LUK 9
9
Yesu sun suu mam suu doogo yam mbana
(Matiye 10.5-15; Mark 6.7-13)
1Yesu yi suu haɗi mam suu doogo yam mbana, ɦasi saɓakŋa a dik fulina kiyo, garaɗ suu tuguɗira ki lay. 2Ŋgoo dagan nam sunusi a di boyna kay Mul Lonara lay, a garaɗ suu tuguɗira lay. 3Nam dasi ana, «Agi tuɗugi wanni, tli va kogiɗi, tokolora, mbumbura, funa, u gursura tli maa kogi dewɗi. Yow baraw ma cuk kogi mba' mbaɗi lay. 4Zira agi cuk hura jok ugi hura daŋgi, juɓ gak gak hu li ma agi jok ugina tuwa. 5Suu ka minigiɗina agi a tuɗta wanni, po gugum ma kay ŋgoo segina ka kiyo. Gugum namma tak ki ni kay coosira.» 6Suu haɗina tuɗ ki hu zina dew dew halaŋ, di Boy ma Ayra kiyo, garaɗ suu tuguɗira ki lay.
Saara vi Herod kay Yesu
(Matiye 14.1-12; Mark 6.14-29)
7Mulna Herod hum boy ma li namma na ni, nam saa cocoo, kayme suu ɦiw di ana, «Jaŋ ma mbus batemma maŋ suuna paɗ ay ki kolo ni namu.» 8Suu ɦiw ana, «Eli hoŋ ay ni namu.» Suu hiŋŋa olo ana, «Li ka ni sa maa dew duk suu jok vun Lona suu jewna hoŋ ay ni nam kalage.» 9Herod di ana, «Jaŋ an kaam yam ki may ni. Sa ma an humum dlam namma ni gege?» Nam hal a wi Yesu.
Yesu ɦal funa maŋ suuna bup bup vadl
(Matiye 14.13-21; Mark 6.30-44; Jaŋ 6.1-14)
10Suu vovoɗta suu doogo yam mbana hoŋ ay di dlara asi laɗ ayra maŋ Yesu. Nam yowosi umu asi tuɗ vaydasi ha ki hu zina yam ana Betsaida. 11Suuna humum dlam hummi, cuɗum um haa. Yesu vasi u furira, ɓakasi kay Mul Lonara, garaɗ suu hurusi mina ki may.
12Faɗta gijaŋ ɗika may ni suu doogo yam mbana ɦuɗ tasi eg Yesu, dam ana, «Di suuna asi tuɗ hal tina funusi u li buuna, kayme aygi ki ni bagi duk gura.» 13Yesu hoŋosi dira ana, «Agi ɦasi tina ni agiya.» Asi dam ana, «Funa komi ni vadl u kulufna mba' ɦawaa. Aŋ min ana ami tuɗ gus tina ay maŋ suu bolow wanna su?» 14(Kay suuna moli ii va ma bup bup vadl.) Yesu di suu haɗi mamsina ana kaasi irisi ha ki va ma dok vadl dok vadl. 15Suu haɗina vam vunumu kaasi irisi ha ki ko nam dira na may. 16Yesu yow fu ma vadlna u kuluf ma mbana, gi deɓ Lona kamu, nam ɓorowom irim ki ɓorowni, ɦam maŋ suu haɗi mamsina ana asi ɓorowom ha ki maŋ suuna. 17Asi suuna ti funa ndak ki u mayasi halaŋ. Suu haɗina taa u fu ma hinna oy kaalamina doogo yam mba'.
Piyer di ana Yesu ni Sa Lona Fuurumma
(Matiye 16.13-19; Mark 8.27-29)
18Hu buu maa dew Yesu cen Lona kay tam wanni, suu haɗi mamsina ɦuɗ tasi egemu. Nam joɓosi ana, «Suuna di kan ana anni gege?» 19Asi hoŋom dira ana, «Suu ɦiw di ana aŋŋi Jaŋ ma mbus batemma maŋ suuna. Suu hiŋŋa ana aŋŋi Eli, suu ɦiw ana li ka ni sa dew duk suu jok vun Lona kalage.» 20Yesu joɓosi ana, «Agi may ni agi ɓak kan ana me mayge?» Piyer dam ana, «Aŋŋi Sa Lona Fuurumma.»
