VUN ŊGOLNA 15
15
1Hoŋ di mayra jivira heɓ yara kaŋgaa.
May boy cona joo yara ay kolo ni joori na ɗow ɗow.
2Sa ma wi dlara ɓak boyna ni suuna humum boy mamma jivi cocoo.
May sa ma tafaɗina njaɗ ni dlara uɗ kaɗira ɦawaa.
3Ii Yawe ka ki hu lina halaŋ,
wi suu cona u suu jivina halaŋ.
4Boy ma so huuna ni guna vi iirira.
Boy ma cona ɓalak huu sana kiyo.
5Sa ma laɓana ka vi vun bumbi.
Sa ma hum gaɗta jivina ni sa ma ɗilina.
6Sa ma ɗegeena tlena kom vo huu ziim cocoo.
May begera faɗ ay u li iira mbaaraŋ kaŋŋi dlara hahawra.
7Boy ma vi suu wi dlara ka tak haɗta,
may suu laɓana ni va ka kasi na dewɗi.
8Ɓivun ma vi suu dlasi cona ka ii Yawe jiviɗi.
Nam tin humummi kay cenda vi suu ɗegeena.
9Poyra vi suu dlasi cona ka ii Yawe jiviɗi.
Nam minni suu may suu hal a li dlara ɗegeera.
10Gaɗta ŋgolla ka kay sa ma calaɗ voɗta kina.
Sa ma ka hum u nera ka neembaɗina hin miɗ kiyo.
11Yawe wi dlara ka li ha hu lina vi suu miɗinara halaŋ.
Nam wi saara ha kurufu huu sanara ki ni su olo.
12Suu ŋga tasina ka min hum u gaɗta vi saɗi.
Asi ka tuɗ a joɓ dla eg suu wi dlaraɗi lay.
13Huu ma ki jivina tak ki hu vok sana kiɗikki.
Huu ma ɓalakina mbaa ay ni yoora hu ŋgus maŋga.
14Huu ma ɗegeena hal ni yal ma wi dlara.
Vun suu laɓana min ni dlara tafaɗira.
15Buu ma vi sa ma yoora halaŋŋi coo.
Iirira vi sa ma ka furi tew tewna ka ni u ayra.
16Mariyaɗ ni hin taŋ hawra hum u Yawe,
ni jivi su mayra aŋ ɦiz taŋ ki u begera ɦaramba.
17Mariyaɗ ni ti mbala dlemma u minda jivira,
su mayra ŋgaɗ bolo mbutl ma ɗorina u vunna hu cocora.
18Sa ma mbuɗ yara ɦay ɦayna mbaa ɦonira duk suuna.
Sa ma sip dlara heɓ huu suuna kaŋga may.
19Voɗta vi suu zolomba tlesuu siina huruɗ cocoo.
Voɗta vi sa ma ɗegeena ki toori jiviya.
20Goo ma wi dlara cocona furi huu somoyom cocoo,
may ma laɓana ka ŋgaasiɗi.
21Sa ma ka wi dlaɗina furi kay dlara tafaɗira.
Sa ma neeyna tuɗ ni hu voɗ mamba na ɗegee.
22Lini aŋ a li dlara ka joɓ saɗi ni, dla ndaɗta ka liɗi.
Dlara li ki jivira ni u gaɗta suuna daŋ ay duk zeɗ zeɗta.
23Furira ka coco kay sa ma wi yal hoŋ dira ɦayna.
Boy ma dam eg liim na ɗegeena jivi cocoo.
24Sa ma neeyna tuɗ ni hu voɗta tuɗum hu iirira.
Nam hin voɗta tuɗum hu maɗnara kiyo.
25Yawe to zi ma vi suu ŋga tasina kiyo.
May nam col zi ma vi cara donara eŋe.
26Yawe ka min mbeleŋ ma lam a li dla coranaɗi.
Boy ma dam jivina irim jiviya.
27Sa ma godlom gursura cocona mbaa ni dla cora kay suu mamsina.
Sa ma ka hin tam a sa gusum ki u bege ɦawaɗina hin furi may.
28Sa ma ɗegeena saa dlara ay ki saa hin hoŋ dira ni na tuwa.
May sa ma dlam cona vin ha ki ni boy ma cona sak sak.
29Yawe col ha ki eg suu dlasi cona ni na day.
Nam ka hum cenda vi suu ɗegeena.
30Golla gol u iira jivira furi huuna cocoo.
Boy ma ayra ɦal saɓakŋa maŋ sana.
31Sa ma tin humum jivi a hum nerana
hin cuk ziimmi duk suu wi dlara.
32Sa ma ka hum haɗta vi saɗina las ni tamu.
Sa ma ka hum nera vi suunara ni sa ma hin fi saara jivirana.
33Ndaa ma lam u Yawena haɗ yalna maŋ suuna.
Jew a fi bibiŋillara ni hoŋ yamba kaŋgara.
Currently Selected:
VUN ŊGOLNA 15: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
