Slg 13

Zabaptá i Barnabas nda Pwal ŋa dzaʼa mna Lfiɗa Gwaɗa

1Ma Igliza luwa Aŋtakiya ná, mamu la anabiha nda gwal ta tagha skwiha ŋa mnduha. Hahəŋ na i Barnabas, nda Simeyuna ta hgu lu ka mnda ŋəra ya, nda Lukiyus mnda la Sireŋ, nda Manaheŋ ta glafta kawadaga nda Hiridus, ya si ta ga mgham ta haɗika Galili ya, nda Sawul. 2Ma sana fitik, ka tskavatá həŋ ka maga duʼa nda sumay. « Hlapwa i Barnabas nda Sawul ya mataba ghuni, ŋa maga slna ya hgaŋ yu ta həŋ, » ka Sulkum nda ghuɓa, nda həŋ. 3Tahula kɗiŋta taŋ ta tsa suma nda maga duʼa ya, ka fanaghatá həŋ ta dzvu ta həŋ ka zliŋtá həŋ.

I Barnabas nda Pwal ma luwa Kiprus

4Ka sliʼaftá i Barnabas nda Sawul, ghunafər Sulkum nda ghuɓa ta həŋ, ka laghu həŋ da luwa Selusi. Hada ŋlafta həŋ ta kwambalu, ka laghwi ta haɗika Kiprus, ta tsavata ma drəf. 5Manda ɓhadaghata taŋ da luwa Salamina, ka mnə həŋ ta gwaɗa Lazglafta ma həga tagha skwa la *Yahuda. Kawadaga Yuhwana Markus nda həŋ ŋa zlghaŋtá həŋ. 6Ka tadaptá həŋ ta tsa haɗik ya ka ɓhadaghata da luwa Pafus. Ka slanaghatá həŋ ta sana ɗəgha, ta hgu lu ka Baryusuwa, sana mnda la Yahuda ya ta niŋtá ghəŋa ni ka anabi. 7Ta vata ŋumna tsa haɗik ta tsavata ma drəf ya ta nzakwa tsi. Tsa ŋumna ya ná, Sergiyus Palus, mndu nda ghunislak ma ghəŋa ni ya. Ka hgaftá tsi ta i Barnabas nda Sawul, kabga ta kumay ta snanatá gwaɗa Lazglafta. 8Lagha tsa ɗəgha ta hgu lu ka Alimas nda gwaɗa *Grek ya, ka dza dza wa taŋ ka zba mbəɗiŋtá zlghay nda ŋuɗufa tsa ŋumna ya. 9Mbaɗa Sawul, ta hgu lu ka Pwal ya, nda ndəghata ni nda Sulkum nda ghuɓa, ka vazlaftá iri tida. 10« Kuslembermbera magakwa gha, dagala nana mnda gha, zwaŋa halaway ka, ghuma inda skwi tɗukwa ka. Yawu dzaʼa zlaŋta kagha ta mbəɗiŋtá tva Lazglafta ta nzakway ka tɗukwa ni na? 11Kəzla tama, wya Mgham dzaʼa dzughusta, ŋa ghulpəta gha. Dzaʼa nzɗavanzɗa ka, haɗ ka dzaʼa nghaŋtá fitik wu, » kaʼa. Gi hada hada tɗik vli ta wa ira Alimas manda vli girviɗik. Ka tatam tsi ta tatamaku ka zba mndu ŋa ksay ta dzvu. 12Nghanata ŋumna ta tsa skwi ta maguta ya ná, ka zlghaftá tsi nda ŋuɗufa ni. Lanafla tsa skwi ta tagh lu ta ghəŋa Mgham *Yesu ya katakata.

I Pwal nda Barnabas ma luwa Aŋtakiya

13Ka sliʼaftá i Pwal nda graha ni ka lami da kwambalu ma luwa Pafus, ka laghu da Perge ta haɗika Pamfali. Ka dgatá Yuhwana Markus ta vgha nda həŋ, ka vraghuta da luwa Ursalima. 14Ka sliʼiglaftá həŋ ma luwa Perge, ka laghu da luwa Aŋtakiya ta haɗika Pisidi. Baɗu *Sabat, ka lam həŋ nzata ma həga tagha skwa la *Yahuda. 15Tahula dzadzaŋafta lu ta vli ma deftera zlaha Musa, nda ya ma deftera anabiha, ka maliha ma tsa həga tagha skwa la Yahuda ya nda həŋ mantsa: « Zwana ma ɗa, ka mamu gwaɗa da kaghuni ŋa vlaŋtá mbraku ta mnduha, laviŋ lava kuni ta gwaɗay ndana, » ka həŋ. 16Ka sliʼaftá Pwal, kaʼa nda dzvu nda dzvu mantsa: Snawa sna la Israʼila nda inda gwal ta tsəlɓu ta kəma Lazglafta! 17Lazglafta mnduha la Israʼila ta zbaptá dzidzíha mu ŋa ŋlanaftá həŋ, ma fitika nzakwa taŋ ta haɗika Masar. Ka hligiŋtá tsi ta həŋ ma tsa haɗik ya nda mbrakwa ni. 18Ta klay ta vaku fwaɗ mbsak maga tsi ta suʼa nzaku nda həŋ ma mtak. 19Tahula tsa, ka zaɗanatá tsi ta mndəra mnduha ndəfáŋ ta haɗika Kanʼana, ka vlaŋtá tsi ta tsa haɗik ya ta həŋ, ŋa taŋ. 20Inda tsa nzakwagapta taŋ ya ná, ta klay ta vaku fwaɗ dərmək nda hutaf mbsak.