Yesu di kay miɗ mamma u paɗ mamba kolora
(Matiye 16.20-28; Mark 8.30—9.1)
21Yesu dasi ana di boy namma ki maŋ saɗi. 22Yesu di na olo ana, «Goŋ Sanna suuna hin lasam cocoo. Suu ŋgolona u muli suu li ɓivunna u suu wi magaara gaɗta hin noyom kiyo. Asi hin cam kiyo, nam hin paɗ ki kolo hu buu ma hindina.» 23Yesu di maŋ suuna halaŋ ana, «Lini sana min a tuɗ kay cerenu ni, maa dla tam kiyo, tli gu garak mamma hu buuna tew tew. 24Sa min a suɗ iiri mambana, ndaɗ hin ba kiyo. Sa ba iiri mamba ki kanna, nam hin suɗuɗ kiyo. 25Sana li ana tlesuu hu duliyara halaŋ li ni komu ni, nam ba iiri mamba ki wa ni, tlesuu asina hin mbuɗum mege? Nam ba tam ki ni namu. 26Lini sana li zolona kanu, kay boy manna may ni, Goŋ Sanna hin mbay u bibiŋilla vi Bumba u suu mam suu sunda huulona ni hin li zolona kam may. 27An dagi ha ni gasira suu dukugi ɦiw ka miɗ bay wi Mul Lonara u irisiɗi.»
Mbalata Yesu jok ki zeɗ
(Matiye 17.1-8; Mark 9.2-8)
28Ŋgoo dagan boy ma nam damma va ma buu kiɗisiya ni, Yesu tay gi Piyer u Jaŋ u Jak umu. Nam tiŋ u asi kolo kay ɦinira a cen Lona. 29Nam a cen Lona wanni, irim jok ki zeɗ. Baraw mamma mbuɗ weleɗ coco lay. 30Gola ni suuna mba' lakira eg Yesu njaɗ u namu, suu asina ni Moiz u Eli. 31Asi mbay u bibiŋilla, asi gi gagara duk tasi kay dla mayra nam hin faɗ vun sun mamba ki hu miɗ mamma Yerusalemma. 32Piyer u ndarayamma buu senna lat lat. Asi dliɗ ay kolo ni, wi bibiŋilla vi Yesura u suuna coli egem mba'. 33Suu mba' asina cuk tasi may ni, Piyer di Yesu ana, «Mala Haɗta, a jivira ni lakaygi tani. Ami minigi mbutluɓma hindi, dew maŋ may, dew maŋ Moiz may, dew maŋ Eli may. Piyer ka wi va nam dammaɗi.» 34Vunum bay ndi kaŋga tu may ni ɗugulla kuluɓ kasiya. Suu haɗi mamsina wi ɗugulla kuluɓ kasi na ni, asi mbuɗ ki ndaana. 35Asi hum della ɓak ay kolo duk ɗugulla ana, «Ni goron ma an ŋgaɓamma, humugi umu.» 36Della ɓak na ni asi wi Yesu coli vay dam dew. Suu haɗina gol na ni seŋ tasi gaw hu buu namma asi di boy namma ka maŋ saɗi.
Yesu dik fulna ki kay goona
(Matiye 17.14-18; Mark 9.14-27)
37Buu ma ŋgoo daganna asi ɗiŋ ay ki kaŋga kay ɦinira ɗiŋŋi, suuna mbay bolow coco a ŋgaf vok Yesu. 38Duk suu molina san dew sawalla kolo ana, «Mala Haɗta an joɓoŋu, gol iriŋ ay kay goron ma dewna, kayme nam kon dew ni namu. 39Fulna gam jaŋ lira wa ni nam sawalla, tam dlak jik jik, vunum gi kuffa coco may, nam ka hinim gagaɗi, hinim ki wa ni, ŋgoo dagan ni tam ka koɗ gagaɗi. 40An joɓ suu haɗi maŋsina ana dik ful namma ki kamu ni, asi ndak kaɗi.» 41Yesu hoŋ dira ana, «Agi suu co suu hurugi ka tini kanɗina, an hin li basara dukugi ni ga ologe? Siɓigi ni basa ga ologe? Mbaaran goroŋŋa ay tani.» 42Nam gijaŋ ɦuɗ tam ay may ni fulna vam kaŋga, gijaŋ dlakam tam na jik jik. Yesu bay fulna u delemba eŋga na ni, goona garaɗ ki gaw. Nam hoŋom maŋ bum gaw. 43Suuna halaŋ hin lakira na jim kay saɓakŋa vi Lona su ki kasiya.
