MATIYE 7
7
Kaɓakŋa kay ndarayaŋŋaɗi
(Luk 6.37-38,41-42)
1«Kaagi ɓakŋa kay ndarayaginaɗi. Sa hin ka kaagi ɓakŋa kaɗi may. 2Lona hin kaagi ɓak magina ko agi ka ma vi suunana na may. Nam hin mba ŋgaagi dlaagira, ko tlesuu agi ŋgaasi duk tagina na may. 3Aŋ gol usu ma ii wayaŋŋana ɗow ni, ka gol gu ma iriŋŋa ki fok jewɗi amege? 4Aŋ di wayaŋŋa ana, Hinin an tlaŋ usu ma iriŋŋa kiyo, ni gu ma iriŋ taŋga aŋ ka wambi may ni amege? 5Aŋ sa ma huruŋ mbambana giniŋŋa, tli gu ma iriŋ ki jewe, iriŋ mbuɗ wi ki jivi wa ni, aŋ hin tli ma ii wayaŋŋana ki tuwa.
6«Ҥagi tlesuu teteɗ suu vi Lonna maŋ digininaɗi, kayme asi mbuɗ usi kagi, eɗegiya. Cuk herew magina fok kosoŋŋa a nam tayam ki kaŋga u sesiɗi.»
Cagi vun goŋga, halagiya, joɓogi lay
(Luk 11.9-13)
7«Joɓogiya, agi hin fiya, halagiya, agi hin fi lay. Cagi vun goŋga, asi hin malagi lay. 8San li joɓpa ni, hin fiya. San li halla ni, nam hin fi may. Sa ma ci vun goŋga, hin malam lay. 9Sa ma ana goromma joɓom kay funana, nam hin ɦammi gogoyra su? 10Li ni nam joɓom kay kulufna ni, nam hin ɦam guyna su? 11Agi suu cona wi a ɦal tlesuu jivina maŋ goryogiya, Bugi ma kolo huulona ɦal tlesuu jivina maŋ suu joɓomma ni nam ɗowɗi su?
12«Tlesuu agi min ana suuna lagisinana, agi lasisina na may. Ni tlesuu di ay ki hu gaɗta vi Moiz u magaara vi suu jok vun Lonna.»
Vun goŋga goora
(Luk 13.24)
13«Cukugi kalafi hu vun goŋga goora. Vun goŋga sana kal huruɗ a ba kira ndaɗ ŋgol cocoo, voɗta tuɗ hura ŋgol coco may. Suu tuɗ huruɗna bolow coco lay. 14Vun goŋga sana kal huruɗ a suɗ kira, ndaɗ gooro. Voɗta kal hura na keɗet daŋ. Suu tuɗ huna ka ŋgolɗi.»
Guna u vuɗumu
(Luk 6.43-44)
15«Lagi tagi jivi ko suu kaboyna ana asi ni suu jok vun Lonna. Asi mba egegi ni, mbuɗ tasi ko timigiina na, doy hurusi kurufu ni, ko bosokona na. 16Agi wasi ni u vuɗusiya. Aŋ sana ndoɗ vuɗ gamma a wayvirna su? Hin ndoɗ vuɗ tulumma a wayara su? 17Gu ma jivina vuɗ ni jivi may, gu ma cona vuɗ ni co may. 18Gu ma jivina vuɗum jivi may, gu ma cona vuɗum ka co may. 19Gu ma vuɗum ka jiviɗina, kaam kiyo, ŋgalam ki kura. 20Ni na, agi wagi suu jok vun Lon cona ni u sun masira.»
«An wagi ay kaɗi»
(Luk 13.25-27)
21«Suu yan ana, Bu Suuna, Bu Suuna, ka cuk hu Mulla huulonara belɗi. Suu li minda vi Bun ma huulona cuk hu ni asiya. 22Buu namma ndak daa wa ni, suuna bolowo hin dan ana, Bu Suuna, Bu Suuna, ami jok boy maŋŋa ki maŋ suuna coco u seŋu, ami dik fuli suu cona ki u seŋ lay. Ami li dlara mbuɗ mbuɗta u seŋ coco lay. 23An hin dasi ana, An wagi ay kaɗi. Ҥuɗugi ha ki egen day, agi suu li dla cora.»
Ndal boyna kay ziginina mba'
(Luk 6.47-49)
24«Sa hum boy manna, li umma, tli tammi ko sa ma wi yalna ma min ziimba kolo kay ɦinira na. 25Lona siya, mbona tli cocoo, babaana paɗ kay zi ndaɗta lay. Zi ndaɗta ka bow kiɗi, kay ndaɗ mini kay ɦinira. 26Sa hum boy manna, ka li umbina, tli tammi ko sa ma giniŋŋa ma min ziimba kay ŋgetlna na. 27Lona siya, mbona tli cocoo, babaana paɗ coco kay zi ndaɗta, ndaɗ bow ki halaŋ gaw.»
Saɓakŋa vi Yesu
28Yesu daɓ bol mamba daɓmi, suu humumma lak na jim. 29Kaymege nam haɗasi wanni, ko sa um eŋŋa na, ka ko suu wi magaara gaɗta naɗi.
Currently Selected:
MATIYE 7: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
