MALASI 1
1
Yawe ŋgaɓ mi Israel
1Di boyna. Boyna vi Yawe dam maŋ Israel ay fun Malachie. 2Yawe di ana, «An minigiya,» agi hin hoŋom dira ana, «Aŋ minimi ni u mege?» Yawe di ana, «Ezaw ka ni wayaŋ Yakobmaɗi su? An hin min Yakob nige,#Rom. 9.13#Eza. 34.5-17; 63.1-6; Jer. 49.7-22; Eze. 25.12-14; 35.1-15; Amos 1.11-12; Abd. 1-14 3an hin noy Ezaw ki may. An hin bulumum ɦini mamba ki may, ɦam tlegeyem ki maŋ bayakka hu fulla lay.» 4Yawe, ma Saɓakŋa Kom Belna, di ana, «Lini suu Edomma di ana, Ami ki ɓeŋiya may ami hin hoŋ tlegeyemi kolo minda. Ko asi hoŋosi kolo minda may, an tanda hin hawaɗasi ki may. Hin tinisi sesi ana mbassa sulukŋa, suu Yawe hurum ka heɓ ki egesi na zakgina. 5Irigi hin wamu, agi tagira hin di ana, Yawe ni malaŋ ŋgolla kay mbassa Israella.»
Ɓivun ma co ma lam maŋ Yawena
6Goona ŋga bumu, sa sunda ŋga malamma. Doli wani an li ni Buna ni ŋgara agi ŋgaanda ni arage? Li ni anni sa haɗagina ni humba agi humunda arage? Yawe, ma saɓakŋa kom belna, dagi na, agi li ɓivunna u tlesuu ɓeŋen sen kina. Agi hoŋdira ana, «Ami ɓeŋeŋ seŋ ki ni u mege?» 7Agi mbaangi tlesuu cona ay hu givin ma togolla manna. Agi hin di ana, «Ami mbuɗuŋ ki cora ni u mege?» Agi di u vunugi ana, «Tabulla vi Yawera sunuɗ kaɗi.» 8Hu li ma agi mbay a li ɓivunna u yoo ma irim dugina ni ka coraɗi su? Hu li ma agi mbay u ma dalira, u ma tuguɗira ni ka coraɗi su? Ҥam ha maŋ mul maŋŋa tuwa na ni nam hin furi su? Na ni nam hin vaŋ varam u furira su? Yawe, ma Saɓakŋa Kom Belna, di na.#Gaɗ. 15.21 9Ŋgoo dagan ɗaŋŋi halagi dla mayra a heɓ huu Lona a nam waygi hahawaygira. Dla ndaɗta col ay ni kagiya, nam hin vagi u furira su? Yawe, ma Saɓakŋa Kom Belna, di na. 10Na ni hin fi sa dukugi dew a duk vunna ɗaŋ su, kay a agi ka lagi dla cora ta ta bulumun givin ma togolla manna kiɗi. An ka furi kagi na ndeɗi, Yawe, ma Saɓakŋa Kom Belna, di na. Ɓivun magina an ka vam kogiɗi. 11Kay ana col ay maɗii day ta ta tew u fiɗigina ni anni ma ŋgolna duk suuna. Hu lina halaŋ li ɓivun ma ŋgal tlena ni u senu, u tlesuu jivi suu ɦasi ayna, kay ana anni ma ŋgolna duk suuna, Yawe, ma Saɓakŋa Kom Belna, di na. 12Agi may ɗaŋŋi ɓeŋengi sen ki dagi ana, «Tabulla vi Yawera ki coo. Dlaɓ maɗta u tlesuu tira ki ni njenjee.» 13Agi di ana, «Gologiya, ni loɓ me nage?» Agi zuɗugira ha ki noyoɗ ki lay, Yawe, ma Saɓakŋa Kom Belna, di na. Agi mbaagi ay u yoori suu ɦulla ɗowba dalira ɗowba tuguɗira agi mba ɦasi a li ɓivunna. Na ni an hin vagi ɓivun namma kogi su? Yawe, ma Saɓakŋa Kom Belna, di na. 14Cora ka kay sa ɦulla, ma yoo ma njufna ka kom hu katlaŋ mamba, ɦal ɦalla ɦawara hin li ɓivunna maŋ Bu Suuna u yoo ma sunum kaɗina. Kay anni Mul ma Ŋgolna Yawe, ma Saɓakŋa Kom Belna, di na. Suuna halaŋ li ndaana ko senu.
Currently Selected:
MALASI 1: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