Yesu hoŋ di kay miɗ mamma u paɗ mamba kolora
(Matiye 17.22-23; Mark 9.30-32)
Yesu wi suuna mbuɗ lakira na jim ko dlara nam laɗta ni, nam di suu haɗi mamsina ana, 44«Cecemi an dagiya, tinigi boy namma ha kagi jiviya. Goŋ Sanna, sa hin di kolokŋa kamu, suuna hin vamu.» 45Suu haɗina ka wi u boy nammaɗi, kay boy namma um ki ŋgay irisiya, asi vam kaɗi. Asi li ndaana a joɓ Yesu kay u boy namma.
Ma a ŋgolla ni gege?
(Matiye 18.1-5; Mark 9.33-37)
46Suu haɗina ciwayra duk tasi ana, «Sa kaki a ŋgolla ni gege?» 47Nam wasi saa masira na ni, tli gogona colom egemu, 48dasi ana, «Sa ma vi gogona varam u sen ko ma wan na na, nam van ni anu. Sa van varamma, vi ni sa sunun ayna may. Sa dukugi ko gogona na na, ni ma ŋgolna.»
Sa hurum ka co egeygiɗina ni saaygina
(Mark 9.38-40)
49Jaŋ gijaŋ ɓakŋa di ana, «Mala Haɗta, ami wi sana dik ful ma cona ki kay sana u seŋu. Ami min gin a dooromu, kayme nam ka dukuygiɗi.» 50Yesu hoŋom dira ana, «Dooroginɗi. Sa hurum ka egegi coɗina ni saagina.»
Zi ma hu mbassa Samari maa dew ka min a vi Yesu varasiɗi
51Buu ma Yesu a tuɗ kolo huulona ndak ndakŋi, nam min a tuɗ Yerusalem. 52Nam cuk suu sunda ha fokomu. Suu asina tew hu zi ma Samarina a min tlegena ha fokomba may ni, 53suu hu zi nammana ka min a vam varasiɗi, kayme nam tuɗ ni Yerusalem. 54Suu haɗina ki Jak u Jaŋ wi dla ndaɗta na ni, asi di ana, «Bu Suuna aŋ min ana aygi joɓ kura ay kolo huulonara ŋgalasi ki su?» 55Yesu pereɗ irim egesi yalasiya. 56Asi tuɗ hu zi ma daŋŋa gaw.
Suu min a tuɗ kay ce Yesuna
(Matiye 8.19-22)
57Asi tuɗ hu voɗta na ni, sa maa dew di Yesu ana, «An min a tuɗ kay cereŋ hu li ma aŋ tuɗ huna halaŋ.» 58Yesu dam ana, «Bayakka zuluɗ ka lay, layagina ziisi kasi lay. Goŋ Sanna li nam koɗ tam hu kaɗi.» 59Nam di sa hiŋŋa ana, «Tuɗ ay unu.» San hin dam ana, «Bu Suuna, hinin an tuɗ pi bun ha ki tuwa.» 60Yesu hoŋom dira ana, «Hin suu pi maɗna pi maɗ masina haa. Aŋ taŋga tuɗ di ha ki kay Mul Lonara.» 61Sa hiŋŋa olo dam ana, «Bu Suuna an min tuɗ kay cereŋu, hinin an tuɗ gi deɓ ay maŋ suu mansina tuwa.» 62Yesu dam ana, «Aŋ sa zumma li gol iriŋ dagani ni ka ndaki kay Mul Lonaraɗi.»
Currently Selected:
LUK 9: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