« Ka vlaŋtá tsi ta gwal ŋa tsanatá guma ta həŋ, ha ka sagha ta fitika anabi Samuyel. 21Ka ɗawu həŋ ta fanamtá mghama taŋ ta həŋ. Ka fanamtá Lazglafta ta həŋ ta Sawul zwaŋa Kis, ta sabi ma mndəra la Biŋyamiŋ. Fwaɗ mbsak vakwa ni ta ga mgham ta ghəŋa taŋ.

22« Ka mbəɗanatá Lazglafta ta hul ta Sawul, ka mbəɗanamtá ga mgham ta Dawuda ta ghəŋa taŋ. “Slaf sla yu ta Dawuda, zwaŋa Yesay. Zɗəgiha zɗa, dzaʼa magay ta inda skwi ya ta kum ŋuɗufa ɗa,” kaʼa. 23Nda ma zivira Dawuda kləganaghata Lazglafta ta la Israʼila, ta mnda mba mndu, ta nzakway ka *Yesu, manda ya tamaf tsi ta imi ta sləməŋ ya. 24Ma kɗaku Yesu ka saha, mnana mna Yuhwana ta inda la Israʼila kazlay: Mbəɗanafwa mbəɗa ta nzakwa ghuni, ka magaghunafta lu ta batem guli kəʼa. 25Ndusakwa fitika kɗayni ta slna ni, kaʼa mantsa: “Duŋwa wayaka kaghuni nda iʼi na? Ya tsa mndu ta kzlə kaghuni ya a iʼi wa. Wa a tsatsi ta sagha nda hula ɗa, slaghwa a yu dər ka plaptá zuʼa ɓaɓah ma səla ni wa,” » kaʼa.

26« Zwana ma ɗa, kaghuni ta nzakway ka zivira Abraham, nda kaghuni ta zləŋa Lazglafta tani, ŋa amu tsghəgamaghata lu ta na gwaɗa ta mbaku na. 27Tsaw tama, tsatsaf a mnduha ma Ursalima nda mghamha tani ta Yesu wa. Sna a həŋ ta tsa gwaɗa la anabi ta dzaŋə lu inda Sabat ya guli wa. Ka dzanaghatá həŋ ta ghəŋa skwi mna la anabi, nda ma dzata taŋ ta Yesu. 28Dər ma slanagha a həŋ ta skwi prək ka dzata ma mndani wu, dza dza ta na mndu na, ka həŋ nda Pilat. 29Tahula kɗiŋta magatá skwi manda ya nda vinda ta ghəŋa ni ma deftera Lazglafta, ka klaghatá həŋ dzata ta udza zləŋay. Ka klagatá həŋ ka famta ma kulu. 30Ama ka sliʼaganaptá Lazglafta mataba gwal nda rwa. 31Nda ndəgha fitika ni ta mara vgha ŋa gwal ta sliʼafta ma Galili kawadaga nda tsi, ka lafi da Ursalima. Tsa mnduha ya ta nzakway ndanana, ka masləmtsəka ni da mnduha la Israʼila. 32Vərɗa aŋni, tsa *Lfiɗa Gwaɗa ya ta mnaghunata aŋni. Tsa tata imi tanaf Lazglafta ta sləməŋ ta dzidzíha mu ya ná, 33magama ta amu, ta nzakway ka zivira taŋ ya Lazglafta, ma sliʼaganaptani ta Yesu ma mtaku. Wya skwi nda vinda ma Zabura his:

“Zwaŋa ɗa ka,

gita yata yu ta kagha,”#13:33 Ngha ta Zabura 2:7. kaʼa.

34Sliʼaganapsliʼa Lazglafta ta Yesu ma mtaku, walglaŋta a ta mtuta ŋa fəgladamtá mbla ni da kulu ŋa rwutani wa.

