SOOLLA 106
106
Jivira vi Yawe kay suu mamsina
(Ɓer. Soolla 106.47-48; 1 Dlaŋ Mulinara 16.34-36)
1Halleluya.
Ŋgaagi Yawe kay nam jiviya,
ɗegee mamba ka ni na din din.#1 Dlaŋ 16.34; 2 Dlaŋ 5.13; 7.3; Ezd. 3.11; Soo. 11.5; 107.1; 118.1; 136.1; Jer. 33.11
2Sa ma ndak a wi sunda ŋgolora vi
Yawe ni gege?
Sa ma ndak a ŋgaam ŋgol mambana ni gege?
3Furira ka kay suu li jivira
u suu ka li u ɗegeera hu buuna halaŋŋa.
4Hu li ma humuŋ gaŋ ay kay suu maŋsina wa ni
aŋ saa ay kan may Yawe.
Aŋ a suɗusi kira ni gol iriŋ ay kan may.
5Hinin an wi jivira vi suu aŋ manasina
u irin may,
taɓ furi manda u suu maŋsina may,
ɓorow jivira u asi hu mbas maŋga may.
6Ami halaŋŋi ko somoyomi na may,
lami cora egeŋu,
ami hiniŋ voɗ maŋga kiyo,
ami mbuɗ ki ni suu cona.
7Somoyomi ay hu Egipte
ni hum dlara mbuɗ mbuɗta aŋ laɗta kaɗi.
Asi maa ki kay jivi maŋga halaŋ,
asi mbuɗ tasi a suu duu u aŋŋa
fun mbo Lum ŋgol ma Cerewna.#Kal. 14.10-12
8Nam suɗusi ki ni kay nam vi vunum ki
ana nam min suɗusi kiyora
ni kay a tak ki ni ŋgol mamba.
9Nam so mbo lumma Cerewna kiyo,
hinisi asi tuɗ kay ndaŋgara ko ndal
hu li ma mbassa ɦawa na.#Kal. 14.21-31
10Nam suɗusi ki ko suu babali masisina,
nam doo kasi ko suu duu u asina.
11Mbo lumma hoŋ kuluɓ kay suu babali masisina,
asi ba ki halaŋ, sa suɗ ka dewɗi.
12Suu mamsina vi u boy mamma
asi gi soolla geleɗ Lonara.#Kal. 15.1-21
13Na gawni humusi maa ki kay sun mamba,
asi juɓ dlara Lona min a laɗ kasi fokka kaɗi.
14Ŋgoo bagi hu fulla ni
hurusi gijaŋ saa kay tlena,
hu li ma asi ki ŋgoona,
asi gijaŋ tuk Lona u boyna.#Ndu. 11.4-34
15Lona hasi va ma asi joɓom kamma,
may Lona sunusi tuguɗiira ay kasiya.
16Hu li ma asi ka ŋgoo bagina,
asi mbuɗ yara eg gi Moiz u Aaron
sa ma Yawe manam kina.#Ndu. 16.1-35
17Vun ndaŋgara mal ki lik Datan kiyo,
ndaɗ kuluɓ suu vi Abiramma ki halaŋ.
18Kura ŋgalasi suu masi suu duuna kiyo,
ku ndaɗta ŋgal suu ka wi Lonɗina kiyo.
19Hu Horeb asi min lo goo mbutlna,
asi goɓ kaŋga fok kawi ma yoorina.#Kal. 32.1-14
20Asi mbuɗ bibiŋil Lonara ki u
foto mbutl ma ti haɗna ɦawaa.
21Humusi maa ki kay Lona ma suɗusina,
ma li dlara mbuɗ mbuɗta ŋgolora ay hu Egiptena,
22li dlara mbuɗ mbuɗta ay hu mbassa vi Kamba.
Li sunda mbuɗ mbuɗta hu mbo lum ma Cerewna.
