MATIYE 6

Gaɗta kay ɦal tlena maŋ suu hawra

1«Lagi tagi jiviya kay tlesuu agi lasi maŋ Lona fok suuna halaŋ, ana asi gologiya na. Agi li lagi ni ii suuna ɦawaa ni, ka fi va ko Bugi ma kolo huulonaɗi.

2«Aŋ li ɦal va maŋ sa hawra ni, sawal kolo a suuna hum dukgi. Suu ŋga tasina li dla ndaɗta hu Zira Tokka, hu voɗta lay, ni asiya. Asi li na ni ana suuna ŋgaasiya. An dagi ni gasiya, suu asina fi warak masina ki kaŋga tani wa. 3Aŋu, aŋ li ɦal va maŋ sa hawra ni, hin sa wi dukgi. 4Va namma ni duk tagi doy hol. Aŋ li li na ni, Buŋ Lona wi ni nam doy hol, aŋ hin fi va komu.»

Gaɗta kay cenda

(Luk 11.2-4)

5«Agi li a cen Lona ni, lagi ko suu ŋga tasina naɗi. Asi min a cen Lona coli hu Zira Tokka, keŋ voɗta lay, a suuna wasiya. An dagi ni gasiya, suu asina fi warak masina ki kaŋga tani wa. 6Aŋu, aŋ li min a cen Lona ni, kal hu ziiŋga, dug vun goŋga kaŋu, joɓ Buŋ Lona hu li aŋ ŋgay huna. Aŋ li na ni, Buŋ Lona wi ni nam doy hol, aŋ hin fi va komu.

7«Agi li cen Lona ni, zul boyna ŋgol ko suu ɦawana naɗi. Asi saa ana Lona humusi joɓ masira ni, u boy ma zulum cocona. 8Lagi ko asi naɗi. Bugi Lona wi tlesuu agi joɓom kasina ki fok jewe. 9Agi li a cen Lona ni, dagi ana,

Bumi ma kolo huulonna,

Seŋ tii ŋgol su tlena halaŋ.

10Mul maŋga mbaa,

min maŋga laɗ kolo huulona,

laɗ kay ndaŋgara na may. 16

11Ҥami ti ma ami tam karamma.

12Bulumumi coomira,

ko ami bulum cora vi suu lamira

ay egemina na may.

13Hinimi hu ndembaɗi.

Suɗumi ki ko Ma Cona suɗu.

[Kay mulla lay maŋga,

garaŋga lay maŋga,

ŋgolla lay maŋga. Amin.]

14«Agi bulumugi cora vi gorseginara kiyo ni, Bugi ma kolo huulonna hin bulumugi magira ki na may. 15Agi li daɓ cora vi gorseginara kiɗi ni, Bugi ma kolo huulonna ka daɓagi magira kiɗi may.»

Gaɗta kay laara

16«Agi li laara ni, mbuɗ tagi ki hahawra ko suu ŋga tasina naɗi. Asi mbuɗ irisi ki hahawra zeɗ, a suuna wasi ana asi ka li laara. An dagi ni gasiya, suu asina fi warak masina ki kaŋga tani wa. 17Aŋu, aŋ li laara ni, mbus iriŋ kiyo, sak yaŋ ki may. 18Ka a suuna wi ana aŋ ka li laara naɗi. Buŋ Lona wi ni nam doy hol. Aŋ hin fi va komu.»

Begera kolo huulonara

(Luk 12.33-34)

19«Mologi begera kay ndaŋgaraɗi. Njufulna u toɓora hin taɗ ki ni ɦawaa, suu kulna vek u ziginina, kuluɗ ki lay. 20Mologi begera kolo huulona na ɗow. Li namma njufulna u toɓora ka tew a taɗɗi lay, suu kulna ka tew a kuluɗɗi lay. 21Lii bege maŋga huna, huruŋ tini ni hu may.»

Li kiɗikŋa kay tliw tara

(Luk 11.34-36)

22«Iriŋŋi pindilla kay tliw taŋu. Iriŋ li jiviya ni, tliw taŋ ki ni kiɗik may. 23Iriŋ li wi coo ni, tliw taŋŋi duk ndufunda. Lii egeŋ kiɗikŋa mbuɗ ki ndufun wa ni, huruŋ li warra ni ko me na ɗaŋge?»

Lona may begera may

(Luk 16.13)

24«Sa ndak ka li sunda fok mulina mba'ɗi. Nam li min ma hiŋŋa ni hin maa ki dew. Nam li ɗegee u maa dew ni hin noy ma hiŋŋa may. Agi ndak a sun Lona may, gursura may na jakgi»

Tin huruŋ kay Lona

(Luk 12.22-31)

25«Agi gola, an dagiya, Vundikigi ɓigigi kay tlesuu agi tasinaɗi, kay baraw ma agi cukum taginaɗi lay. Iirira ni ŋgol su ti ma funuginaɗi su? Tliw tagi ni ŋgol su baraw ma cuk taginaɗi su? 26Gologi layagina pii kolo gige! Asi ka zaa wa a feɗembi lay, asi ka cuk wa hu veeɗi lay. Bugi ma kolona ɦasi tina funusi ni nambi su? Agi suu warna ni su layaginaɗi su? 27Sa dukugi ma ɦuɗ buu mamma fokom kay tamma ni gege?

28«Agi yoo tagi kay baraw ma cukka ni kay mege? Gologi eg ɓo tlena hu senena. Ɓo tle asina ka li sunɗi lay, ka cil barawɗi lay. 29Salomon tlena kom coco, baraw mamma jivim tew ka u ɓo tle asinaɗi lay. 30Tlesuu kura hin ŋgalasi kina, Lona lasi ɓoosi jivi coco lay. Agi suu hurugi ka tini kay Lona ŋgolɗina, nam lagi ni jivi su ɓo tle asinaɗi su? 31Yoorogi tagi ana, agi hin ti ni mege, ci ni mege, cuk tagi ni mege, naɗi. 32Suu ka goɓ Lonɗina, hal dla ndaɗta ni asiya. Bugi ma kolo huulonna wi tlesuu agi minisina halaŋŋi namu. 33Halagi Mul Lonara u ɗegee mamba jewe. Tlesuu hin halaŋŋa Lona hin ɦagisina. 34Yoo tagi kay buu ma fokŋaɗi. Buu ma fokŋa, dlaamba ni kay tam may.»

Currently Selected:

MATIYE 6: BMS

Highlight

Copy