SOOLLA 107
107
MAGAARA VADLLA
SOOLLA 107—150
Gi deɓ Lona ma buɗ suuna kina
1Ŋgaagi Yawe kay nam jivi ɦay,
ɗegee mamba ha ni na din din.#1 Dlaŋ 16.34; 2 Dlaŋ 5.13; 7.3; Ezd. 3.11; Soo. 100.5; 106.1; 118.1; 136.1; Jer. 33.11
2Ko suu Yawe suɗusi ay kina
dam dlam ha kiyo,
suu nam suɗusi ay ki ko suu babali masisinana,
3suu nam tokosi ay ki hu mbassa zeɗ zeɗna,
ay u maɗina u fiɗigina, ay mbayaw u dali layna,
nam hoŋosi ay ki hu mbas masira.
4Suu daŋŋa viɗ ha ki ŋgoo bagiya,
asi fi zi ma asi a lak huna kaɗi.
5Mayra casiya, laara lasi lay,
asi laɓ ha ki ŋgooro.
6Asi yi kolo eg Yawe hu las masira,
nam buɗusi ay ki hu wihaw masira.
7Nam takasi voɗta tuɗ ɗegeera
a tuɗ hu ɦoŋzi ma asi a lak huna.
8Ko suuna ŋga Yawe kay ɗegee mamba,
u dlara mbuɗ mbuɗta nam laɗ kay suu warnara.
9Kay nam ɦal yona maŋ suu laara casina,
hoɓ hay suu mayra casina may.
10Suu daŋŋa laki duk ndufunda,
njuni ga u kinjiŋŋa,
asi ka las hu daŋgayna.
11Kay asi hum ka u gaɗta vi Lonaraɗi,
asi ŋgel gaɗta vi ma Kolo Dayna.
12Asi maŋ tasi ki u lassa cocoo,
sesi daɓ lay sa ma njunusi kaɗi.
13Asi yi kolo eg Yawe hu las masira,
nam suɗusi ki hu wihaw masira.
14Nam taɗasi ay ki duk ndufunda,
hu lina vi suu miɗina,
nam kaasi kinjiŋ ma sesina kiyo.
15Ko suuna ŋga Yawe kay ɗegee mamba,
u dlara mbuɗ mbuɗta nam laɗ kay suu warnara.
16Kay nam kus kawi ma fun zinana kiyo,
kus kawi ma fun goŋgana ki lay.
17Suu giniŋŋa u poy masira cora ci maɗna,
dla coosira mbuɗusi ki coo,
18may va ma ti ka kasi oloɗi lay,
asi tew ki na tok eg li ma miɗ kina.
19Asi yi kolo eg Yawe hu las masira,
nam suɗusi ki hu wihaw masira.
20Nam sun boy mamma ay a garaɗasi kira,
paɗasi ay ki hu zulla may.
21Ko suuna ŋga Yawe kay ɗegee mamba,
u dlara mbuɗ mbuɗta nam laɗ kay suu warnara.
22Asi li ɓivun ma gi deɓpa maŋ Lona,
di ki kay sun mamba u furira.
23Suu daŋŋa tuɗ duk mbo lum ŋgolna
u lum kawina,
li sun masira duk mbo ŋgolna,
24suu asina wi sunda Yawe laɗ u bik komba,
u dlara mbuɗ mbuɗta duk mbo lum ŋgolna.
25Boy ma nam damma
col babaa ma ŋgolna kolo kay mbona,
bil mbona ka kolo u lum kawina cocoo.
26Lum kawina tuɗ koloo, hoŋ ga hu gaalina,
suu hurumma mbuɗ ki ndaa cocoo.
27Tasi mbuɗ ki ndaa cocoo,
asi mbuɗ ko suu gurɗi u sumana na,
yal masina viɗ ki irisi na halaŋ halaŋ.
28Asi yi kolo eg Yawe hu las masira,
nam paɗasi ay ki hu wihaw masira,
29nam col bil mbona na ɗigiɗ gaw,
mbo ma li ɓaɗna seŋ tam halaŋ.
30Asi mbuɗ furira kay mbona seŋ tamba,
Lona tinisi ha ki hu li ma asi min taɓa ki huna.
31Ko suuna ŋga Yawe kay ɗegee mamba,
u dlara mbuɗ mbuɗta nam laɗ kay suu warnara.
32Asi geleɗem hu li ma suuna ka toki huna,
ŋgaam hu li ma suu ŋgolona tok tasi huna may.
33Lona ndak a mbuɗ lumma ki li ma mbassa,
mbuɗ li yona huna ki li ma yo hawra.
34Mbuɗ ndaŋgara jiv tlena ki a ndaŋgara himiina,
ni kay cora vi suu ka cuki hu mbas ndaɗtana.
35Nam ndak a mbuɗ li ma mbassa ki li ma mbona,
li ma haw yona ki li ma yona huna may.
36Nam cuk suu mayra casina huwa
asi ka ɦoŋzina ki hu li namma.
37Asi zum senena huwa,
horok sene gugutlura hu may,
asi ka ti vuɗ tle asina.
38Lona paɗ vunum ki kasiya, asi zul cocoo,
yoori masisina zul coco lay.
39Suu daŋŋa hoŋ ki dagan ko lassa su kasira.
40Nam tin lassa kay suu ɦizi suu ka huna,
Nam viɗisi ki ŋgoo bagi hu li ma bay voɗta huna.
41Nam ka gol suu hawra ko lassa,
zulusi suu masisina ko yoorina na.
42Hu li namma suu ɗegeena furi cocoo,
bay ɗegeera ka hu oloɗi.
43Sa ma min a mbuɗ yalna ni gege?
Nam gol tlesuu li asina jiviya,
a suuna wi jivira vi Yawe ki jivi may.
Currently Selected:
SOOLLA 107: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