23Lona hal gin a baasi ki halaŋ,
na may Moiz sa ma nam manamma col ki fokomu,
cenem kay nam heɓ hurum kiyo.
24Asi gol mbas mayra jivi cocora ki lalasi,
asi vi ka u boy mammaɗi.#Ndu. 14.1-35
25Asi laki hu mbutluɓ masina ni gurni eg Lona,
hum ka u del Yawe ta nam dasiraraɗi.
26Lona tli kom kolo suu tam ana,
nam hinisi asi daɓ ki miɗna ŋgoo bagi hu fulla,
27nam njayasi njafasi ki duk njaf suu ɦawana
hu duliyara halaŋ.
Nam casi ha ki duk suu ɦawana.#Lev. 26.33
28Olo, asi gijaŋ goɓ kaŋga fok Baal Peor,
asi ti ɓivun ma lam maŋ suu miɗinana.#Ndu. 25.1-13
29Dlaasi ndaɗta ɓeŋ huu Bu Suuna ki cocoo,
tuguɗiira cora ndi kasiya.
30Na ɗaŋŋi Pinhas col kolo
kaɓakŋa kay suu li cora,
tuguɗiira hin hinisiya.
31Lona gol dla ndaɗta irimmi a sunda jivira,
ha fok na gak gak kay njaf suu Israelna.
32Hu li ma asi tew tok eg mbo ma Meribana,
asi ɓeŋ huu Lona olo.
Hu li namma Moiz fi daŋgayna lay,#Ndu. 20.2-13
33hu li ma Moiz hurum ɓeŋ kina ni,
nam ɓak boyna maŋ Lona ni ka saa oloɗi.
34Asi ci suu hu mbassa ndaɗta ka ki halaŋ
ko Yawe dasira naɗi.#Suu 2.1-3; 3.5-6
35Asi ɗumusi goryosi usiya,
gijaŋ a goɓ loogi suu ɦawana ko asi na may.
36Asi sunusi fuli masisina,
boy namma mbuɗ ni daw ma vasina.
37Asi li ɓivunna ki u goryosiya.
Ҥal gorɓii masisina ki maŋ fulina.#2 Mul. 17.17
38Asi vo busu ma li co kaɗina ki gaa,
busu gor njufii masisina u gorɓii masisina,
asi li ɓivunna maŋ fuli suu Kanaanna,
asi ɓalak mbassa ki u busuna wa.#Ndu. 35.33
39Asi mbuɗ tasi ki nje njera u dlara asi laɗta,
asi mbaɗ Lona u fuli suu asi goɓosina.
40Huu Yawe ɓeŋ eg suu mamsina,
nam ba suu gin a suu mamsinana kiyo.#Suu 2.14-18
41Nam yow kom ki kasiya, hinisi ki maŋ suuna,
suu babali masisina kak ki mulla kasiya.
42Suu babali masisina lasasiya,
asi ɦeɓesi a asi hum usiya.
43Nam buɗusi ki hu lassa sem bolowo,
asi ka so hurusi hu dla cora gak gak,
asi cuk gaa hu dla coosira.
44Nam ka golosiya,
hu ku na nam humusi tii masina.
45Humum gam kay galamba nam vaɗ u asira
u ɗegee mamba nam wasi hahawasiya.
46Nam mbuɗusi hurusiya, asi mbuɗ irim hahawi,
ko dlara ka lasira halaŋ.
47Suɗumi kiyo, Yawe, Loomina,
tokomi ay ki duk njaf suu daŋŋa.
Ami hin geleɗeŋŋi seŋ ma teteɗna,
ami hin ɦaŋ ŋgolla ni maŋ aŋ dew.#1 Dlaŋ 16.35-36
48Gi deɓpa maŋ Yawe, Lona vi suu Israelna,
ay hu gijaŋŋa ha fok na gak gak.
Suu halaŋŋa di ana, «Amin.»
Amen. Halleluya.
Currently Selected:
SOOLLA 106: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
