Slg 7

Rusay Atiyen ta gwaɗa Lazglafta

1Ka mali ta ghəŋa gwal dra skwi ŋa Lazglafta nda tsi mantsa: « Tsaw mantsa na skwi ta gwaɗ lu ta kagha na rki na? » kaʼa nda tsi. 2Ka Atiyen mantsa: « Zwana ma ɗa nda dadaha ɗa, maranaŋ mara Lazglafta dagala ta ghəŋa ni ta dzidza mu Abraham ta tsa fitika nzakwa ni ta haɗika Mesuputami ya, makəɗ tsi ka laghu da nzata ma luwa Haraŋ. 3Kaʼa nda tsi mantsa: “Zlaŋ zla ta haɗika gha, nda la ghuni tani, ka dzaʼa ka ta haɗik ya dzaʼa maraghata yu#7:3 Ngha ta Zlrafta 12:1.,” kaʼa. 4Mantsa ya, ka sliʼaftá tsi ka zlaŋtá haɗika Kaldiya ka laghu da nzata ma luwa Haraŋ. Tahula mtatá da ni ka sliʼaftá tsi ka laghu da nzata ma na haɗik ta nzaku kaghuni mida gitana na. 5Ma tsa fitik ya, haɗ vli vlaŋ Lazglafta ka ŋa ni dər ka kwitikw wa. Ama ka tanaftá Lazglafta ta imi ta sləməŋ kazlay: Dzaʼa vlagha vla yu ta na haɗik na, ŋa nzakwa ni ka ŋa gha, nda ya ŋa zivira gha tani kəʼa. Ma tsa fitik ya, ta mutsaf a Abraham ta zwaŋ karaku wa. 6Kaʼa nda tsi guli mantsa: “Dzaʼa laghu la zivira gha da nzapta ta sana haɗik ma mayəm, ŋa dulay lu ta həŋ, ka ga vuʼa ŋa taŋ hada ka vaku fwaɗ dərmək. 7Iʼi dzaʼa ganaptá iri ta tsa gwal ta dula həŋ ya guli. Tahula tsa, ŋa sliʼafta taŋ ka saghwi da tsəlɓu ma ghuva ɗa ma na vli na#7:7 Ngha ta Zlrafta 15:13-14 nda Sabi 3:12.,” kaʼa. 8Ka dzraftá Lazglafta ta wi nda Abraham. Tsiŋtá fafaɗ, na ŋizla tsa dzratá wi ya. Tsaya kəl Abraham ka tsanatá fafaɗa zwaŋa ni Izak baɗu matghasa fitik manda yagata. Mantsa ya Isiyaku, ka tsanatá tsi ta ŋa Yakubu. Yakubu guli, ka ɗatsanatá tsi ta ŋa zwana ni ghwaŋpəɗ his, ta nzakway ka dzidzíha mu ya.

9« Ka drə dzidzíha mu ta Yusufu, ka skwaptá həŋ. Ka klaghatá lu da ga vuʼa ma luwa Masar. Nziya nza tsi, kawadaga Lazglafta nda tsi. 10Ka klaptá tsi ma ɗaŋwa ni, ka vlaŋtá ɗifil ŋa gwaɗa nda Firʼawna ta nzakway ka mghama Masar. Ka zɗəganatá tsi ta tsa mgham ya. Ka fatá mgham ka ŋumna haɗika Masar, ka zwira ni kəʼa fata guli. 11Ka slatá maya ta inda haɗika Masar nda ya ta haɗika Kanʼana. Ghuyaŋ ghuya lu katakata. Ka traptá dzidzíha mu ta skwi ŋa zaŋta. 12Ka snaŋtá Yakubu kazlay, mamu skwa zay ta haɗika Masar kəʼa. Ka ghunadaptá tsi ta dzidzíha mu nda taŋtaŋa səla taŋ. 13Ka ləglap həŋ nda mahisa səla, ka mnanaŋtá Yusufu ta ghəŋa ni ta zwana ma ni. Ka snaŋtá Firʼawna ta mndəra taŋ guli. 14Ka tsghafta Yusufu ta lwi, ŋa hlagaghutá i da ni Yakubu nda la ga taŋ tani. Ta magay mbsaka taŋ ta ndəfáŋ mbsak hutaf mida. 15Ka laha Yakubu da luwa Masar. Hada mtuta tsi. Mantsa ya dzidzíha mu guli. 16Ka hlaftá lu ta mbla taŋ ka hlakta da luwa Səkem. Ka papaɗamtá həŋ hada, ma vli ya skwa Abraham nda tsedi da zwana Hamur ma luwa Səkem.

