LUK 13
13
Jok huuna ki zeɗ ɗowba vi miɗnara su?
1Hu buu namma wanni suuna tuɗ eg Yesu, cuɗ boy ma Pilat ci suu Galile suu li ɓivunna maŋ Lona kina. 2Yesu hoŋosi dira ana, «Agi saa ana suu Galile asina casi ki na lay ni, asi suu cora su suu Galilena bel bel gaw su? 3Ҥawaa, an dagi ha na, lini agi ka jok hurugi ki zeɗɗi ni, agi hin miɗ ni ko asi na may. 4Suu doogo yam kalavandina suu zira Silowe bow kasi casi kina, agi saa ana ni suu co su suu Yerusalemma bel su? 5Ҥawaa, an dagi ha na, lini agi ka jok hurugi ki zeɗɗi ni, agi hin miɗ ni ko asi na may.»
Ndal boyna kay tulumma ka vuɗɗina
6Yesu tinisi ndal boy hiŋŋa ɗaŋi ana, «Sa ma dew tulumma duk sene mamma, nam mba a halam vuɗumu, ka fam vuɗum huɗi. 7Nam di maŋ sa lam sunda hu senena ana, Aŋ gola, basara ki ca ni hindi an mba halam vuɗummi, ka fam huɗi, aŋ kaam kiyo. Nam ɗel lina ki ɦawa na ni amege?» 8Sa li sunda hu senena hoŋom dira ana, «Sa ŋgolna aŋ hinim cukuni tuwa, an cukum tlesuu mbira umu. 9Nam hin vuɗ kalage. Li kaɗi ni, daa ni aŋ hin kaam ki tuwa.»
Yesu garaɗ cara dagira ki hu buu ma vi Lonna
10Ni hu buu ma vi Lonna Yesu haɗ suuna hu Zira Tokka. 11Cara tuguɗira huwa, ndaɗ u ful ma cona kaɗu, guluɗuɗ kiyo basara doogo yam kalavandi ka hiniɗ a ɗoɓ taɗ ki dukgi. 12Yesu waɗ na ni yaɗu daɗ ana, «Ndak suɗ ki ko tuguɗi makka wa.» 13Nam baa kom kaɗ na ni, ndaɗ ɗoɓ ki duk zak gaw, gi jaŋ geleɗ Lona. 14Sa ŋgol ma hu Zira Tokkana hurum ɓeŋ ki eg Yesu kay dlara Yesu suɗ cara ki hu buu ma vi Lonna. Nam col kolo, tli ɓakŋa, di suu molina ana, «Buuna karkiya ca ni ma aygi li sunda hurummaɗi su? Ka ana li ni hu buu ma vi Lonnaɗi.» 15Bu Suuna hoŋom dira ana, «Suu hurugi mbambana agiya, hu buu ma vi Lonna gegelay ni vi mbutl mamma ɗowba koro mamba a haɗ yona naɗi su? 16Cara wanni hu deera vi Abrahamba, Satanna njunuɗ kaŋga basara doogo yam kalavandi ni, ndak ka a buɗuɗ ki kolo hu buu ma vi Lonnaɗi su?» 17Yesu hoŋ dira na ni, suu lam gonokka mbuɗ ki zolona bel bel. Suu moli halaŋŋa furi kay dlara jivira nam laɗta.
Yesu tin ndal boyna u ii seweena
(Matiye 13.31-32; Mark 4.30-32)
18Yesu di ana, «Mul Lonara tli taɗ ni ko menage? An hin ŋgaɗ ni u mege? 19Mul Lonara tli taɗ ni u ii sewee#13.19 seweena Moutarde. ma sana zaaram gaa hu sene mammara na. Nam day ki kolo wa ni, mbuɗ ŋgol su ŋgusugi suu hiŋŋa halaŋ lay. Layagi suu pii kolona mbay min ziisi hu komu.»
Yesu tin ndal boyna u kuffa
(Matiye 13.33)
20Yesu di olo ana, «An hin ŋga Mul Lonara ni u mege? 21Mul Lonara tli taɗ ko kuffa cara gaɗ duk fuɗta ŋgolo, yereset u ndaɗu, ndaɗ mbuuɗ ki halaŋga naa.»
Vun goŋga goora
(Matiye 7.13-14,21-23)
22Yesu kal ɦoŋzi ma ŋgolona u ma gorina haɗ suuna ha irimu, jak ha hu voɗta Yerusalemba na. 23Sana joɓom ana, «Mala Haɗta suuna a suɗ ki ni na ew daŋ su?» Yesu hoŋosi dira ana, 24«So tagi ki a kalagi hu vun zira goora. An neegi ki kagiya, suuna hin tuk tasi a kal hu vun zi ndaɗta cocoo, suu ɦiw hin ka a ndakgi.
25«Falira mala zira col ay kolo a dug vun ziimba kira wani, agi hin hin ki kiɗiki, agi hin gijaŋ ci vun goŋga hin di ana, Bu Suuna malami ha kiyo. Nam hin hoŋogi dira ana, An ka wagiɗi, wi mbas magiraɗi lay. 26Agi hin dam ana, Bu Suuna, ami ti funa u aŋ lay aŋ haɗami hu ziimina lay. 27Nam hin dagi olo ana, An ka wagi ana agi ni suu wanna naɗi. Ҥuɗugi tagi ha ki egenu, agi ni suu li dla cora. 28Hu li ma agi wi Abraham u Isaak, Yakob u suu jok vun Lonna hu Mul Lonara, agi hin cuk ha ki bunsu may ni, agi hin tiira, muɗ siigi may. 29Suuna hin mbay u maɗiina may, u fiɗigina may, mbayaw may, dali may, asi hin kak a ti funa hu Mul Lonara. 30Gologiya, suu cecemi daganna hin mbuɗ ki foko. Suu fokŋa hin mbuɗ ki dagan may.»
Yesu di boyna kay Yerusalem
(Matiye 23.37-39)
31Hu li namma suu Farisenna suu ɦiw ɦuɗ tasi ay eg Yesu. Asi dam ana, «Aŋ hin lii tanina, tuɗ hu lii daŋŋa, Herod hal a caŋ kiyo.» 32Yesu hoŋ dasi ana, «Hoŋogi i dagi maŋ bayak namma ana an dik ful ma cona kiyo, garaɗ suu tuguɗira ki lay karam may, vin may, siw may, a hindira ni sun manda a daɓ kira.» 33Ɗaŋŋi an jak voɗ manda ni koyni gaw, vini an ka huruɗu u buu ma fokŋa lay, ka jivi a sa jok vun Lona cam hu zi daŋgi, casi ni Yerusalem na baba.
34«Yerusalem agi ci suu jok vun Lonna kiyo, suu Lona sunusi ayna, agi casi ki u gogoyra lay. An min a tokoŋ suu huruŋŋa egenu ko tlekka tok goryoɗ u garaŋaɗta yan gage? Agiya agi min kaɗi lay. 35Li na ni, ziigi hin hin ki ni ɦawaa. Gasagi an dagiya, agi hin ka a wan ŋgoo dagan oloɗi, gak gak agi mbuɗ di ana, Ko Lona paɗ vunum ki kay sa ma col ay u sem Bu Suuna.»
Currently Selected:
LUK 13: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
