URA TIN AYRA 8
8
Nowa kal ay ki hu lumba
1Lona saa kay Nowa u yoorina u mburi suu um hu lumbana, nam saa kasiya. Nam sii semeɗna kay ndaŋgara, mbona gijaŋ hoŋ kaŋga ni na gaw. 2Vun zul mbo ma ay kaŋgana dug ki may, ma kolona dug ki may, lona seŋ sira gaw may. 3Mbona gijaŋ so ki kaŋga nde nde, li buuna kis duk dok-vadl ni nam mbona gijaŋ hoŋ kaŋgara.
4Hu til ma karkiyana buuna doogo yam kiɗisiya ni lumba tin kaŋga kay ɦinira yaɗ ana Ararat. 5Ni mbona yam kay so ki na nde nde tew buuna doogo yam dew hu til ma doogona, ni yam ɦinira ma kolona gijaŋ wi ki koloo.
6Tew buuna dok-hindi ni Nowa mal ii zira nam miniɗ hu lumbara kiyo. 7Nowa gi gawgaw ma ki dew, nam tuɗ gol lina, pii kolo gak gak juɓ lina so ki tuwa. 8Ni Nowa gi gugukka kay ana ndaɗ gol lina ay gege, mbona bay so ki kay ndaŋgara tu wan su? 9Ni ndaɗ gugukka fi li ma ndak a cuk seɗ hu kaɗi, kay yam ndaŋgara ki tluɓi ko mbona halaŋ halaŋ tuwa, ni ndaɗ gugukka hoŋ ay hu lumba eg Nowa. Nam vaɗ vini hoŋ gaɗ hu lumba balamaɗu. 10Ŋgoo dagan nam li buuna kiɗisiya, hin gi gugukka ay ki buru olo. 11Fiɗigi ni ndaɗ gugukka mbay egem tli hum cona ma ŋgolomma ay funuɗu. Hu li namma Nowa wi ana mbona ka so ki kaŋga kay ndaŋgara. 12Nam li buuna kiɗisiya hoŋ gugukka ay olo, ni ndaɗ hoŋ ha ka egem oloɗi.
13Ni hu li ma Nowa basaɗam li ki 601 hu buu ma jewna vi til ma jewna hu basa ndaɗta, mbona so ki kay ndaŋgara. Nowa mal yam lumba ki mal ni, nam wi ana yam ndaŋgara ki sooya.
14Li buuna dok-mba' yam kiɗisiya hu til ma mbana ni yam ndaŋgara so ki pal pal. 15Lona, di Nowa ana, 16«Cukugi ay ki hu lumba, aŋ u caaŋga u goryoŋu u boyogosi lay. 17Cuk tlesuu ay uŋ hu lumbana ki halaŋ u njaf layagina zeɗ zeɗ suu ŋgolona u suu gorina, mburina lay, asi njay ki kay ndaŋgara zul kiyo.» 18Nowa kal ay ki hu lumba u caamba, goryom u boyogosiya. 19Mburina cuk ay ki buru u njafasiya njafasiya u layagina lay, u tlesuu iiri suu tuɗ kay ndaŋgara halaŋ.
20Nowa min givin ma togolla maŋ Yawe. Nam man duk mburi suu ŋgolona u layagina u njaf tlesuu iirina zeɗ zeɗ tlesuu teteɗna a li ɓivun ma ŋgalam kina maŋ Lona. 21His ɓivun namma cuk kay Yawe na ni, nam di ana, «An ka gi vun ndaŋgara ki kay cora vi suunara oloɗi. Sana ay hu gorom day ni hurumi saara cora. An ka min a ba tlesuu irina ki ko an li wanda na oloɗi.
22Hu li ma ndaŋgara kana,
zaara zaa njafna u feɗta ka daɓpi,
ni na lay til zamalla u til semeɗna,
ndolla u walla, faalira u njeŋgera,
tlesuu asina ka daɓ kiɗi.»
Currently Selected:
URA TIN AYRA 8: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