17« Manda ndusakta tsa fitik ŋa magakwa tsa skwi tanaf Lazglafta ta imi ta sləməŋ ta Abraham ya, ka sgavaghatá yavafta mndəra amu ma luwa Masar. 18Ka laf sana mgham ta pala ma luwa Masar, sna a tsatsi ta Yusufu wa. 19Ka nənɓaptá tsi ta mndəra amu. Ka dulu tsi ta dzidzíha mu, ŋa vlata taŋ ta zwana taŋ tkweʼ ŋa rwanatá həŋ. 20Ma tsa fitik ya, ka yatá lu ta Musa. Ka ka nda ɗinakwa ni, zɗəgana zɗa ta Lazglafta guli. Ka zatá tsi ta tili hkən ta glaku ma həga ga da ni. 21Manda kɗakwa dadaha ni ta klafta ka laghu ɗifanata, ka slafta makwa Firʼawna tida ka klaftá tsi ka klaghata glanafta ka zwaŋa ni. 22Mantsa, ka taghanaftá lu ta Musa ta ɗifila la Masar, ka nzaku tsi ka mndu ta laviŋtá gwaɗa, nda mbra guli ma slna ni. 23Ka kumaftá Musa ta dzaʼa nghanaghatá la taŋ la Israʼila magafər ima ni ta fwaɗ mbsak. 24Ka nghaŋtá tsi ta sana mnda la Masar ta ghuya ɗaŋwa ŋa sana mnda la Israʼila. Ka lagha tsi kataŋta. Ka dzatá tsi ta tsa mnda la Masar ya ŋa play. 25Ba dzaʼa nda sna zwana ma ɗa kazlay: Iʼi fa Lazglafta ŋa mbanaftá həŋ kəʼa, ka tsatsi si ta ndanay, tsaw sna a hahəŋ wa. 26Ga mahtsima ni, ka lagha Musa guyamtá ma lmu ta lmu gwal his mataba la Israʼila. Si ka kum tsi ta dzranaftá həŋ. Kaʼa nda həŋ mantsa: “Graha ɗa! La zwana ma kuni ná, kabgawu ta kəl kuni ka lmu na?” kaʼa. 27Ka tsa mndu ta zbaftá zwaŋama ni nda lmu ya sliŋwidiŋtá Musa mantsa: “Wa ta faghamta ka mghama ŋni ŋa tsa guma ta aŋni na? 28Ari ta kumay ka ta dzihata manda tsa dzata gha ta mnda la Masar ɗahawu ya a kay na?” kaʼa nda tsi. 29Na snaŋtá Musa ta tsa gwaɗa ya, ka hwayaftá tsi ka laghwi ta haɗika Midyaŋ. Ka yayatá tsi ta zwana zgwana his hada.

