FILIPINA 2
2
Lalamba u ŋgolla vi Kristu
1Viigira hu Kristu mbuɗugi saɓak su su? Min mamba ɦagi eŋga wan su? Hurugi taɓi u Musuk Lonara su? Na ni agi hurugi taɓi duk tagiya, li dlara jivira duk tagi su? 2An min joɓogiya mbuɗun hurun furira u minda min tagira, agi mba li taɓi u minda dewra hurugi halaŋ. 3Lagi va u saara ŋga taraɗi, u dlara bay uɗta a tak tagira ɦawaɗi, lagi lalamba eg tagiya tagiya, gol ndarayaŋŋa ŋgol su taŋga. 4Sana hal a li va ma jivina kay tambaɗi saaragi dlara jivira kay ndarayagina. 5Vagi hurugi ni saa mayra mbay hu Yesu Kristura.
6Nam ma ay ko tam u Lona day dayna,
hal dla mayra ŋga tam u Lona kaɗi.
7Nam noy dlaamba nam ay gin u ndaɗta kini
noy na ɗaw hin mbuɗ tam ki sa sunda#2.7 sa sunda vun grek ni mbaɓuna..
Nam mbuɗ tam ko sa warna na,
tak tam ki ko sa warna na.
8Nam vi kam a kak iiri u lalamba
tak ana nam hum vunna
gak gak hu miɗna,
miɗna hu gu garakŋa.
9Ni kay ndaɗta Lona tlam hu li ma kolo dayna,
ɦam semma ŋgolna su semma halaŋŋa.
10Kay suu kolo huulona u suu kay ndaŋgarana
u suu u ndaŋgara kaŋgana
mba hum u sem Yesu,
goɓ kaŋga u vun givisi fokomu.
11Kay vun suuna halaŋ mba di ana,
Yesu ni Bu Suuna,
ŋgolla vi Lona Buna egemu.
Weleɗ ko kiɗikka hu duliyara na
12Banayanna agi hum ay un hu li ma an ay dukugina, va ma ŋgolna ni agi mba hum un ko ndaɗta na, lini an ka dukugiɗi lay, lagi sunda kay suɗ magira u ndaana huwa. 13Lona li u agi na gak gak kay a mbuɗugi ki saɓakŋa u min mamba kay a mba li ko va ma nam ŋgaamma na.
14Li tlena halaŋ bay yoora u ciwayra. 15Kay agi mba li a suu ɗegee suu bay cora egegina goryoŋ Lona suu bay cora duk suu guni suu co hu duliyarana. Agi mba weleɗ dukusi ko ciciwra huulona na. 16Kay a agi dasi boyna vi iirira, lini agi li wa na ni an hurun hin lini egegi jivi hu buu ma vi Kristuna hin wi ki ana sun manda u saɓak ma an lamma halaŋŋi ka ɦawaɗi.
17Iiri manda ndak a wul fok ko va ma sana ɦan a ɓivunna kay viigira maŋ Lona na su? Lini a li ni na ni an hurun furi ɦay, furi man ndaɗta ni u agi halaŋ. 18Agi lay hin li furira an taɓ u agi hu furi magira may.
Timote u Epafrodit
19An saa hu Bu Suuna Yesu a hin sunugi Timote ha tok kay an hin fi eŋga u boy ma an humum kagina. 20Nam dew ni sa ma a takagi kay dlara ka loɓonda a saa kagi u gasira. 21Suuna halaŋŋi hal ni dlaasira u min masira kay tasira, ka kayra vi Yesu Kristuraɗi. 22Agi u tagira wagi ɗegeera vi Timote u irigiya, agi wi sunda nam laɗ u anda ko goona li sunda u bumba na kay a di Boy ma Ayra. 23Lini an hin wi u dlaanda ki jivi wa ni an hin sunum haa. 24An wi ki gasi hu Bu Suuna ana an hin tuɗ tok a gologi u tanda lay.
25An saa a gi wayayna Epafrodit ha egegiya, ndaran goo ma sunda, ma duuna, nammi sa agi sununna ay u tlesuu njun ay unna. 26Nam saa a min tuɗ a wagi ki halaŋ, nam yam ka vi coco tuwa kay agi hum ana nam ka tuguɗiyo. 27Nam li tuguɗira hin tok a miɗna, na may Lona wam hahawamu ni ka kam nam dewɗi kan an lay ni kay a an fi yoora ŋgolla oloɗi. 28An min a gagina ha toŋgo zak kay agi mba li furira ta ta hu li ma agi hin wamma, agi wam wa ni yoo manda mba li oloɗi. 29Ni agi mba vam u furira ko nammi wayagina hu Bu Suuna na, ni agi tak hum magira agi hum u suunara ki egemu. 30Nam hin gin tok a miɗ kira ni kay sunda vi Kristu, nam ci iiri mamba ki gini u tlesuu agi sununsina ayna agi ndak ka mbaarasi u tagiraɗina.
Currently Selected:
FILIPINA 2: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
Free Reading Plans and Devotionals related to FILIPINA 2
Is There Hope for My Marriage? One Good Reason to Stay Together
Sing Like Never Before - Matt Redman
The Spiritual Journey of Mankind
