Slg 8

1Ka zɗəganatá tsa dzatá Atiyen ya ta Sawul.

Zlraftá ghuya ɗaŋwa ŋa gwal zlghay nda ŋuɗuf

Baɗu tsa fitik ya zlrafta ghuya ɗaŋwa katakata ta slanaghatá gwal zlghay nda ŋuɗuf ma luwa Ursalima. Ka gazlaghutá inda gwal zlghay nda ŋuɗuf da sana vliha ta haɗika Zudiya, nda ya ta haɗika Samari. Gwal ghunay yeya ta pɗata hada. 2Mamu sana mnduha ta zləŋa Lazglafta, ka paɗamtá həŋ ta Atiyen, ka tawamtá həŋ katakata.

3Ŋa Sawul ya tani, kuma zaɗanatá gwal zlghay nda ŋuɗuf ŋa ni. Ka dzaʼa tsi da həga da həga kasa zgwana nda miʼaha, ka pgha həŋ da gamak.

Mnay Filip ta Lfiɗa Gwaɗa ma luwa Samari

4Tsa gwal ta gazlaghuta ya ná, ra luwa ŋa taŋ ta magay ka mna gwaɗa ta ghəŋa *Lfiɗa Gwaɗa. 5Ka laha Filip da luwa Samari, ka mnə tsi ta gwaɗa ta *Kristi ŋa mnduha hada. 6Zɗəgana zɗa tsa gwaɗa ta mnə Filip ya ta həŋ. Tets ka skwa turtuk ndəghata dəmga ta sna tsa gwaɗa ta mnə tsi ya, nda ya ta ngha tsa mazəmzəmha ta maga tsi ya guli, 7kabga ta sliʼagap sliʼa ghwaɗaka sulkumha nda dza lili ma ndəghata mnduha. Nda ndəgha gwal nda raghwa, nda gwal matavaghu səla taŋ ta mbambafta. 8Tsaya tama, ma rfu tsa luwa ya katakata.

9Tsaw mamu sana mndu ta hgu lu ka Simuŋ ma tsa luwa ya. Nda kɗa fitika ni ma tsa luwa ya ta ksa slna nda zava. Ta zləŋ nda zləŋa mnduha ma luwa Samari. Ka mndu dagala klafta tsi ta ghəŋa ni. 10Nda zwani tani, nda galata mnduha tani demdem, zɗəgana zɗa tsa mndu ya ta həŋ. « Nana mndu na ná, mbrakwa Lazglafta ya ta hgə lu “ka mbraku dagala yeya,” » ka həŋ tazlay. 11Zɗəgana zɗa tsa mndu ya ta həŋ, kabga nda kɗa fitika ni ta maganatá slna ta həŋ nda tsa zavani ya. 12Tahula zlghafta taŋ ta tsa gwaɗa Filip ta mnay ŋa taŋ ta ghəŋa Mgham Lazglafta, nda ya ta ghəŋa hga *Yesu Kristi ya, ka maganaftá lu ta batem ta həŋ, nda zgwana tani, nda miʼaha tani. 13Va tsa Simuŋ ya guli, ka zlghaftá tsatsi, ka maganaftá lu ta batem. Ka ndiʼanavatá tsi ta vgha ta Filip, ka nghə tsi ta mandərmimiha nda mazəmzəmha ta mag Filip ya, ka ndərmim tsi.

14Snaŋta gwal ghunay ta nzakway ma Ursalima kazlay: Zlghaf zlgha gwal ma luwa Samari ta gwaɗa Lazglafta kəʼa, ka ghunadaptá həŋ ta i *Piyer nda Yuhwana, da həŋ. 15Lagha tsaha ya da həŋ, ka mag həŋ ta duʼa ta ghəŋa taŋ, kada mutsafta həŋ ta Sulkum nda ghuɓa. 16Tsaw si ta sa a Sulkum nda ghuɓa ta ghəŋa ya dər ka turtuk ma həŋ wa. Batem kweŋkweŋ yeya maganaf lu ta həŋ ma hga Mgham Yesu. 17Lagha i Piyer nda Yuhwana ka fanaghatá dzvu ta həŋ, ka mutsaftá həŋ ta Sulkum nda ghuɓa. 18Na nghay Simuŋ ta tsa vla Sulkum nda ghuɓa ŋa mnduha ma fanaghata gwal ghunay ta dzvu ta həŋ ya, ka klaftá tsi ta tsedi ka vlay ŋa taŋ. 19Kaʼa mantsa: « Vlihawa vla ta tsa mbraku ya ta iʼi guli, ŋa mutsafta mndu dzaʼa fanaghata iʼi guli ta dzvu, ta Sulkum nda ghuɓa, » kaʼa nda həŋ. 20Ka Piyer nda tsi mantsa: « Ka zaɗa tseda gha nda kagha tani, ka si nda tsedi ta mutsa lu ta skwa mbalay da Lazglafta ka ka ta gray ya. 21Haɗ ŋa gha ma na skwi na wu, haɗ ima gha mida guli wu, kabga slada a ŋuɗufa gha dar ta kəma Lazglafta wa. 22Vziŋ vza ta tsa ghwaɗaka ndana gha ya, ka ɗawa ka da Mgham ta plighistani ta dmakwa tsa ndana gha ya, ka dzaʼa magaku tsi. 23Ta nghadaptá yu ná, ksu ksa ghwaɗaka skwi ta kagha, ma gamaka dmaku ka, » kaʼa nda tsi. 24Ka tsa Simuŋ ya nda həŋ mantsa: « Kdəkwa kdək, magawa vərɗa kaghuni ta duʼa ta ghəŋa ɗa, kada kwala tsa skwiha mna kuni ya da slaɗighata, » kaʼa.

