URA TIN AYRA 39
39
Yosef vi Potifar
1Suu Ismaelna tuɗ Yosef ha Egipte. Potifar ma Egiptena ma ŋgol asgaana vi Farawna gusum kosiya. 2Yawe ka u Yosef, dlara nam laɗta halaŋŋi Lona paɗ vunna ki kaɗu.#Sun. 7.9
Nam kagi ni vi sa ŋgol mamma Egiptena. 3Sa ŋgol mamma wi ana Yawe ka u namu, dlara nam laɗta halaŋŋi Lona paɗ vunna ki kaɗu. 4Yosef fi jivira fok sa ŋgol mamma, namma tinim kay sun mamba hu ziimba halaŋ, tlegeyem halaŋ nam hinimsina ni komu.
5Hu li ma Potifar hinim dlara hu ziimba halaŋ komba may ni, Yawe paɗ vunum ki kay ziŋ sa ma Egiptena u Yosef. Paɗvunna vi Yawe li kay tlesuu vi Potifarna halaŋ vo hu ziim lay, ha hu senena lay. 6Potifar hin tlegeyem halaŋ ko Yosef. Nam ka saa kay va ma daŋ oloɗi, hin kom dew ni ti ma funumma gaw.
Yosef u caŋ sa ŋgol mammara
Yosef jivi ɦay, wuli jivi lay, irimba golla jivi coco lay. 7Ŋgoo dagan buu ca ni caŋ sa ŋgol mammara cuk iriɗ kamu, dam ana, «Aŋ mbay buu u anu.» 8Yosef min ka a buu u ndaɗɗi, nam daɗ ana, «Sa ŋgol manna tlesuu hu ziimma halaŋŋi nam ka joɓ u vaɗi, nam hinin tlegeyem halaŋŋi konu. 9Nam tamba lay ka ŋgol suun hu zi nammaɗi, nam ka dooron kay vaɗi, ni ndak dew, kay ndakŋi caamba. An a li cora ŋgol ndaɗta eg Lona na ni amege?» 10Ndaɗ ɓakam hu buuna tew tew lay ni, Yosef ka min a buu u ndaɗɗi. 11Buu maa dew ni Yosef kal kalafi a li sun mamba ni sa ka vo dewɗi. 12Ndaɗ vam baraw mamma dam ana, «Mbay buu u anu.» Nam fokoɗ barawna ha koɗu kal ay ki liŋa.
13Cara wi wa ana Yosef hiniɗ baraw mamma ka koɗ kal ki kiɗik wani, 14ndaɗ yi suu maɗ suu hu zinana dasi ana, «Njufun mbaaragi sa ma Hebrena ay tani a panaygiya. Nam mbay egen ana a buu u anu, an sawalla ha kamu. 15Hu li ma nam hum ana an sawalla kolo eŋga wa, ni nam fok baraw mamma ha konu, paɗ liŋŋa kal ay ki kiɗiki.» 16Ndaɗ cuk baraw ma vi Yosefna egeɗ na ca ta ta sa ŋgol mamma mbay vo tuwa. 17Ndaɗ dam ana, «Mbaɓu maŋ ma Hebrena ma aŋ mbaaram ay vona mbay egen a luu u anu. 18Hu li ma an tli delen kolo sawalla na ni, nam hin baraw mamma ka egenu, paɗ liŋa kal ki kiɗiki.» 19Hu li ma nam hum boy ma vi caamba dam ana gola ni dlara mbaɓu maŋŋa landa egenda ni, sa ŋgol ma vi Yosefna mbuɗ ki ya cocoo. 20Nam vi Yosef gam daŋgayna, hu li ma suu daŋgay suu vi mulnana ka huna, nam ti daŋgay mamma ni huwa.
Yosef hu daŋgayna
21Yawe ka u Yosef, ɦam jivi mamba, nam mbuɗni jivi ii asgaa ma ŋgol daŋgayna.#Sun. 7.9 22Sa ma ŋgol suu daŋgayna hinimsina ni kom halaŋ. Dlara li hu daŋgaynara halaŋ ta li ki balamam kaɗi. 23Tlesuu ka ko Yosefna halaŋ sa ma ŋgol daŋgayna ka saa kasiɗi, kay Yawe ka u namu. Dlara nam laɗta halaŋ Yawe mbuɗuɗ ki jiviya.
Currently Selected:
URA TIN AYRA 39: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
