MALASI 2
2
Gi hum suu li ɓivunna
1Cecem wanda an gagi ni humugi agi suu li ɓivunna. 2Lini agi ka humbi, lini agi ka vagi tagi a ŋgaanɗi ni, an hin cukugi dla cora kagiya, gagi vunna, Yawe ma Saɓakŋa Kom Belna di na. Gasi an gagi vunna kay ana dukugi ni sa hurum jivi ka na dewɗi. 3An wanni, an hin lagi dla cora eg njafagiya, an hin cukugi soɗ tlena irigiya, soɗ tlesuu agi ŋgaɗasi a luu maginana. Suuna hin yowogi ki u namu. 4Agi hin wi ana an gagi humugi na ni kay a bana manda u Levira mbuɗ ki jivira. Yawe, ma Saɓakŋa Kom Belna, di na.#Ndu. 3.11-13 5Bana manda u namba ni iirira u heɓpa, kay an ɦamsina u ndaa ma lam unna a humum gam kanda. Fokon na ni nam mbuɗ ki ndaana.#Ndu. 25.12 6Haɗta gasira kal ay ki funumu, dlara ci way ka kal ay ki funumbi. Nam tuɗ u an hu gasira u ɗegeera, nam doo suuna ki bolow coco kay li dla cora. 7A gasira ni sa li ɓivunna ni sa wi dlara, suuna hum boy ma gaɗ tasina ni funumu, kay ana nammi sa vun sunda vi Yawe ma Saɓakŋa Kom Belna. 8Agi may ɗaŋŋi viɗigi ki wa. Agi viɗ suuna u haɗ magira cocoo. Agi ɓeŋegi banara vi Levira ki wa. Yawe, ma saɓakŋa kom belna, di na. 9An may ni hin lasagiya, mbuɗugi ki zolona duk suuna, hu li ma agi ka tuɗugi hu voɗ mandaɗina, hu li ma agi vi vunugi kay dlara wani ka li uɗɗina.
Mbeleŋ ma mba' a ɓeŋ banara kina
10Aygi halaŋŋi buygi ka ni dewɗi su? Lo ma dewna laygi ka ni nambi su? Ni kay me huruygi mbuɗ ki cora eg taygi na halaŋ halaŋ a ɓeŋeygi banara vi somoyoygira ki ge? 11Yuda ɓeŋ boyna kiyo. Dla cora mba hu Israel hu Yerusalem lay. Gasi Yuda ɓeŋ li ma teteɗ ma Yawe, hurum haɗ kam ɦayna ki u ɗumba nam ɗum goŋ loogi suu daŋŋara. 12Sa li ko ndaɗta nana ko Yawe yowom goryom u suu mamma ay ki hu mbutluɓma vi Yakobma, li ni sa li ɓivunna maŋ Yawe, ma Saɓakŋa Kom Belna, lay. 13Gologi dlara agi laɗ a mbarara, ko simi ma irigina oy givin ma togolla vi Yawena, tirigiya, oyogiya kay ana nam ka caa yam kay tlesuu agi ɦamsinana oloɗi, ka vagisina kogi u furira oloɗi lay. 14Agi di ana, «Ni kay mege?» kay ana Yawe ay ka coli duk ɦoŋogi u caaŋga u zoŋoŋga ta ɓeŋeɗ kira. Doli ndaɗ ay u aŋ a mbara ni ndaɗu, ta aŋ ŋgaɓaɗta. 15Yawe may ni li sana ka ni kay tam dew, mbalatam u musukka iirira hurumu naɗi su? Va ma sa namma halamma ni mege? Lona ɦal njaf suuna ay ni nambi su? Gologi iiri magira jiviya. Ka a sa ɓeŋ hurum ki eg caamba u zoŋombaɗi. 16A gasira dik cara ki u huu ma yara ni Yawe, Lona vi Israel, di ana ni aŋ cuk egeŋ a barawna ni yara vi Yawe, ma Saɓakŋa Kom Belna, di na. Gologi iiri magira jiviya, ɓeŋegi hurugi eg tagiɗi.
Yawe hin sun saam ma vun sunda aya
17Agi loɓogi Yawe ki u ɓak magi ma bolowna. Agi di ana, «Ami loɓom ki ni u mege?» Dira agi di ana, «Gegelay ma li cora jivi ii Yawe, nam furi kay suu li ko ndaɗta nana.» Ɗowba agi di ana, «Lo ma min li ɗegeera arage?»
Currently Selected:
MALASI 2: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