30« Tahula zata ni ta vaku fwaɗ mbsak hada, ka maranaŋtá duhwala Lazglafta ta ghəŋa ni ma vu ta mubuk ma mtak ta vata ghwá Sinay. 31Ka tsutá Musa ka nghay, nghər tsi ta tsa skwi ya. Ka gavadaghatá tsi ŋa tsəmanavata. Ta gavadaghatá tsi, ka snaŋtá tsi ta lwa Mgham Lazglafta. Kaʼa mantsa: 32“Iʼi Lazglafta dzidzíha gha, ta nzakway ka Lazglafta Abraham, nda Izak, nda Yakubu ya, kaʼa. Ka ghudzaku Musa ta ghudzaku da zləŋ, Walglaŋ a ta nghay wa. 33Ka Mgham Lazglafta nda tsi mantsa: Hlap hla ta ɓaɓah ma səla gha, kabga na vli slada ka na ná, haɗik nda ghuɓa ya. 34Nghadap ngha yu ta ghuya ɗaŋwa ŋa mnduha ɗa ta ghuy lu ma haɗika Masar. Sniɗigha sna ŋa ɗa ghəŋa taŋ, kəl yu ka saha da hlaptá həŋ mida. Ndanana na, sawi ka ghuna yu ta kagha da luwa Masar,#7:34 Aya 27-34: Ngha ta Sabi 2:14-3:10.” kaʼa nda tsi.

35« Va tsa Musa si vziŋ la Israʼila kazlay, wa ta famtá kagha ka mgham, ŋa tsa guma ta ghəŋa aŋni na? kəʼa ya kay, va tsa tsatsi ya ghunaf Lazglafta ŋa nzakay ka mgham, ŋa mbanaftá mnduha ni. Nda ma wa duhwala Lazglafta nghaŋ Musa ma vu ta mubuk ya, mnanata Lazglafta ta tsa gwaɗa ya ta Musa. 36Tsa Musa ya ta hlagaptá zwana la Israʼila, nda maga mazəmzəm nda skwa ndərmimay ma haɗika Masar, nda ya ma drəfa Dva, nda ya ma mtak, ka zatá həŋ ta vaku fwaɗ mbsak ta tvi ma mtak. 37Tsa Musa ya ta mnay nda zwana la Israʼila guli kazlay: Dzaʼa klagap kla Lazglafta ta anabi manda iʼi mataba la ghuni#7:37 Ngha ta Vrafta ta Zlahu 18:15. ya kəʼa. 38Ma fitika tskavata zwana la Israʼila ma zivak, tsa Musa ya ta nzakway ma takataka dzidzíha mu, nda duhwala Lazglafta ta gwaɗa nda tsi, ta ghwá Sinay ya. Hada tsuʼamafta tsi ta gwaɗa hafu ka klamakta. 39Ka kwalaghutá dzidzíha mu ta snanata, ka vziŋtá həŋ, ka kuma vru da Masar. 40“Magaŋnaf maga ta Lazglafta ŋa mbaɗa ta kəma ŋni, kabga sna a ŋni ta skwi ta slanaghatá#7:40 Ngha ta Sabi 32:1, 23. nana Musa ta hlagaŋnapta ma Masar na wu,” ka həŋ nda Haruna. 41Mantsa fitik ya, ka tsaftá həŋ ta skwi manda zwaŋa sla ka pla ghəŋ ŋa ni, ka skalu ŋa skwi ya tsaf hahəŋ nda dzva taŋ. 42Ka mbəɗanatá Lazglafta ta hul ta həŋ, ka zliŋtá həŋ ŋa tsəlɓu ŋa tekwatsaha ta luwa manda ya nda vinda ma deftera la anabi ta mnay kazlay:

Ari la Israʼila, ŋa ɗa plihata kuni ta ghəŋ

ma zata ghuni ta vaku fwaɗ mbsak ma mtak ya ra?

43Ŋa ɗa a wa. Ŋa həga tumpula

Mulku, nda fwata tekwatsa Refaŋ hlaf

kuni ka pghata ka Lazglafta ghuni a tsi kay ra.

Tsaya dzaʼa kəl yu ka hlaftá kaghuni

ka tsughwaɗaghunaptá haɗika Babila#7:43 Ngha ta Amus 5:25-27., kaʼa.

