URA TIN AYRA 40
40
1Ŋgoo dagan tle asina, ni sa ŋgolna vi suu ɦal cina maŋ mul ma Egiptena u ma vi suu ɦam tina lam dla cora egemu. 2Faraw hurum ɓeŋ eg suu ŋgolo mam suu mba' asina, sa ŋgol ma ɦal tlesuu cira u ma ɦal tina. 3Nam cukusi hu zina vi sa ŋgol ma gol suu daŋgayna, ni hu zira daŋgayna hu li ma Yosef ka huna. 4Sa ŋgol ma gol suu daŋgayna hinisi ni ko Yosef nam ka sunusi ni namu. Asi buu ki hu daŋgayna ŋgol nde.
Yosef di vun doyra ki maŋ suu daŋgayna
5Hu njeŋgera dewra ni sa ŋgol ma ɦal tlesuu cira maŋ mulna u ma ɦam tina doyra dasiya uɗ ki zeɗ zeɗ kama. 6Yosef mbay egesi maɗii golosi na ni asi irisi ɗus ya yaa. 7Nam joɓosi ana, «Irigi karam ya yara na ni nanage?» 8Asi hoŋom dira ana, «Doyra dami kaa njeŋgee, sa ma gamira uɗ ki kaɗi.» Yosef dasi ana, «Sa ma gi u doyra kina ni Lonaɗi su? Cuɗun ki vun doy magi ndaɗta ay gige.»
9Sa ŋgol ma ɦal tlesuu cira maŋ mulna cuɗ vun doy mamba maŋ Yosef. «Doy manda ni an wi gu gugutlura day fokonu. 10Gugutlu ndaɗta gor gor koɗ hindi. Koɗ namma wula cuk ɓora gaw, vuɗ vuɗni ne ki gaw. 11Kop ma Faraw ci yona u namma kon kawiya, an nduɗ vuɗ gugutlura emeɗ huwa, haɗ maŋ Faraw.»
12Yosef dam ana, «U doy maŋga ni anaba, gor gor koɗ ma hindina ni buuna hindi. 13Buuna hindi ni Faraw hin hoŋoŋ hu sun maŋga. Aŋ hin ɦal va cira ko Faraw, ko aŋ li ay jew a sa ŋgol mamma ɦam tlesuu cira na. 14Hu li ma aŋ fi jivira wa, ni humuŋ gaŋ kanu, njaɗan dlan maŋ Faraw, nam gan ki hu zira daŋgayna wanda. 15Kay asi van ay hu mbassa Hebrera ta ta tani lay, an li va ma co ma sa gan daŋgay kam kaɗi.»
16Sa ŋgol ma ɦal tina maŋ mulna wi ana Yosef di vun doyra ki jivi wani, gijaŋ cuɗum doy mamba may. «Hu doy manda ni kaalamina hindi oy u fu ma haɓma tini kanu. 17Hu kaalamba kayam kolora ni ti ma vi Farawna irim ka hu zeɗ zeɗ. Layagina tanna ki kolo kan hu kaalamba.» 18Yosef hoŋom dira ana, «Kalami suu hindina ni buu ma hindina. 19Buuna hin hindi Faraw hin kaaŋ yaŋ kiyo, hin ɓalaŋ ki kolo hu guna, layagina hin komoŋ kiyo.»
20Buu ma hindina ndak ndakŋi Faraw tin luu ma vuɗumma, yi suu mam suu ŋgolona egem halaŋ gi sunda hu daŋgayna yi sa ŋgol ma ɦal tlesuu cira u ma ɦam tina yasi ay ki egesiya. 21Nam hoŋ sa ŋgol ma ɦal tlesuu cira hu sun mamba, a nam ɦal tlesuu cira maŋ Faraw. 22Nam ɓal sa ŋgol ma ɦal tlesuu tira ki kolo hu guna ko Yosef cuɗum vun doyra na. 23Sa ŋgol ma ɦal tlesuu cira maŋ Farawna humum maa ki kay Yosef gaw.
Currently Selected:
URA TIN AYRA 40: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
