34Mantsa tama, ka gi hlaftá la Israʼila ta sigaha taŋ nda hwaɗatá hpwa taŋ mida ta kul ŋlaku, ka mbasamta ma lguta taŋ, ka fafta ta badzaga taŋ. 35Ka mag la Israʼila ta skwiha ya mnana Musa ta həŋ: Ka ɗaɗawu həŋ da la Masar ta huzla ka kfura tsedi, nda ya ka dasu, nda lgutha. 36Yawe ta magata kəl la Israʼila ka mutsaftá zɗakatahuɗi da la Masar: Ka vlaŋtá la Masar ta skwiha ɗawaŋ həŋ da həŋ. Mantsa ya ka həŋ kəɓatá huta ta la Masar.
Sliʼapta la Israʼila ma Masar
37Tahula tsa, ka sliʼaftá la Israʼila ma Ramses ka laghu da Sukkut. Zgwana ta klaftá dəmbuʼ mkuʼ dərmək həŋ ta sliʼafta nda səla, mbəɗaf a lu ta miʼaha nda zwani wa. 38Mamu ndəghata mndəra sanlaha ma mnduha guli ta sliʼafta kawadaga nda həŋ, nda rina fisik nda slaha, ndəghundəgha tsa rini ya katakata. 39Ka dadatá həŋ ta buradi kul haɗ is mida nda tsa hwaɗatá hpu ta kul ŋlaku si hlagap həŋ ma Masar ya kay, kabga gi ghəzlagap ghəzla lu ta həŋ ma Masar, mutsaf a həŋ ta fitik dər ka kiʼa ŋa klaftá skwa zay guli wa.
40Maga maga la Israʼila ta vakuha fwaɗ dərmək nda hkən mbsak ma Masar. 41Hɗatá tsa vakuha fwaɗ dərmək nda hkən mbsak ya, baɗ tsaya, ka sliʼagaptá inda mnduha Yawe ka ghuɓa gwal vulu ma haɗika Masar. 42Manda ya nza Yawe hzleŋa ta tsa rviɗik ya ŋa hligiŋtá la Israʼila ma Masar ya, manda tsaya guli dzaʼa ŋanata inda la Israʼila hzleŋa tsa rviɗik ya ŋa Yawe ha ta zivira taŋ.
43Ka Yawe nda i Musa nda Haruna mantsa: « Wya skwi ŋa magay ghuni ma skala Pak: Yaha mayəm da zay. 44Ama ka mamu vuʼa ya skwa mndu nda tsedi katsi, tsanata ni ta fafaɗa ni karaku, kada za tsi. 45Yaha mayəm nda mndu ta maga slna tsedi ni da zay. 46Ma huɗa həga dzaʼa nzata kuni ka zay. Yaha kuni da klagapta dzibil. Yaha kuni da ɓlanaptá ta ya dər turtuk ma ghudzifa ni. 47Ka skala inda guyatá ghəŋa la Israʼila ta tsa skalu ya. 48Ka ta kumay mayəm ta nzaku mataba ghuni ta skala tsa Pak ŋa Yawe ya katsi, ba ɗatsata inda zwana zgwana ni ta fafaɗa taŋ karaku. Tahula tsa ŋa laviŋta ni ta lami da tsa skalu ya, ŋa nzakwa ni manda zwaŋa Israʼila. Ama yaha mndu kul tsaku fafaɗa ni da walaŋtá zay. 49Tsaya zlahu turtuktuk ŋa la Israʼila nda mayəmha ta nzakw ma mataba ghuni, » kaʼa. 50Ka magatá inda la Israʼila manda va ya mnanaf Yawe ta i Musa nda Haruna. Ka magatá həŋ manda va tsa. 51Baɗ va tsa fitik ya, ka hligiŋtá Yawe ta la Israʼila ma haɗika Masar, ka ghuɓa gwal vulu ka ghuɓa gwal vulu.
Currently Selected:
Sab 12: xed
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
