MALASI 3
3
1Gologiya, an sun saan ma vun sunda ha wa. Nam hin minin huu voɗta ha ki fokonu. Toŋgo zak gaw ni nam hin kal hu ziimba, malaŋ haɗta ma agi halamma, sa sunda ma banara ma minimma, gologiya, nam ka mbaya, Yawe, ma saɓakŋa kom belna, di na#Mat. 11.10; Mark 1.2; Luk 1.76; 7.27. 2Sa hin vi tam juɓ buu ma nam hin mbana ni gege? Sa hin col kolo fokom hu li ma nam hin kal ay ki kiɗikŋa ni gege? Kay ana nammi ko ndal ku mayra yoo tlenara na, ko ndal suu li sun barawina mbususi kira na#Joel 2.11; Wira 6.17. 3Nam hin kak kaŋga kay a yoo tusuna ki may, mbusum ki teteɗ may. Nam hin mbus goryoŋ Levina ki teteɗ. Nam hin ɦokosi ki ko ndal suuna ɦok doonora u lorra kira na. Suu may suu ɦam tlena a ɓivunna ko nam minda nana hin li ni suu vi Yawena. 4Ɓivun ma vi Yudana u ma vi Yerusalemma Yawe hin vam ko hu basara ay fok jewra na. 5An hin ɦuɗ tan ha egegi a kaɓakŋa. An hin kaɓakŋa kay suu vi kumuna, kay suu li zoŋga, kay suu suu tasina, kay suu hoŋ til suu li sunda ki kaŋgana, kay sa kuyuna u cara donora, kay suu las suu ka hu njaf masinaɗina, suu ka lan ndaaranɗi layna, Yawe, ma Saɓakŋa Kom Belna, di na.
Hoŋ ay eg Yawe
6Ҥawaa! An, Yawe, mbuɗ hurun kaɗi. Agi may ni a njafna vi Yakobma tew tew. 7Ay hu cokira vi somoyogira day ni agi ka min a van dlaanda kagiɗi, ka li uɗɗi lay. Hoŋogi ay egenu, an hin hoŋ egegi may, Yawe, ma Saɓakŋa Kom Belna, di na. Agi di ana, «Ҥoŋŋi ana mege?» 8Sa warna ndak a ganyam Lona su? Agi ganan yanu. Agi di ana, «Ami ganaŋ yaŋŋi u mege?» Ҥalla ɦal yam tlena u tlege suu ɦasi ɦawana. 9Agi kal ki hu cora wa, agi gananni yanu, agi suuna halaŋ. 10Agi ɦagi yam tlena ki jivi ko an minda na ay hu zira tlena ka toki hura. Ko tlesuu tira li hu ziinda. Agi tukun ki u dla ndaɗta tuwa. Yawe, ma Saɓakŋa Kom Belna, di na. Lini an hin si yona kaŋga kagiɗi ni, lini an hin paɗ vunun ki kagi agi hin fi tlena ŋgollaɗi ni.#Lev. 27.30; Ndu. 18.21-24; Gaɗ. 12.6; 14.22-29; Neh. 13.12 11An hin doorogi baari suu ti tlena ki kagi, ka asi tagi vuɗ tlesuu kay ndaŋga magirana kiɗi, ka a sene gugutlu magira ɓeŋ ki bay vuɗtaɗi, Yawe, ma Saɓakŋa Kom Belna, di na. 12Suuna hin li furira kagiya, kay agi ni suu paɗvunna li ki kay ndaŋga magirana, Yawe, ma Saɓakŋa Kom Belna, di na.
Buu ma Lona hin tak ɗegee mamba kina
13Saa magira eŋ cocoo, Yawe di na, agi di ana, «Ami daŋŋi dla me egeŋ ge?» 14Agi min a di ana, «Sunuygi Lona oloɗi, jivira aygi a faɗ hu lira aygi li u gaɗ mamba may, tuɗuygi u doona fok Yawe ma Saɓakŋa Kom Belna ni arage? 15Cecem wanda, agi ndak li furira kay suu li dla cora, suu li dla cora zul ni zuli na ɗow ɗow, li ni asi ganyam Lona, asi hin suɗ ki lay.»
16Suu li ndaana u Yawena vi vunusi ko wanda na. Nam Yawe hin tin humum kasi hin humusi may. Hin ɓii magaara ŋgolla fokom kay suu li ndaa Yawe ŋgaam sem lay na. 17Asi hin li ni suu mansina, Yawe, ma saɓakŋa kom belna, di ana, hu buu ma an hin min ii tlegeyen ki kay tasina. An hin suɗusi ki ko ndal buna suɗ goromma sunum ɦayna kira na. 18Na ɗaŋŋi agi hin wagi dlara duk ɦoŋ sa jivina u ma cona ki daŋgadla, duk ɦoŋ sa sun Lona u sa ka sunumbina. 19Gologiya, buuna ka mbaa, ŋgal ko ndal kura hu zullara na. Suu ŋga tasina u suu li dla cora halaŋ hin mbuɗ ni ko usuna na. Buu ma mbay namma hin ŋgalasi kiyo, Yawe, ma Saɓakŋa Kom Belna, di na. Nam hin ka hinisi sariyasiɗi lay, gogor kosiɗi lay. 20Agi suu li ndaana u senna, faɗta kaɓakŋa hin day ay kagi u kumu ma garaɗ suuna duk yaaɗu. Agi hin sel ay kiyo, hin luurugi njoŋŋa ko ndal gor mbutlina sel ay ki hu katlaŋgara na. 21Agi hin tayagi suu cona kaŋga u segiya, kay ana asi hin mbuɗ ki kaŋga u segi ni ko buɗna na, hu buu ma an ka min ii tlena, Yawe, ma Saɓakŋa Kom Belna, di na.
Hoŋga Eli hoŋ ayra
22Humugi gagi kay gaɗta vi Moiz saan ma sunda, sa an ɦam gaɗta ay kolo kay ɦinira yaɗ ana Horebba maŋ suu Israelna halaŋŋa. 23Gologiya, an ka sunugi Eli sa jok vun Lona ha ki jew mbara Yawe hin mbara, bu ma ŋgol ma dlam ti tara ɦayna.#Mat. 11.14; 17.10-13; Mark 9.11-13; Luk 1.17; Jaŋ 1.21 24Nam hin hoŋ huu somoyoŋ gorra eg goryosiya, huu gorra eg somoyosi may kay an mba wa ni hin ka kaɓakŋa kay ndaŋgaraɗi.
Currently Selected:
MALASI 3: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