“Tsaya kəl Lazglafta ka mnay kazlay:

Dzaʼa vlaghuna vla yu ta tfa wi nda ghuɓa,

nda fa ghəŋ tida,

ya tanaf yu ta imi ta sləməŋ ta Dawuda#13:34 Ngha ta Isaya 55:3. kəʼa ya.”

35Kaʼa ma sana vli guli na:

“Haɗ ka dzaʼa zlanatá mnda gha

ŋa rwutani ma kulu wu,”#13:35 Ngha ta Zabura 16:10. kaʼa.

36Ma fitika nzakwa Dawuda nda hafu ná, mnda ksanatá slna ta Lazglafta ya. Magana maga ta skwi ta kum tsi. Ka mtutá tsi, ka lamtá lu ta vata dzidzíha ni, ka rwuta tsi. 37Ama tsa mndu sliʼaganap Lazglafta nda hafu ya, walaŋ a rwaku ta ksaŋtá tsatsi wa. 38Mantsa tama zwana ma, ɗina ka snaŋta ghuni kazlay: Əŋkaʼ a ka tsa Yesu ya kəl lu ka mnaghunaŋta nda pla dmakwa ghuni kəʼa. Trap tra zlaha Musa ta klaptá kaghuni ma tsa dmakwa ghuni ya. 39Ama inda mndu ta zlghaftá Yesu ná, flaʼu vgha ni. 40Ɗaswa ka kuni tama, da slaghunaghatá skwi mnə la anabi kazlay:

41“Kaghuni gwal ta mna mbrəs nda Lazglafta,

nghawa ngha, ndərmima wa ndərmima,

ka zwaɗutá kuni, kabga dzaʼa magay yu

ta fitika ghuni ta mandərmimi,

ya dər ma kinawu rusaghunafta lu ná,

grafta a kuni ɗekɗek wu kəʼa ya#13:41 Habakuk 1:5.”. »

42Manda saba i Pwal nda Barnabas ma həga tagha skwi, « Kdəkwa kdək, ka vrakta kuni baɗu sana Sabat da mnəglaŋnatá na gwaɗa na, » ka lu nda həŋ. 43Tahula gazlata mnduha, ka sliʼaftá ndəghata la Yahuda nda gwal ta lami nda la da dina la Yahuda mista i Pwal nda Barnabas. Ka ghu həŋ ta yiva. Ka vlə i Pwal nda Barnabas ta mbraku ŋa taŋ. « Dihavawa diha ma zɗakatahuɗa Lazglafta, » ka həŋ nda həŋ.

44Sagha tsa sana Sabat ya, ka tskavatá wər mnduha ma tsa luwa ya demdem ŋa sna gwaɗa Lazglafta. 45Nghay la Yahuda ta tsa tskata mnduha ya, ka lam həŋ nda draku, ka dzadzə həŋ ta wa i Pwal, ka raraza həŋ. 46Zləŋaŋə a i Pwal nda Barnabas ta həŋ wa. Ka həŋ mantsa: « Nda ra má ka tiŋlaghutá mna gwaɗa Lazglafta ŋa kaghuni mazlay, ka kwalaghutá kaghuni. Ra a aŋni ka mutsa hafu ŋa kɗekedzeŋ wu ka kuni ya, dzaʼa mbəɗaghutá vgha ŋni nda təv gwal kul nzakway ka la Yahuda ndana tama. 47Wya skwi mnaŋna Mgham Lazglafta:

“Fa fa yu ta kagha ka tsuwaɗaka gwal kul nzakway ka la Yahuda,

ŋa mnay gha ta gwaɗa ta mbaku#13:47 Ngha ta Isaya 49:6.

ta ghəŋa haɗik tender,” » kaʼa.

48Snay gwal kul nzakway ka la Yahuda ta tsa gwaɗa ya ná, ka rfu həŋ ta rfu, ka zləzlvu həŋ ta Lazglafta. Ka zlghaftá inda gwal thanaf lu ta hafu ŋa kɗekedzeŋ, ta həŋ.

49Ka tutá gwaɗa Mgham Lazglafta ma tsa luwa ya demdem. 50Ka sliʼamtá la Yahuda da gagaftá gwal dagala dagala ta zləŋa Lazglafta, nda gwal dagala dagala ma luwa tani. Ka ganaktá həŋ ta giri ŋa i Pwal nda Barnabas, ŋa ŋawaftá həŋ ma haɗika taŋ. 51Ka tukwanatá i Pwal nda Barnabas ta rgitika səla taŋ ta həŋ, ka laghwa taŋ da luwa Ikwaniya. 52Ta ndaghutá ŋuɗufa gwal zlghay nda ŋuɗuf ma luwa Aŋtakiya da rfu, nda ya nda Sulkum nda ghuɓata ni.

Currently Selected:

Slg 13: xed

Highlight

Copy