URA TIN AYRA 7
7
Nowa kal hu lumba
1Yawe di Nowa ana, «Cukugi hu lumba u suu maŋŋa halaŋ, an wi ana duk suuna halaŋŋi sa irin ɗegeena ni aŋ dew daŋ. 2Aŋ yow mburina fun tasi cuɓ cuɓpa kiɗisiya, ni suu bay ŋgulla egesina. Suu hiŋŋa aŋ yowosi ni cuɓ dew daŋŋi ma njufna u caamba. 3Layagina aŋ yowosi cuɓ cuɓpa kiɗisiya u deeresi zeɗ zeɗ kay a suɗusi njafasi kay ndaŋgara may. 4Buuna hin kiɗisiya an hin hin yo ma ŋgolna si kay ndaŋgara buuna dok-fiɗi, faali lay njeŋge lay, an min tok yam tlesuu iiri suu an lasi halaŋŋa kiyo.»
5Nowa li dla mayra Yawe damba halaŋga kiyo. 6Hu li ma mbo ma ŋgolna tli kay ndaŋgarana ni Nowa basaɗam li ki kis kis karkiya.
Mbo ma ŋgolna tluɓ ndaŋgara
7Nowa cuk hu lumba u caamba u goryom u boyogosiya kay a suɗ tasi ki ko mbo ma ŋgolna tli kay ndaŋgarana.#Mat. 24.38-39; Luk 17.27 8Mburi suu bay ŋgulla egesina u mburi suu cona, layagina u tlesuu gori suu ɦaram kaŋga kay ndaŋgarana, 9asi halaŋ tok ay eg lumba vi Nowara u tasi mba' mba', njufna u caamba ko Lona dira na. 10Buu ma kiɗisiyana a daɓa may ni mbo ma ŋgolna tluɓ ndaŋgara ni na gaw.
11Coki mayra Nowa basaɗam li ki kis kis karkiya, buuna doogo yam kiɗisiya ni hu til ma mbana, mbo ma ay hu zulla ŋgollana mun ay ki kolo, ma ay kolona mun ay ki may. Mbona ay ki hu lina halaŋ.#2 Piy. 3.6 12Lona gijaŋ sira na sini gak gak buuna dok-fiɗi, faali lay njeŋge lay.
13Hu li namma Nowa kal hu lumba u caamba, u goryom, Sem, Kam u Jafet, u boyogosi suu hindina may. 14U njaf mburi suu zeɗ zeɗna u yoorina, njaf tlesuu iirina zeɗ zeɗ, u layagina u tlesuu gorina u suu ŋgolona halaŋ. 15Njaf tlena halaŋ halaŋ ma njufna u caamba ni tlesuu irina bel bel mba cuk hu lumba eg Nowa. 16Ma njufna u caamba njaf tlena halaŋ cuk hu lumba ko Yawe di Nowara na.
Ŋgoo dagan Yawe dug vun lumba kay Nowa.
17Mbo ma ŋgol namma li buuna a sira kay ndaŋgara dok-fiɗi. Hu li ma mbona oy lina ki halaŋ halaŋŋa, lumba tli ki kolo kay mbona, gijaŋ ɓaɗ ha u mbona ni na gaw. 18Mbona tli ay kolo tli na ɗow ɗow, ni lumba tuɗ ha kolo u mbona gaw gaw may. 19Mbona tli kolo gak gak yam ɦinira fiyekka, mbona tluɓuɗ ki halaŋ. 20Mbona tli kolo gak gak kolo kay ɦinira fiyekka ŋga meter kiɗisiya. 21Tlesuu kak iiri u musukŋa hurusina u tlesuu poy kolo kay ndaŋgara ba ki kay ndaŋgara halaŋ halaŋ. Layagina, yoorina, mburina, tlesuu ɦaram ɦaramina, u suu warna lay halaŋ.
22Tlesuu musukka hurusina u tlesuu kay ndaŋgara halaŋ halaŋ ba kiyo. 23Yawe tok yam ndaŋgara ki halaŋ, tlesuu musukka hurusina va hin kaɗi. Col ay kay sa warna day gak gak mburina u yoorina, tlesuu gorina, tlesuu ŋgolona, layagina, tlesuu asina bulum ki kay ndaŋgara. Sa ma hin iirina ni Nowa dew, u suu cuk ay um hu lumbana gaw may. 24Mbona oy kay ndaŋgara penen penen, li buuna kis duk dok-vadl kay ndaŋgara.
Currently Selected:
URA TIN AYRA 7: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
