VUN ŊGOLNA 14
14
1Cara wi dlara min ziiɗ koloo.
Cara tafaɗira bowom ki kaŋgaa.
2Sa ma poy poyra ɗegeera li ni ndaa Yawe.
Sa ma poy poyra cora panni Yawe may.
3Sa ma laɓana di ni boy ma ŋga tara sak sak.
May boy ma vi sa ma wi dlara njun kamu.
4Sa ma mbutl ma zum ka kombina,
vee mamma ni va ka huɗi.
Mbutli suu li sunda coco ɦayna mba tlena ay vo cocoo.
5Sa ma diki ma gasina ka kaboyɗi.
Sa ma diki ma cona njaɗ ni dlara kaboyna sak sak.
6Sa panna hal yalna ni ka fambi.
Sa ma saa dlara ki jivi tuna fi yalna ni na zak may.
7Poy ko taŋ u sa ma laɓanaɗi,
kay aŋ ka ndak a hum dlara haɗ ay funumbi.
8Sa yalna fuɗ tam hu poy mamba kay nam sa ma wi dlara.
Sa ma laɓana viɗ tam ki u giniŋ mamba.
9Sa ma laɓana ka caa yam a ɗoɓ coombaɗi.
May suu ɗegeena jivira ka kasi tew tew.
10Huu sana wi dlara ka tam tamba ni namu.
Sa ma daŋ ka ndak a kal furi mamba ha hurumbi.
11Zi ma vi suu dlasi cona hin hawaɗ kiyo.
May mbutluɓ ma vi suu ɗegeena hin weleɗ na gak gak.
12Sana gol tam ana poy mamba ni jiviya,
doli ɗini poy ndaɗta tuɗummi fun miɗna.#Vun 16.25
13Sana vunum san may, hurum kurufu oy u yoora,
furira tuɗ daɓ taɗ ki ni u yoora.
14Sa ma ɦay ɦayra hin fi warak ɦay ɦay mamba.
May dlara vi sa ma ɗegeenara ni jiviya.
15Sa ma giniŋŋa vi dlara suuna daɗta halaŋ.
May sa ma neeyna li dlaamba ni u saara tuwa.
16Sa ma wi dlara li ndaa cora fuɗ tam ki koɗu.
Sa ma laɓana taɓa ha kay dlara halaŋ,
gol ana va ma lam ka huɗi.
17Sa ma mbuɗ yara na ɦay ɦayna ni sa ma laɓana.
Sa ma mbuɗ duk u ŋgeŋŋa cow cowna,
sa ka yam sem jiviɗi.
18Suu ka wi dlaɗina, vaasi ma asi famma ni laɓara gaw.
May suu ɗilina joosina ni wira yalna.
19Suu cona hin hom yasi ga fok suu ɗegeena.
Suu dlasi cona hin lakŋi vun grekŋa vi suu ɗegeena.
20Sa ma hawra ndarayam suu zina lay,
sa ma wam ii kaɗi.
Sa ma ɦizina banayamma ka ndumbi.
21Sa ma pan ndarayam suu vok zina li ni sulukŋa.
Sa ma wi hahaw suu hawrana, furira ka kamu.
22Suu saa saara cora viɗ tasi ki ni viɗiya.
May ɗegeera u jivira ka ni kay suu may suu li dlara jivira.
23Sunda halaŋŋi, fiiɗna kaa.
May ɦay ɦayra, vaaɗ kaɗi.
24Suu wi dlara warak masina ni begera asi faɗta.
Suu laɓana ka ndak a hin giniŋ masira kiɗi lay.
25Sa ma diki ma gasina suɗ iirira vi suuna bolowo.
May sa ma kaboyna viɗ suuna kiyo.
26Saɓak ma ŋgol cocona ka hu ndaa ma lam u Yawena.
Kay goryommi nammi li ma ŋgayra.
27Ndaa ma lam u Yawena ni mbo ma iirina,
Nam suɗ suuna ki hu bayra vi maɗnara.
28Mul ma suu mamsina bolow cocona suuna ŋgaamu.
Ma suu mamsina ka ŋgolɗina ni mul mamba hin bulum kiyo.
29Sa ma ka mbuɗ ya na zakgina ni sa ma suuna humumma.
May ma mbuɗ yara zak zakŋa tak ki ni laɓa mamba.
30Huu ma haɓma ni iirira vi mbalata sanara.
May yowmusna ni mbil mbeŋ ma ay duk sokŋa dayna.
31Sa ma las suu maŋina las ni malam ma lamma.
Sa ma wi hahaw suu hawrana ŋga ni malasi ma lasina may.
32Cora vi sa ma dlam cona vam ga ni ndaɗ tok.
Hu buu ma miɗna lay,
Sa ma ɗegeena, ɗegee mamba suɗumu.
33Yalna buu ni huu sa ma neeyna.
Na ni duk suu ka laɓana ni ndak fam dukusi na lay su?
34Ɗegeera wul suuna foko.
Dla cora ni zolona kay njaf suuna halaŋ.
35Mulna ŋga ni sa ma li sun mamba ɗegeena.
Nam tak yaamba ki ni eg sa ma mbaa dlara zolona kay suuna.
Currently Selected:
VUN ŊGOLNA 14: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