25Tahula mnaŋta taŋ ta gwaɗa ta ghəŋa Yesu Kristi nda gwaɗa ni tani, ka vraghatá həŋ da luwa Ursalima ka dzaʼa nda mna gwaɗa ma ndəghata sana luwaha ta haɗika Samari.

Filip nda mnda luwa Itiyupi

26Ka duhwala Lazglafta nda Filip mantsa: « Sliʼaf sliʼa ka dzaʼa ka nda *Sud, ka dzaʼa ka da tsa vli ta saha ma Ursalima ŋa dzaʼa da luwa Ghaza ya, ya ka mtak tsa vli ya, » kaʼa. 27Ka sliʼaftá tsi ka laghu. Tsaw mamu sana mnda la Itiyupi si ta laghu da maga duʼa da Lazglafta ma luwa Ursalima. Tsa mndu ya ná, ka kuɓitik nzakwa ni. Mndu dagala ya ma slna, ma dzva ni inda gadghəla sana marakw, Kandes hga tsa marakw ya ta nzakway ka Mghama la Itiyupi. 28Ta vru tsi dzagha ni, ka nzamtá tsi ma mwata plisa ni, ka dzaʼa nda dzaŋa deftera anabi Isaya. 29« Gavadagha gava ta vata ya mwata plis ya, » ka Sulkum nda Filip. 30Ka ndadaghatá Filip. Ta snə tsi ná, ta dzaŋa deftera anabi Isaya tsa mnda la Itiyupi ya. Kaʼa nda tsi mantsa: « Nda sna ka ta na skwi ta dzaŋ ka na ra? » kaʼa. 31Ka tsa mndu ya mantsa: « Waká yu dzaʼa snaŋta ka mnaɗif a mndu na? » kaʼa zlghaftá wa ni. Ka hgadaftá tsi ta Filip nzanavata. 32Wya tsa vli ta dzaŋ tsi ya:

« Manda kla tuwak da vla hnay klaghata lu.

Manda nzatá nzakwa zwaŋa tuwak kul haɗ ta gwaɗafta ta kwitsə lu ta swida ni ya

kəʼa nzata, pslaf a ta wa ni wa.

33Ma hanaganata ni ta ghəŋa ni, ka tsanaghatá lu ta guma,

ka dzata. Haɗ mndu dzaʼa kulaŋtá mndəra taŋ wu,

kabga zaɗana zaɗa ta hafa ni ta ghəŋa haɗik#8:33 Aya 32-33: Ngha ta Isaya 53:7-8., » kaʼa.

34Ka tsa mnda la Itiyupi ya ɗawaŋta da Filip mantsa: « Kdəkkdək, mniha mna ka ta ghəŋa wa ta gwaɗa na anabi na ta na gwaɗa na! Ta ghəŋa ghəŋa ni re, ari ta ghəŋa sana mnda a na? » kaʼa. 35Ka zlraftá Filip ta gwaɗa ta ghəŋa tsa vli dzaŋaf tsi ya, ka mnanaŋtá tsi ta *Lfiɗa Gwaɗa ta ghəŋa *Yesu. 36Tata mbaɗa həŋ ta tvi, ka lagha həŋ slafta ta imi ma ghwa. Ka tsa mnda la Itiyupi ya nda tsi mantsa: « Ya wana imi na ní, nu dzaʼa pyafta magaɗiftá batem na? » kaʼa. [37« Ka zlghaf zlgha ka nda ŋuɗufa gha, ta magaku, » ka Filip. « Mantsa nzakwa ni, zlghaf zlgha yu nda ŋuɗufa ɗa kazlay: Yesu *Kristi ná, Zwaŋa Lazglafta ya kəʼa, » ka tsa mndu ya nda tsi.] 38Ka sladanatá tsi ta tsa mwata plisa ni ya. Ka saha həŋ nda Filip mida ka lam həŋ da imi, ka maganaftá Filip ta batem. 39Manda kɗakwa taŋ ta sabi ma tsa imi ya, ka klaghatá Sulkuma Mgham Lazglafta ta filip, gi kuɗataŋ nghəgla a tsa mnda la Itiyupi ya wa. Ka kəɗ tsatsi ta ksa tva ni, ka dzaʼa nda rfu. 40Ka zlagaptá Filip ma luwa Azutu. Ka rə tsi ta luwaha ka dzaʼa nda mna Lfiɗa Gwaɗa, ka laghu trezekw da luwa Sezare.

Currently Selected:

Slg 8: xed

Highlight

Copy