Slg 12

1Ma va tsa fitik ya, ka zlraftá mgham Hiridus ta ghuya ɗaŋwa ŋa Igliz. 2Ka dzatá tsi nda kafay ta Yakubu, zwaŋama ni ma Yuhwana. 3Ta nghə tsi ná, zɗəgana zɗa tsa skwi ya ta la Yahuda. Ka ksaftá tsi ta Piyer guli ma fitika skala buradi kul haɗ is mida ya. 4Tahula ksafta ni, ka tsamtá tsi ma gamak. Ka pghatá tsi ta ghuɓa sludzi fwaɗ fwaɗ ŋa mbaɗay taŋ ta vgha ta nghay. Tahula kɗata ma skala *Pak ta ndana tsi ta tsanaghatá guma baŋluwa. 5Ma tsa ŋatá Piyer ma gamak ya tama, ka ŋavata Igliz ka maga duʼa ka ŋɗaŋɗa ta ghəŋa ni.

Zliŋtá Piyer

6Ta tsa rviɗik ŋa tsaɗakwa vla ni ya ta ndana Hiridus ta tsanaghatá guma. Ta hani *Piyer nda tsata ni ma tsuhwalha his ma takataka sludziha his. Ta nzaku gwal ngha wa tgha guli nda təv wa tgha. 7Gi ka zlagaptá duhwala Lazglafta ka tsuwaɗakanaftá vli ma tsa dzuguvi ya. Ka nduhuɗaŋtá tsi ta Piyer ma ŋwazliɓ. « Sliʼaf sliʼa misimmisim, » kaʼa nda tsi. Gi stak saha tsa tsuhwalha ya tsa ta dzva ni. 8« Hbana ɓanava gha ka suɗamta ka ta ɓaɓaha gha, » ka duhwala Lazglafta nda tsi. Ka magatá tsi mantsa. « Fava lguta gha, sawi mista ɗa, » kaʼa nda tsi. 9Ka saghu Piyer ma gamak mista tsa duhwala Lazglafta ya. Zbaŋ a tsatsi kazlay: Kahwathwata na skwi ta mag duhwala Lazglafta na re ari ki na kəʼa wa. Zlah suni na skwi na ta faɗighata, ka tsatsi ta ndanay. 10Ka tsughwaɗagaptá həŋ ta taŋtaŋa ghuɓa tsa gwal ta ngha mnduha ya, tsughwaɗapha həŋ ta mahisa ni. Ka lagha həŋ ta vata sana wa tgha haf lu nda kfur ta tva lami da huɗa luwa. Ka gunutá tsa wa tgha ya ka ghəŋa ni ta wa ira taŋ. Ka sab həŋ, ka ksaftá həŋ ta tvi, gi ka zlanatá duhwala Lazglafta hada.

11Ma tsa fitik ya zlrafta Piyer ta snaŋtá skwi ta magaku. « Ndanana, grafta yu dar kazlay: Mgham *Yesu ta ghunagatá duhwala ni klaptá iʼi ma dzva Hiridus nda ya ma inda ghwaɗaka skwi si ta kum la *Yahuda ta slaɗighata ni, » kaʼa.

12Na snaŋta ni kazlay: Manda va tsaya nzakwa ni kəʼa, ka sliʼaftá tsi ka laghu da Mari ma ni ma Yuhwana, ta hgə lu ka Markus ya. Hada, nda hiɓa tskatá vgha mnduha ta maga duʼa. 13Ka lagha Piyer dzaŋtá wa tgha lam da həga. Ka gavadaghatá sana marakw ka kwalva, ta hgə lu ka Ruda, da sna lwa ni. 14Ka tsatsaftá tsi ta lwa Piyer, ka rfu tsi ta rfu. Ma ŋa gunatani ta tsa wa tgha ya ná, ka hwayaghatá tsi da huɗa həga da mnay kazlay: Waʼa Piyer mabli kəʼa. 15« Nda ksa ka da skwi ra! » ka həŋ nda tsi. « Kahwathwata ta mna yu, » kaʼa ta ghəŋa ni. « Ba sulkuma ni ya, » ka həŋ. 16Mbaɗa Piyer ka gɗavata ta dza wa tgha. Manda gunata taŋ ta wa tgha ka nghaŋtá həŋ ta Piyer. Ka ndərmim həŋ. 17Kɗkəɗkɗ, ka Piyer nda dzvu ka lɓanatá həŋ. Ka rusanaftá tsi ta həŋ ka Mgham Yesu kligiŋta ma gamak. « Ka dzaʼa kuni da rusanaftá i Yakubu nda sanlaha ma zwana ma, » kaʼa nda həŋ guli. Ka gi sab tsi ka laghu da sana vli. 18Tsaɗakwa vla ni, ka kəɓutá la sludzi katakata. « Ka wu nuta na Piyer na tama? » ka həŋ. 19« Psawa manda va psay, » ka Hiridus. Lay, ngha a wa. Lagha ni ka ɗaɗawanaptá vli ta tsa gwal si ta nghay ya. Ka vlatá tsi ta tvi, ŋa pslatá həŋ. Tahula tsa, ka sliʼaftá Hiridus ma Zudiya ka laha da luwa Sezare, ŋa nzəɗavata ka fitik tsəɓakw hada.

20Ka ɓasaftá mgham Hiridus ta ŋuɗuf katakata ta ghəŋa gwal ma luwa Tir nda Tsiduŋ. Ka dzraftá tsaha ya ta wi ka skwa turtuk ŋa lagha ta kəma ni. Ka sutá həŋ ta ghəŋa Blastus ta nzakway ka zwira mgham ya. Ka lagha həŋ ɗawa dzrafta nda mgham, kabga ma haɗika tsa mgham ya ta saba skwi ŋa zay taŋ. 21Baɗu tsa fitik tsaf həŋ ya, ka suɗavatá Hiridus ta lguta mamgham mghama ni, ka nzafta ta dughurukwa ni, ka ŋəzlatá tsi baŋluwa. 22« Lazglafta ta gwaɗa, mndu a wu, » ka mnduha hlaftá wi. 23Gi hada hada, ka dzuŋtá duhwala Lazglafta ta Hiridus, kabga kwala ni kul vlaŋtá glaku ta Lazglafta. Ka dəghaɗutá mtarak, ka mtutá tsi.

24Mbaɗa gwaɗa Lazglafta ka ta vgha, ka sgaku mbsaka gwal zlghay nda ŋuɗuf nda sga. 25Manda kɗiŋta i Barnabas nda Sawul ta slna ya ghunaf lu ta həŋ da Ursalima, ka vraghutá həŋ. Ka kliŋtá həŋ ta Yuhwana, ta hgə lu ka Markus ya, mista taŋ.

Currently Selected:

Slg 12: xed

Highlight

Copy