Sab 11

Kɗavakta zləmnda

1Ka Yawe nda Musa mantsa: « Dzaʼa fanagha fa yu ta kɗavakta zləmnda ta ghəŋa Firʼawna nda Masar tani. Tahula tsa, ŋa zlighunista ni hadna. Ma zlighunista ni, ŋa ka ghəzlidighunista. 2Mnanam mna ma sləməŋ ta la Israʼila kazlay, ka ɗawa inda zgun da sləvda ni, ta ɗawu inda marakw da sləvda ni guli ta huzlaha ka kfura tsedi, nda ya ka dasu, » kaʼa. 3Yawe ta magata kəl la Israʼila ka mutsaftá zɗakatahuɗi da la Masar. Musa guli ná, nda nza ka mndu dagala ta haɗika Masar ta wa ira kwalvaha Firʼawna, nda ya ta wa ira mnduha.

4Ka Musa nda Firʼawna mantsa: « Wya ka Yawe mnata: “Ma takala dzaʼa lam la yu da ranaftá Masar, 5ŋa rwuta inda zumaliha ma Masar, zlrafta ni ta zumala Firʼawna ta dzaʼa lafi ta dughuruk ya, ha ta zumala kurɗu ta huʼu, nda ya nda inda zumala rini. 6Dzaʼa wahay lu ta wahu katakata ta inda haɗika Masar. Ta maga a mantsa ya wu, magəglata a mantsa ya guli wa. 7Ama nda da la Israʼila, haɗ lu dzaʼa snaŋtá ghughaŋtá kri ta mndu dər rini wu. Tsaya dzaʼa kəl kuni ka snaŋta kazlay dgana dga Yawe ta la Masar nda la Israʼila kəʼa.” 8Mantsa tama, dzaʼa sliʼak sliʼa inda kwalvaha gha da tsəlɓu ta kəma ɗa nda manay kazlay na: “Lawa la nda inda mnduha ta ksa səla gha tani kəʼa.” Tahula tsa, ŋa saba ɗa, » kaʼa. Ka saghu Musa da Firʼawna nda gufatá ŋuɗuf.

9Ka Yawe nda Musa mantsa: « Haɗ Firʼawna dzaʼa snaghunata wu, kada yavafta mandərmimiha ɗa ta haɗika Masar, » kaʼa. 10Ka magatá i Musa nda Haruna ta inda tsa mandərmimiha ya ta kəma Firʼawna. Ama ka təŋanaftá Yawe ta ghəŋa Firʼawna. Zliŋ a ta la Israʼila ŋa sliʼapta taŋ ma haɗika ni wa.

Currently Selected:

Sab 11: xed

Highlight

Copy