44« Ma nzakwa dzidzíha mu ma mtak ná, mamu si həga tumpul pgham lu ta huzla dzratá wi nda Lazglafta mida, da həŋ. Manda va ya mnanaf Lazglafta ta Musa ŋa magafta ni ya, ka magaftá tsi manda va ya nghaŋ tsi. 45Tahula tsa, ka zlghaftá dzidzíha mu guli da dadaha taŋ. Ka pghaftá Dzesuwa ta həŋ ka hladamta da tsa haɗik ghəzlaf Lazglafta ta mnduha mida ta kəma taŋ ya, kawadaga nda tsa həga tumpul ya. Ka nzaku tsi ha ka sagha ta fitika Dawuda. 46Tsatsi zɗanaŋ Lazglafta ta huɗi, ka ɗawaŋtá da Lazglafta ŋa vlaŋtá tvi, ŋa banaftá həga nda ghuɓa, ta tsatsi Lazglafta Yakubu. 47Nziya nza tsi tama, Salumuŋ ta baftá tsa həga ya. 48Tsaw haɗ Lazglafta Dagala ta nzaku ma həga baf mnda səla manda va ya mna *Anabi kazlay:

49Ta luwa vla nzakwa ɗa,

vla fa səla ɗa ya guli ná, haɗik ya.

Mndəra wati həga ya dzaʼa kuni biɗifta na?

Wati vli ya prək ka lama ɗa dida na?

50Iʼi a ta magaftá tsa skwiha ya ra kəʼa ya#7:50 Ngha ta Isaya 66:1-2.. »

51Ka Atiyen guli mantsa: « Kaghuni ná, təŋ təŋa ghəŋa ghuni. Ta hgə Lazglafta ta kaghuni ná, duduzla ka kuni nzata, va a kuni ta sna gwaɗa da Sulkum nda ghuɓa manda va tsa nzakwa dzidzíha ghuni ya wa. 52Wati ma anabi ya kul ganaptá dzidzíha ghuni ta iri na? Ta psla psla həŋ ta gwal ya ta mna gwaɗa ta ghəŋa mndu ta nzakway tɗukwa. Ta na fitik na guli, ka skwaptá kaghuni ta tsa mndu tɗukwa ya ka dzata. 53Kaghuni ka ghəŋa ghuni ta tsuʼaftá zlahu nda ma dzva duhwala Lazglafta, ka kwalaghutá kuni ta snatá tsa zlahu ya guli, » kaʼa.

Mtakwa Atiyen

54Na snay taŋ ta tsa gwaɗa ya, ka sliʼavaftá həŋ manda binzauŋ ta ghəŋa Atiyen, ka hiʼidə həŋ ta dzvu ka wuslikay. 55Ama ka nghadaftá Atiyen, mndu ya nda ndəgha nda Sulkum nda ghuɓa, ta luwa. Ka nghaŋtá tsi ta glakwa Lazglafta nda *Yesu ta sladu nda ga zeghwa Lazglafta. 56Kaʼa nda həŋ kay guli mantsa: « Wana nda ngha yu ta gunatá luwa. Waʼa *Zwaŋa mndu ta sladu nda ga zeghwa Lazglafta, » kaʼa. 57Ka hlaftá həŋ ta wi katakata, ka dzadzamtá dzvu ma sləməŋ, ka vavalaftá həŋ tida. 58Ka tsəhaftá həŋ ka klaghata tahula luwa, ka zlərtsay nda pala ŋa dzata. Ka pghatá la ka masləmtsəka tsa skwi ya ta lguta taŋ da sana galaɓay, Sawul hga ni. 59Ta zlərtsə həŋ ta Atiyen nda pala ya, ta mag tsatsi ta duʼa da Lazglafta. Kaʼa mantsa: « Mgham Yesu, tsuʼa ta hafa ɗa, » kaʼa. 60Ka tsəlɓatá tsi, ka gwaɗata nda lwi dagala. Kaʼa mantsa: « Mghama ɗa, ma mbəɗanaf ka ta həŋ ta na dmaku na, » kaʼa. Tahula mnata ni ta tsaya, ka sab hafu sref mida.

Currently Selected:

Slg 7: xed

Highlight

Copy