SOOLLA 109
109
Tiina vi sa ma ka lasna
1Soolla vi sa ma fok suu gi soollana, soolla vi David.
Ҥi, Lona, an ka ŋgaaŋu, seŋ taŋ kiɗi,
2kay suu li dla cora u suu kaboyna ŋguyunu,
asi njaɗanni u della kaboyna.
3Asi ŋguyun yan u boy masi ma gonokka,
asi duu u anni bay u boyna.
4Kay min manda asi ka duurunu,
an may ni, an ka ceneŋu.
5Asi hoŋoŋ jivira ni u cora,
min manda asi hoŋoɗ ni u honira.
6Asi di ana, man sa ma dew a kaam ɓakŋa kamba,
ni sa ma co ma kal kamma.
7Hu li ma kaɓakŋa ni kaam ɓak ma cona kamu,
cen mamba mbuɗ ki ni sulukŋa.
8Ko buu mam ma hu duliyara hoŋ ay ki dagani,
sa ma daŋ varak ki hu balamamu.#Sun. 1.20
9Ko goryom hin ki kuyu wa,
ko caamba hin ki donoo.
10Ko goryom hin ki a suu zolomba,
a suu saa tlena vi suuna ɦawaa,
asi tuɗ saa tina
ha ki day eg ziisi ma ki bowi gana.
11Ko suu cona ɦurumusi tlegeyesi kiyo,
ko suu daŋŋa ɓaɗasi warak masina kiyo.
12Ko sa li u nam ɗegee dewɗi,
ko sa wam hahaw goryom suu kuyunaɗi.
13Ko njafam bulum kiyo,
sesi bulum ki duk njaf suu hin ka daganna.
14Yawe humum gam kay cora somoyosi laɗta,
a cora vi sumba ko bulum kiɗi.
15Ko dla ndaɗta hin ha fok Yawe na gak gak,
nam bulumusi dlasi ki hu duliyara.
16Sa namma ka min a li dlara jivi na dewɗi,
nam las suu hawra ko casi ki cira na,
ci sa ma hahawra lay,
17nam minni givunna,
nam hin hoŋŋi kam tamba tok,
nam ka min paɗvunnaɗi,
paɗvunna ɦuɗ ha ki egem day may,
18nam cuk givunna egem ko ndal barawna na,
givunna kal ki duk tliwim ko ndal yona na,
hoo ki egem ko ndal mbulna na.
19Ko ndaɗ hin egemmi a baraw mam ma cukka,
ni a tlakara njuni hurumba.
20Yawe warak suu gonokka u anna ni
ko ndaɗta na.
Ni suu ɓak dla cora u senna.
21Aŋ Yawe, Bu Suuna, wan hahawanu,
ni a suuna ŋgaaŋ seŋu.
Ɗegee maŋga u dlara aŋ laɗ jivira, buɗun kiyo.
22Anni sa ma haw cocoo, ki hahaw coco lay,
hurun kurufu ni ki kaay mbilna.
23An tuɗ ki ni ko ŋgus ma fiɗigina ɦawa na,
asi dikinni ko ndal jeena na.
24An li laara tliwin mbuɗ ki maŋi cocoo,
goloŋot sen mbuɗ muɗunu,
mbul ka duk sokon oloɗi.
25An mbuɗ ii suuna ni a va ma sanda,
suuna wan na ni kisik yasi unu.#Mat. 27.39; Mark 15.29
26Njununu, Yawe, Loonna.
Suɗun ki ni u ɗegee maŋga.
27A asi waŋ koŋ ma saɓakŋa,
waŋ sun maŋga may, Yawe.
28Asi ka ŋguluŋu, aŋ paɗ vunuŋ ki kasi may.
Gola, asi yow kolo, mbuɗ kasi ni zolona,
saaŋ ma sunda furiya.
29Ko suu yakanna zolo masina hoŋ ha kasiya,
zolona kuluɓusi ko barawna na.
30An geleɗ Yawe kolo u delenda eŋga,
an ŋgaam duk suu moli cocona.
31Kay nam ka njun u suu hawra,
kay suɗusi ki ko suu kaɓakŋa.
Currently Selected:
SOOLLA 109: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
